ന്യൂഡല്‍ഹി: നേപ്പാളിലെ ജെന്‍ സി പ്രക്ഷോഭത്തെ സോഷ്യല്‍ മീഡിയ നിരോധനത്തിനെതിരെയുള്ള അപക്വമായ സമരമായി ചുരുക്കിക്കാണിക്കുന്ന ഇന്ത്യന്‍ മാധ്യമ നിലപാടിനെതിരെ രൂക്ഷവിമര്‍ശനവുമായി ധ്രുവ് റാഠി. അഴിമതിക്കും ദുര്‍ഭരണത്തിനുമെതിരായ പുതുതലമുറ പ്രക്ഷോഭത്തെ ഇത്തരത്തില്‍ തെറ്റിദ്ധരിപ്പിക്കുന്ന രീതിയില്‍ ഇന്ത്യയിലെ ഗോഡി മീഡിയകള്‍ എന്തിനാണ് റിപ്പോര്‍ട്ട് ചെയ്യുന്നതെന്ന് അദ്ദേഹം ചോദിച്ചു. 

പ്രധാനമായും അഴിമതിക്കും ദുര്‍ഭരണത്തിനും എതിരെയുള്ളതാണ് നേപ്പാളിലെ പ്രതിഷേധം.  സോഷ്യല്‍ മീഡിയ നിരോധനം അതിന്റെ ചെറിയ ഭാഗം മാത്രമാണ്. യാഥാര്‍ത്ഥ്യം കാണിക്കാതെ ഇന്ത്യന്‍ ഗോഡി മീഡിയ ആളുകളെ തെറ്റിദ്ധരിപ്പിക്കുന്നതിന്റെ കാരണം എന്താണ്? -അദ്ദേഹം എക്‌സില്‍ കുറിച്ചു. 

Nepal protest is primarily against corruption and misgovernance. Social media ban was just the tipping point.

Why is Indian Godi media misleading people by not showing the reality?

— Dhruv Rathee (@dhruv_rathee) September 9, 2025

പ്രക്ഷോഭ വാര്‍ത്തകള്‍ ഇന്ത്യന്‍ മാധ്യമങ്ങള്‍ കൈകാര്യം ചെയ്ത രീതിയെ വസ്തുതാന്വേഷണ മാധ്യമപ്രവര്‍ത്തകനായ മുഹമ്മദ് സുബൈറും വിമര്‍ശിച്ചു. 'നേപ്പാളില്‍ ജെന്‍ സി പ്രക്ഷോഭം സോഷ്യല്‍ മീഡിയ നിരോധനത്തിന് വേണ്ടിയായിരുന്നുവെന്ന് ഇന്ത്യന്‍ വാര്‍ത്താ ചാനലുകള്‍ അവകാശപ്പെടുന്നു. ഇത് ശരിയല്ല. ദീര്‍ഘകാലമായി നിലനില്‍ക്കുന്ന അഴിമതി, സ്വേച്ഛാധിപത്യം, അടിച്ചമര്‍ത്തല്‍ എന്നിവയ്ക്കെതിരെയാണ്. സോഷ്യല്‍ മീഡിയ നിരോധനം പ്രക്ഷോഭം പൊട്ടിപ്പുറപ്പെടാനുള്ള നിരവധി കാരണങ്ങളില്‍ ഒന്ന് മാത്രമായിരുന്നു' -അദ്ദേഹം എക്‌സില്‍ കുറിച്ചു. 

Indian News channels are claiming that the protest by GenZ in Nepal was for social media ban. This is not true, It’s actually against the long standing corruption, Tyranny, oppression and autocratic leadership. Social Media ban was just one of the many stimulus. pic.twitter.com/GaSj2QtpLU

— Mohammed Zubair (@zoo_bear) September 9, 2025

26 സമൂഹ മാധ്യമ പ്ലാറ്റ്ഫോമുകള്‍ രാജ്യത്ത് നിരോധിച്ചതിനെതിരേയുള്ള ജന്‍ സി പ്രതിഷേധം പിന്നീട് അഴിമതി വിരുദ്ധ പ്രക്ഷോഭമായി മാറുകയായിരുന്നു. തിങ്കളാഴ്ച പാര്‍ലമെന്റിനു മുന്നില്‍ പ്രതിഷേധിച്ചവര്‍ക്കു നേരെ പൊലിസ് വെടിവയ്പു നടത്തുകയും 19 പേര്‍ കൊല്ലപ്പെടുകയും ചെയ്തതോടെ പ്രക്ഷോഭത്തിന്റെ ഗതിമാറി. പ്രക്ഷോഭം അടിച്ചൊതുക്കാനായിരുന്നു സര്‍ക്കാര്‍ നീക്കം. പൊലിസിനെയും സൈന്യത്തെയും രംഗത്തിറക്കുകയും ചെയ്തു. പ്രസിഡന്റിന്റെ വസതിക്കു ഉള്‍പ്പെടെ സൈന്യത്തിന്റെ കാവലേര്‍പ്പെടുത്തി. സമൂഹ മാധ്യമങ്ങള്‍ക്ക് സര്‍ക്കാര്‍ ഏര്‍പ്പെടുത്തിയ വിലക്ക് പിന്‍വലിച്ചെങ്കിലും പ്രതിഷേധം കെട്ടടങ്ങിയില്ല. 

യുവാക്കളെ വെടിവച്ചു കൊന്നതിനു പിന്നാലെ കൂടുതല്‍ പേര്‍ തെരുവിലിറങ്ങി. സര്‍ക്കാര്‍ സ്ഥാപനങ്ങള്‍ ആക്രമിക്കപ്പെട്ടു. പൊലിസിനും സൈന്യത്തിനും നേരെ ആക്രമണമുണ്ടായി. കാഠ്മണ്ഡു ജില്ലയില്‍ കര്‍ഫ്യൂ ഉള്‍പ്പെടെ ഏര്‍പ്പെടുത്തിയിരുന്നെങ്കിലും പ്രതിഷേധം തടയാനായില്ല. ജനജീവിതം സ്തംഭിച്ചു. ത്രിഭൂവന്‍ അടക്കമുള്ള വിമാനത്താവളങ്ങള്‍ അടച്ചു. രാജ്യത്തിനകത്തേക്കും പുറത്തേക്കുമുള്ള വിമാന സര്‍വിസുകള്‍ പൂര്‍ണമായി അടച്ചു. സമരക്കാര്‍ പാര്‍ലമെന്റിനും സുപ്രിംകോടതി കെട്ടിടത്തിനും തീയിട്ടു. 

ALSO READ: ഇന്ത്യയുമായി വ്യാപാര ചര്‍ച്ചകള്‍ തുടരും, 'അടുത്ത സുഹൃത്ത്' മോദി ചര്‍ച്ചക്ക് താല്‍പര്യം പ്രകടിപ്പിച്ചെന്നും ട്രംപ്; തീരുവ യുദ്ധത്തില്‍ അയവ്?

 പ്രതിഷേധങ്ങളെ തുടര്‍ന്ന് നേപ്പാള്‍ പ്രധാനമന്ത്രി കെ.പി ശര്‍മ ഒലി രാജിവച്ചു. രാജിവച്ച പ്രധാനമന്ത്രി ശര്‍മ ഒലിയെ സൈന്യം സുരക്ഷിത മേഖലയിലേക്ക് മാറ്റിയിട്ടുണ്ടെന്നാണ് സൂചന.  ശര്‍മ ഒലി രാജിവെച്ച് സ്ഥലംവിട്ടതോടെ പകരം 35കാരനായ ബാലെന്‍ എന്ന ബാലേന്ദ്ര ഷാ പ്രധാനമന്ത്രിയാകണമെന്നാണ് പ്രക്ഷോഭകര്‍ ആവശ്യപ്പെടുന്നത്. 'ജെന്‍ സി' പ്രക്ഷോഭത്തെ പിന്തുണച്ച ബാലെന്‍ നിലവില്‍ കാഠ്മണ്ഡു മേയറാണ്. റാപ്പര്‍ കൂടിയായ ഇദ്ദേഹം സംഗീതത്തിലൂടെ അഴിമതി, അസമത്വം തുടങ്ങിയ വിഷയങ്ങള്‍ ഉന്നയിച്ച വ്യക്തിയാണ്. 2022ല്‍ കാഠ്മണ്ഡു മേയര്‍ തെരഞ്ഞെടുപ്പില്‍ സ്വതന്ത്ര സ്ഥാനാര്‍ഥിയായി മത്സരിക്കുകയും പ്രമുഖ പാര്‍ട്ടികളുടെ സ്ഥാനാര്‍ഥികളെ പരാജയപ്പെടുത്തി 61,000ത്തിലേറെ വോട്ടുകള്‍ക്ക് വിജയിച്ച് താരമാവുകയും ചെയ്തു. യുവജന മുന്നേറ്റത്തിലേക്കുള്ള സൂചനയായിരുന്നു സ്വതന്ത്രനായി മേയര്‍ സ്ഥാനത്തേക്കുള്ള അദ്ദേഹത്തിന്റെ ജയം. 

ALSO READ: നേപ്പാള്‍ മുന്‍ പ്രധാനമന്ത്രിയുടെ വീടിന് തീയിട്ട് പ്രക്ഷോഭകര്‍; ജലനാഥ് ഖനാലിന്റെ ഭാര്യ വെന്തുമരിച്ചു

ALSO READ: നേപ്പാളിൽ ജെൻ സി പ്രക്ഷോഭം ആളിപ്പടരുന്നു: പാർലമെന്റ് മന്ദിരത്തിന് പിന്നാലെ സുപ്രീം കോടതിക്കും തീയിട്ടു; ഇന്ത്യക്കാർക്ക് ജാഗ്രതാ നിർദേശം