ദുബൈ: യു.എസ് ഡോളറിനെതിരെ ഇന്ത്യന്‍ രൂപ ദുര്‍ബലമായിക്കൊണ്ടിരിക്കുന്നതിനാല്‍ യു.എ.ഇയിലെ ഇന്ത്യന്‍ പ്രവാസികള്‍ അനുകൂലമായ കറന്‍സി സാഹചര്യങ്ങള്‍ പരമാവധി പ്രയോജനപ്പെടുത്തുന്ന സാഹചര്യം കൂടിയായിരുന്നു ഇന്നലെ.
ഈ ആഴ്ചയിലെ കണക്കനുസരിച്ച്, വിനിമയ നിരക്ക് 1 ദിര്‍ഹമിന് 23.96- 24.27 എന്ന നിലയില്‍ ഇന്ത്യന്‍ രൂപയെത്തി. സമീപ മാസങ്ങളില്‍ കണ്ട ഏറ്റവും മികച്ച നിരക്കുകളില്‍ ഒന്നാണിത്. കൂടുതല്‍ ഇന്ത്യന്‍ പ്രവാസികളെ നാട്ടിലേക്ക് ഫണ്ട് അയക്കാന്‍ ഈ സാഹചര്യം പ്രോത്സാഹിപ്പിക്കുന്നു.

ഈയാഴ്ച മുതല്‍ നിരവധി റെമിറ്റന്‍സ് പ്ലാറ്റ്‌ഫോമുകള്‍ യു.എ.ഇ ദിര്‍ഹം ഇന്ത്യന്‍ രൂപയിലേക്ക് പരിവര്‍ത്തനം ചെയ്യുന്നതിന് മത്സരാധിഷ്ഠിത വിനിമയ നിരക്കുകള്‍ വാഗ്ദാനം ചെയ്യുന്നു. ചിലത് ഒരു ദിര്‍ഹമിന് 24 രൂപ നല്‍കുന്നു.
ലുലു എക്‌സ്‌ചേഞ്ച്, അല്‍ അന്‍സാരി എക്‌സ്‌ചേഞ്ച്, ജോയ് ആലുക്കാസ് എക്‌സ്‌ചേഞ്ച് തുടങ്ങിയവയുടെ ആപ്പുകള്‍ 1 ദിര്‍ഹമിന് 23.91 എന്ന നിരക്കില്‍ വിനിമയം നല്‍കി.

ഇ&മണി ആപ്പ് 1 ദിര്‍ഹമിന് 23.97 എന്ന നിലക്കായിരുന്നു ഇന്നലെ വാഗ്ദാനം ചെയ്തത്. ജി.സി.സി എക്‌സ്‌ചേഞ്ച് ആപ്പ് 1 ദിര്‍ഹമിന് 23.96 എന്ന നിരക്ക് നല്‍കി.

റെമിറ്റ്‌ലി അവരുടെ വെബ്‌സൈറ്റില്‍ പുതിയ ഉപയോക്താക്കള്‍ക്ക് 1 ദിര്‍ഹമിന് 24.27 എന്ന പ്രമോഷണല്‍ നിരക്ക് വാഗ്ദാനം ചെയ്തു. ലഭ്യമായ ഏറ്റവും ഉയര്‍ന്ന നിരക്കുകളില്‍ ഒന്നാണിതെന്നും പ്രമുഖ ദേശീയ മാധ്യമ റിപ്പോര്‍ട്ടില്‍ പറഞ്ഞു.

വെസ്റ്റേണ്‍ യൂണിയന്‍ 1 ദിര്‍ഹമിന് 23.99 രൂപ വാഗ്ദാനം ചെയ്തു. ഹബ്ബേയുടെ ലൈവ് നിരക്ക് ഏകദേശം 1 ദിര്‍ഹമിന് 23.97 ആയിരുന്നു. വിനിമയ നിരക്കുകള്‍ ഇടയ്ക്കിടെ ചാഞ്ചാടാമെന്നും, കൈമാറ്റം ചെയ്യപ്പെടുന്ന തുക, പേയ്‌മെന്റ് രീതി, അനുബന്ധ ഫീസ് എന്നിവയെ അടിസ്ഥാനമാക്കി വ്യത്യാസപ്പെടാമെന്നും ഇക്കാര്യം ശ്രദ്ധിക്കണമെന്നും ഉപയോക്താക്കളോട് വിനിമയ സ്ഥാപനങ്ങള്‍ ഉണര്‍ത്തി.

ശക്തമായ യു.എസ് ഡോളറിലെ വിശാലമായ ആഗോള മുന്നേറ്റമാണ് ഇന്ത്യന്‍ രൂപ ഉള്‍പ്പെടെ ഒന്നിലധികം കറന്‍സികളെ ബാധിച്ചതെന്ന് റിപ്പോര്‍ട്ടില്‍ ചൂണ്ടിക്കാട്ടി. ഇന്ത്യന്‍ സാധനങ്ങള്‍ക്ക് യു.എസ് ഈയിടെ ഏര്‍പ്പെടുത്തിയ 50% വരെയുള്ള താരിഫുകള്‍,

റഷ്യയില്‍ നിന്നുള്ള എണ്ണ ഇറക്കുമതിയുമായി ബന്ധപ്പെട്ട വ്യാപാര നിയന്ത്രണങ്ങള്‍ അടക്കമുള്ള കാര്യങ്ങള്‍ നിക്ഷേപകരുടെ വികാരത്തെ വ്രണപ്പെടുത്തുകയും, കറന്‍സി വിനിമയത്തില്‍ വിപരീത ഫലം നല്‍കുകയും ചെയ്തു.
അസ്ഥിരത പരിമിതപ്പെടുത്താന്‍ ഇന്ത്യയുടെ കേന്ദ്ര ബാങ്ക് (ആര്‍.ബി.ഐ) സര്‍ക്കാര്‍ നിയന്ത്രണത്തിലുള്ള ബാങ്കുകള്‍ വഴി ഇടപെട്ടത് പക്ഷേ, മൊത്തത്തിലുള്ള താഴ്‌നില പ്രവണത മാറ്റിയില്ല.

കറന്‍സിയുടെ ബലഹീനത ധനമന്ത്രി അംഗീകരിച്ചെങ്കിലും, പല ആഗോള കറന്‍സികളും ഡോളറില്‍ നിന്ന് സമാനമായ സമ്മര്‍ദം നേരിടുന്നുണ്ടെന്ന് ചൂണ്ടിക്കാട്ടി. 'രൂപയ്‌ക്കെതിരായ ഡോളറിന്റെ കാര്യത്തില്‍ മാത്രമല്ല ഇത് സംഭവിക്കുന്നത്' അവര്‍ പറഞ്ഞു. സര്‍ക്കാര്‍ വിനിമയ നിരക്കുകള്‍ സൂക്ഷ്മമായി നിരീക്ഷിക്കുന്നുണ്ടെന്നും അവര്‍ കൂട്ടിച്ചേര്‍ത്തു.
ആഗോള പണ സാഹചര്യങ്ങളും വ്യാപാര സംബന്ധിയായ വെല്ലുവിളികളും കാരണം രൂപയുടെ മൂല്യം ഹ്രസ്വ കാലത്തേക്ക് സമ്മര്‍ദത്തില്‍ തുടരാന്‍ സാധ്യതയുണ്ട്. ഓരോ ദിര്‍ഹമും കൂടുതല്‍ രൂപയായി മാറുന്നതിനാല്‍, ഇന്ത്യന്‍ പ്രവാസികള്‍ക്ക് പണമയയ്ക്കാന്‍ ഇത് നല്ല സമയമായി ഭവിയ്ക്കുന്നു.

യു.എസ് ഫെഡറല്‍ റിസര്‍വ് പലിശ നിരക്കുകള്‍ കുറയ്ക്കാന്‍ തുടങ്ങിയാലോ, അല്ലെങ്കില്‍ ഭൗമ രാഷ്ട്രീയ സംഘര്‍ഷങ്ങള്‍ ലഘൂകരിക്കപ്പെട്ടാലോ കറന്‍സി പ്രവണതകള്‍ മാറിയേക്കാം.

ഏതായാലും, 1 ദിര്‍ഹം ഏകദേശം 24 രൂപയ്ക്ക് അടുത്തായതിനാല്‍, യു.എ.ഇ പ്രവാസികള്‍ അവരുടെ പണമയയ്ക്കലില്‍ ഉയര്‍ന്ന വരുമാനം കാണുന്ന സന്ദര്‍ഭമാണിത്. ഈയവസ്ഥ എത്ര കാലം നിലനില്‍ക്കുമെന്ന് ഉറപ്പില്ലെങ്കിലും, നിലവിലെ ട്രെന്‍ഡുകള്‍ സൂചിപ്പിക്കുന്നത് രൂപ സമീപ ഭാവിയില്‍ ദുര്‍ബലമായി തുടരുമെന്നാണ്. എങ്കിലും, ആഗോള വ്യാപാര നയത്തിലോ കേന്ദ്ര ബാങ്ക് നടപടികളിലോ ഉണ്ടാകാവുന്ന മാറ്റങ്ങള്‍ വര്‍ഷാവസാന നിരക്കുകളെ ബാധിച്ചേക്കാം എന്നും റിപ്പോര്‍ട്ടില്‍ വിശദീകരിച്ചു.

ഇന്ന് രാവിലത്തെ ഇന്ത്യന്‍ രൂപ - ഗള്‍ഫ് കറന്‍സി വിനിമയം

ഇന്ത്യന്‍ രൂപ Vs യുഎഇ ദിര്‍ഹം : 24.03
ഇന്ത്യന്‍ രൂപ Vs സൗദി റിയാല്‍ : 23.50
ഇന്ത്യന്‍ രൂപ Vs ഖത്തര്‍ റിയാല്‍: 24.22 
ഇന്ത്യന്‍ രൂപ Vs ഒമാന്‍ റിയാല്‍ : 229.31
ഇന്ത്യന്‍ രൂപ Vs ബഹ്‌റൈന്‍ ദിനാര്‍ : 233.88
ഇന്ത്യന്‍ രൂപ Vs കുവൈത്ത് ദിനാര്‍ : 288.66

Indian expatriates in the UAE were making the most of favorable currency conditions as the Indian rupee continue to weaken against the US dollar.