ന്യൂഡല്‍ഹി: തീവ്ര ഹിന്ദുത്വവാദികള്‍ അവകാശവാദം ഉന്നയിക്കുന്ന നൂറ്റാണ്ടുകള്‍ പഴക്കമുള്ള പള്ളികളായ ഗ്യാന്‍വാപി, മഥുര ഈദ് ഗാഹ് മസ്ജിദ് എന്നിവ സംബന്ധിച്ച് ആര്‍.എസ്.എസുമായി ചര്‍ച്ച നടത്താന്‍ ജംഇയ്യത്തുല്‍ ഉലമായെ ഹിന്ദ് അധ്യക്ഷന്‍ മൗലാന മഹ്‌മൂദ് മദനി സന്നദ്ധത അറിയിച്ചെന്ന റിപ്പോര്‍ട്ട് സംഘടന തള്ളി. ആര്‍.എസ്.എസിനെക്കുറിച്ചുള്ള മൗലാനാ മഹ്‌മൂദ് മദനിയുടെ വാക്കുകള്‍ തെറ്റായി ഉദ്ധരിച്ചതാണെന്ന് ജംഇയ്യത്ത് വ്യക്തമാക്കി.
 
ആരാധനാലയങ്ങള്‍ക്കുമേലുള്ള തര്‍ക്കങ്ങളില്‍ ആര്‍.എസ്.എസുമായി ചര്‍ച്ചയാകാമെന്ന വിധത്തില്‍ മദനി പ്രസ്താവ നടത്തിയെന്ന റിപ്പോര്‍ട്ടുകള്‍ പൂര്‍ണമായും അടിസ്ഥാനരഹിതവും തെറ്റാണെന്നും ജംഇയ്യത്ത് പ്രസ്താവനയില്‍ അറിയിച്ചു. മദനി തന്റെ അഭിമുഖത്തില്‍ അത്തരമൊരു പ്രസ്താവന നടത്തുകയോ ഈ വിഷയവുമായി ബന്ധപ്പെട്ട ചോദ്യങ്ങളോ പ്രതികരണങ്ങളോ ഉന്നയിക്കുകയോ ചെയ്തിട്ടില്ലെന്നും സംഘടന പ്രസ്താവിച്ചു. 

ALSO READ: 'എന്റെ മകന്റെ ഒരു രോമത്തിനെങ്കിലും എന്തെങ്കിലും സംഭവിച്ചാല്‍ മിസ്റ്റര്‍ നെതന്യാഹൂ..ജീവിതത്തില്‍ സമാധാനം എന്തെന്ന് നിങ്ങള്‍ അറിയില്ല' ഗസ്സ സിറ്റി ആക്രമണത്തില്‍ പ്രധാനമന്ത്രിക്കെതിരെ പ്രതിഷേധക്കടലായി ഇസ്‌റാഈല്‍ തെരുവുകള്‍
തര്‍ക്കങ്ങള്‍ സംബന്ധിച്ച് അടുത്തിടെ ആര്‍.എസ്.എസ് മേധാവി നടത്തിയ പ്രസ്താവനകളെ സ്വാഗതംചെയ്ത മദനി, എല്ലാത്തരം ചര്‍ച്ചകളെയും തങ്ങള്‍ പിന്തുണയ്ക്കുമെന്നായിരുന്നു വാര്‍ത്താ ഏജന്‍സി എ.ഐ.എന്‍യുമായുള്ള അഭിമുഖത്തില്‍ പറഞ്ഞത്. 

അഭിപ്രായവ്യത്യാസങ്ങള്‍ ഉണ്ടെങ്കിലും അവ കുറയ്ക്കുന്നതിനുള്ള ശ്രമങ്ങള്‍ നടത്തണമെന്നാണ് ജംഇയ്യത്തിന്റെ നിലപാടെന്നും ഇക്കാര്യത്തില്‍ സംഘടന പ്രമേയം പാസാക്കിയിട്ടുണ്ടെന്നും അഭിമുഖത്തില്‍ അദ്ദേഹം പറഞ്ഞിരുന്നു. നിരവധി അഭിപ്രായ വ്യത്യാസങ്ങളുണ്ട്. അവ നമ്മള്‍ കുറയ്ക്കേണ്ടതുണ്ട്. മുസ്‌ലിം സമൂഹത്തിലേക്ക് കടന്നുവരാനുള്ള മോഹന്‍ ഭാഗവതിന്റെ ശ്രമങ്ങള്‍ പ്രശംസിക്കപ്പെടുകയും അഭിനന്ദിക്കപ്പെടുകയും വേണമെന്നും  അദ്ദേഹം പറഞ്ഞിരുന്നു.

എന്നാല്‍ അഭിമുഖത്തിലെ ചില പരാമര്‍ശങ്ങള്‍ തെറ്റായി വ്യാഖ്യാനിക്കുകയായിരുന്നുവെന്ന് ജംഇയ്യത്ത് അറിയിച്ചു. അഭിമുഖത്തില്‍ ഉന്നയിച്ചത് മുസ്‌ലിംകളോടുള്ള ആര്‍.എസ്.എസിന്റെ ഇടപെടലിനെക്കുറിച്ചും അക്കാര്യത്തിലെ മദനിയുടെ കാഴ്ചപ്പാടുകളുമായി ബന്ധപ്പെട്ടും ആയിരുന്നു. 
പരസ്പര ചര്‍ച്ചകളെ എല്ലാ പ്രശ്നങ്ങള്‍ക്കുമുള്ള പരിഹാരമായി വിശേഷിപ്പിക്കുകയും അഭിപ്രായവ്യത്യാസങ്ങള്‍, ശത്രുത, വിദ്വേഷം എന്നിവ മാറ്റിവെക്കാനും പരസ്പരം ആലിംഗനം ചെയ്യാനും ആര്‍.എസ്.എസ് മേധാവിയെയും അനുയായികളെയും ഊഷ്മളമായി ക്ഷണിക്കുകയും ചെയ്യുന്നുവെന്നാണ് ജംഇയ്യത്ത് 2023ലെ സമ്മേളനത്തില്‍ അവതരിപ്പിച്ച പ്രമേയത്തില്‍ പറയുന്നത്. ഗ്യാന്‍വാപി, മഥുര പള്ളികളെ സംബന്ധിച്ച് ബന്ധപ്പെട്ട നിയമപരമായ കാര്യങ്ങള്‍ കക്ഷികളാണ് തീരുമാനിക്കേണ്ടതെന്നാണ് മദനി അഭിമുഖത്തില്‍ പറഞ്ഞതെന്നും സംഘടന വ്യക്തമാക്കി.