കൽപറ്റ: ജനവാസ മേഖലയിലിറങ്ങിയ കടുവയും പുലിയും തമ്മിൽ ഏറ്റുമുട്ടി. ഏറ്റുമുട്ടലിൽ കടുവയ്ക്കും പുലിയ്ക്കും സാരമായ പരുക്കുകൾ പറ്റിയതായാണ് സൂചന. വയനാട് പെരുന്തട്ടയിലാണ് മൃഗങ്ങളുടെ അപൂർവ ഏറ്റുമുട്ടൽ നടന്നത്. തോട്ടം മേഖലയോടു ചേർന്നുള്ള റോഡിന്റെ വശത്താണ് വന്യമൃഗങ്ങൾ തമ്മിൽ 'പോരാട്ടം' നടന്നത്. 

തിങ്കളാഴ്ച രാത്രി 10 മണിയോടെയാണു വയനാട് പെരുന്തട്ടയിൽ സംഭവം ഉണ്ടായത്. നാട്ടുകാർ സംഭവം അറിയിച്ചതിനെ തുടർന്ന് വനംവകുപ്പ് ഉദ്യോഗസ്ഥർ സ്ഥലത്തെത്തി പരിശോധന നടത്തി. പുലിയ്ക്കും കടുവയ്ക്കും പരുക്കുണ്ടെന്നു വനപാലകർ സ്ഥിരീകരിച്ചു. ഏറ്റുമുട്ടൽ നടന്ന മേഖലയിൽനിന്നു കടുവയുടെ നഖവും പല്ലും വനപാലകർക്ക് ലഭിച്ചു. പ്രദേശത്ത് വനംവകുപ്പ് നിരീക്ഷണം എർപ്പെടുത്തി. 

മനുഷ്യരെ ഉൾപ്പെടെ ആക്രമിക്കാൻ സാധ്യതയുള്ള രണ്ട് വന്യമൃഗങ്ങൾ തമ്മിൽ ഏറ്റുമുട്ടൽ ഉണ്ടായതോടെ നാട്ടുകാർ ഭീതിയിലാണ്. ജനവാസ മേഖലയോട് ചേർന്നുള്ള പ്രദേശത്ത് ഇരു മൃഗങ്ങളും ഒരുമിച്ച് എത്തിയതാണ് ജനങ്ങളെ കൂടുതൽ ഭീതിയിലാഴ്ത്തുന്നത്.

ആറു മാസം മുൻപും ഈ പ്രദേശത്ത് കടുവയുടെ സാന്നിധ്യം കണ്ടെത്തിയിരുന്നു. പ്രദേശത്തെ വീടുകളിലെ പശുക്കളെ കടുവ പിടികൂടിയതോടെ നാട്ടുകാർ പ്രതിഷേധിച്ചിരുന്നു. എന്നാൽ ഇതിൽ നിന്ന് മാറി കടുവയും പുലിയും ഒരുമിച്ചെത്തിയ സാഹചര്യത്തിൽ എന്തുചെയ്യണമെന്ന് അറിയാത്ത അവസ്ഥയിലാണ് നാട്ടുകാർ.