കൊച്ചി: ഉപ്പ ഫൈസല്‍ വാങ്ങിക്കൊടുത്ത വിമാനം പറപ്പിക്കുന്ന ഗെയിമില്‍ നിന്നാണ് ഇര്‍ഫാന് പൈലറ്റാകാനുള്ള ആഗ്രഹത്തിന് ചിറക് മുളച്ചത്. വല്യുപ്പയും കോട്ടയത്തെ പ്രമുഖ വ്യാപാരിയുമായ കെ.സി മൊയ്തു സര്‍വ പിന്തുണയുമായി ഇര്‍ഫാനൊപ്പം നിന്നു. പ്രാഥമിക വിദ്യാഭ്യാസത്തിന് ശേഷം  യു.പിയിലെ റായ് ബറേലിയിലെ ഇന്ദിരാ ഗാന്ധി രാഷ്ട്രീയ ഉഡാന്‍ അക്കാദമി (ഇഗ്‌റോ)യില്‍ നിന്ന് ഏവിയേഷന്‍ ബിരുദം നേടിയിറങ്ങിയ ഇര്‍ഫാന്‍ രണ്ട് വര്‍ഷമായി എയര്‍ ഇന്ത്യയുടെ പൈലറ്റാണ്. 

ഇര്‍ഫാന്‍ പൈലറ്റാകുമ്പോള്‍ അവന്‍ പറത്തുന്ന വിമാനത്തില്‍ കയറി യാത്രചെയ്യണമെന്ന ആഗ്രഹം മൊയ്തു വര്‍ഷങ്ങള്‍ക്ക് മുമ്പ് പങ്കുവച്ചിരുന്നു. 88കാരനായ മൊയ്തുവിന് ശാരീരിക അവശതകള്‍ ഏറെയുണ്ടായിരുന്നു.  വല്യുപ്പയുടെ ആഗ്രഹം സാധ്യമാക്കാനുള്ള അവസരത്തിനായി  ഇര്‍ഫാനും  പ്രാര്‍ഥനയോടെ കാത്തിരിക്കുകയായിരുന്നു. 

കഴിഞ്ഞ ഓഗസ്റ്റ് 31ന്  കൊച്ചിയില്‍ നിന്നുള്ള എയര്‍ ഇന്ത്യാ വിമാനത്തില്‍ വല്യുപ്പയെയും മാതാപിതാക്കളെയും കുടുംബാംഗങ്ങളെയുമായി  ഇര്‍ഫാന്‍ ബംഗളൂരുവിലേക്ക് പറന്നതോടെ കുടുംബത്തിന് സ്വപ്‌ന സാക്ഷാത്കാരമായി . 88കാരനായ  മൊയ്തുവിന്റെ ആരോഗ്യത്തെ സംബന്ധിച്ച ആശങ്കകളുണ്ടായിരുന്നതായി മകനും ഇര്‍ഫാന്റെ പിതാവുമായ ഫൈസല്‍ പറഞ്ഞു. 20 വര്‍ഷം മുമ്പ്  ഉംറ നിര്‍വഹിക്കാൻ പോയതാണ് ഇതിന് മുമ്പ് വിമാന യാത്ര ചെയ്തത്. എന്നാല്‍, ബംഗളുരു യാത്രയില്‍ യാതൊരു ശാരീരികാവശതകളുമുണ്ടായില്ലെന്ന് ഫൈസല്‍ പറഞ്ഞു.  ഇര്‍ഫാന്റെ ബേസ് സ്റ്റേഷൻ കൂടിയായ ബംഗളൂരുവില്‍ രണ്ട് ദിവസം താമസിച്ച ശേഷമാണ് നാട്ടിലേക്ക് മടങ്ങിയത്. തലശേരിയില്‍ നിന്ന് കച്ചവടം ചെയ്യാനായി 60 വര്‍ഷങ്ങള്‍ക്ക് മുമ്പാണ് മൊയ്തു കോട്ടയം നഗരത്തിലെത്തിയത്. നഗരത്തില്‍ ഗുഡ്‍വില്‍, മെട്രോ എന്നീ രണ്ട് ഫൂട്‍ വേർ സ്ഥാപനങ്ങളുണ്ട്. ഫൈസലിന്റ മൂന്നു മക്കളില്‍ രണ്ടാമനാണ് ഇര്‍ഫാന്‍.