ചേവായൂര്‍: കോഴിക്കോട് മെഡിക്കല്‍ കോളജ് അത്യാഹിത വിഭാഗത്തിനു സമീപത്തുള്ള ശൗചാലയത്തിന്റെ ടാങ്ക് പൊട്ടിയൊലിച്ച് പരിസരമാകെ മാലിന്യം പരന്നൊഴുകുന്നു. അപകടങ്ങളില്‍ പരുക്കേറ്റ് വെന്റിലേറ്ററില്‍ കഴിയുന്ന രോഗികളെ പരിചരിക്കുന്നവര്‍ വിശ്രമിക്കുന്ന മുറിക്കു സമീപത്താണ് കോര്‍പറേഷന്റെ ഒരു ടോയ്‌ലറ്റും സംസ്ഥാന വനിതാ വികസന വകുപ്പിന്റെ സ്ത്രീകളുടെ ഒരു ടോയ്‌ലറ്റും നിര്‍മിച്ചിട്ടുള്ളത്.
ദിവസേന നൂറുകണക്കിനാളുകള്‍ ഇവ ഉപയോഗിക്കുന്നതിനാല്‍ കുറഞ്ഞ കപ്പാസിറ്റിയുള്ള ടാങ്ക് നിറഞ്ഞൊഴുകുന്ന സ്ഥിതിയിലാണ്.
ഹെഡ് ഐ.സി.യുവിലെ രോഗികളുടെ കൂട്ടിരിപ്പുകാര്‍ വിശ്രമമുറിയില്‍ ഏതു സമയവുമുണ്ടാകും. മരുന്നിനും മറ്റു കാര്യങ്ങള്‍ക്കും ഡോക്ടര്‍ വിളിക്കുമെന്നതിനാല്‍ ഇവിടെ നിന്ന് മാറി നില്‍ക്കാനും സാധിക്കില്ല. ഇവര്‍ക്ക് ദുര്‍ഗന്ധം സഹിച്ചു നില്‍ക്കുകയല്ലാതെ മറ്റു മാര്‍ഗമൊന്നുമില്ല. ശാശ്വത പരിഹാരം കാണാതെ ബ്ലീച്ചിങ് പൗഡര്‍ വിതറി പൊടിക്കൈ 'ചികിത്സ' നടത്തുകയാണ് ആരോഗ്യ വകുപ്പ് അധികൃതര്‍ ചെയ്യുന്നതെന്ന ആക്ഷേപം ശക്തമായിട്ടുണ്ട്.