മുംബൈ: ഗണേശോത്സവത്തിനിടെ വളണ്ടിയര്‍മാര്‍ പൊലിസുകാരനെ ആക്രമിക്കുന്ന ദൃശ്യങ്ങള്‍ പുറത്ത്. മുംബൈയിലെ കല്ല്യാണിലാണ് സംഭവം. ഒരു വളണ്ടിയര്‍ പൊലിസുകാരനെ വെള്ളത്തില്‍ മുക്കി കൊല്ലാന്‍ ശ്രമിക്കുന്നതിന്റെ മൊബൈല്‍ ക്യാമറ ദൃശ്യങ്ങളാണ് പുറത്തുവന്നിരിക്കുന്നത്.

തിരക്കിനിടയില്‍ അച്ചടക്കം പാലിക്കാന്‍ നിര്‍ദേശിച്ച നിതിന്‍ ദൊഗാഡെ എന്ന പൊലിസുകാരനെയാണ് രോഷാകുലരായ വളണ്ടിയര്‍ കുളത്തിലെ വെള്ളത്തില്‍ മുക്കി കൊല്ലാന്‍ ശ്രമിച്ചത്. വെള്ളത്തില്‍ നിന്നും കരകയറിയ നിതിനെ മൂന്നോളം പ്രവര്‍ത്തകര്‍ ചേര്‍ന്ന് പിന്നീട് മര്‍ദ്ദിക്കുകയും ചെയ്യുന്നുണ്ട്.

സംഭവത്തില്‍ അക്രമികള്‍ക്കെതിരെ കൊലപാതകശ്രമത്തിന് കേസെടുത്തു. എന്നാല്‍ സംഭവത്തില്‍ ഇതുവരെ ആരെയും അറസ്റ്റ് ചെയ്തിട്ടില്ല.

മുംബൈയില്‍ ഇതിനു മുമ്പും നിരവധി പൊലീസുകാര്‍ ആക്രമിക്കപ്പെട്ടിരുന്നു. ഏഴോളം കേസുകളാണ് ഇതുവരെ രജിസ്റ്റര്‍ ചെയ്യപ്പെട്ടത്.