കൊൽക്കത്ത: ഡ്യൂറണ്ട് കപ്പിന്റെ കലാശപോരാട്ടത്തിന് യോഗ്യത നേടി ഡയമണ്ട് ഹാർബർ എഫ്.സി. സെമി ഫൈനലിൽ  ഈസ്റ്റ് ബംഗാളിനെ 2-1ന് വീഴ്ത്തിയാണ് ഡയമണ്ട് ഹാർബർ എഫ്.സി ഫൈനലിലേക്ക് മുന്നേറിയത്. തങ്ങളുടെ ആദ്യ ഡ്യൂറണ്ട് കപ്പിൽ തന്നെ ഫൈനൽ യോഗ്യത ഉറപ്പാക്കിയതോടെ ഹാർബർ എഫ്.സി ഒരു ചരിത്രനേട്ടവും കൈവരിച്ചു.

ഡ്യൂറണ്ട് കപ്പിൽ കളിക്കുന്ന ആദ്യ സീസണിൽ തന്നെ ഫൈനലിലേക്ക് കടക്കുന്ന രണ്ടാമത്തെ ടീമായി മാറാനാണ് ഡയമണ്ട് ഹാർബർ എഫ്.സിക്ക് സാധിച്ചത്. ഇതിന് മുമ്പ് മോഹൻ ബഗാൻ മാത്രമാണ് ഈ നേട്ടം കൈവരിച്ചത്. 1929ലാണ് മോഹൻ ബഗാൻ തങ്ങളുടെ ആദ്യ സീസണിൽ ഫൈനലിൽ കടന്നത്. 

അതേസമയം മത്സരത്തിൽ ആദ്യ പകുതിയിൽ ഇരു ടീമുകൾക്കും ഗോൾ നേടാൻ മികച്ച അവസരങ്ങൾ ലഭിച്ചുവെങ്കിലും പന്ത് ലക്ഷ്യത്തിലെത്തിക്കാൻ കഴിഞ്ഞില്ല. രണ്ടാം പകുതിയിലും ഇരു ടീമുകളും ഗോളിനായി ശ്രമിച്ചുകൊണ്ടിരുന്നു. ഒടുവിൽ ഡയമണ്ട് ഹാർബർ എഫ്.സി മത്സരത്തിലെ ആദ്യ ഗോൾ നേടി. 66ാം മിനുട്ടിൽ കോർട്ടസറായിരുന്നു ആദ്യ ഗോൾ നേടിയത്. എന്നാൽ തൊട്ടടുത്ത മിനുട്ടിൽ തന്നെ ഈസ്റ്റ് ബംഗാൾ ഗോൾ മടക്കി മത്സരത്തിലേക്ക് തിരിച്ചുവന്നു. ഇരു ടീമുകളും വിജയഗോളിനായി പൊരുതുന്നതിനിടെ ഡയമണ്ട് ഹാർബർ രണ്ടാം ഗോളും ലക്ഷ്യത്തിലെത്തിച്ച് ഈസ്റ്റ് ബംഗാളിനെ സമ്മർദത്തിലാക്കി. 83ാം മിനുട്ടിൽ ക്യാപ്റ്റനും മലയാളി താരവുമായ ജോബി ജസ്റ്റിനായിരുന്നു രണ്ടാം ഗോൾ നേടിയത്.

ശനിയാഴ്ചയാണ് ഡ്യൂറണ്ട് കപ്പിന്റെ ഫൈനൽ പോരാട്ടം നടക്കുന്നത്. ഷില്ലോങ് ലജോങ്ങിനെ പരാജയപ്പെടുത്തിയെത്തുന്ന നോർത്ത് ഈസ്റ്റ് യൂണൈറ്റഡാണ്‌ ഡയമണ്ട് ഹാർബർ എഫ്.സിയുടെ എതിരാളികൾ.

Diamond Harbour FC qualified for the finals of the Durand Cup and advanced to the finals by defeating East Bengal 2-1 in the semi-finals. Diamond Harbor FC became the second team to reach the finals in its first season playing in the Durand Cup.