ദുബൈ: ദുബൈക്കെതിരായ ബ്രിട്ടീഷ് പോഡ്‌കാസ്റ്റർ ക്രിസ് വില്യംസന്റെ പരാമർശങ്ങൾക്കെതിരെ ഡിഎംസിസി എക്സിക്യൂട്ടീവ് ചെയർമാനും സിഇഒയുമായ അഹമ്മദ് ബിൻ സുലൈം. ദുബൈ ആത്മാവില്ലാത്ത സ്ഥലമാണെന്നും ഗ്രഹത്തിലെ ഏറ്റവും ഭയാനകമായ സ്ഥലങ്ങളിൽ ഒന്നാണെന്നും വില്യംസൺ വിശേഷിപ്പിച്ചിരുന്നു. ഇത് വലിയ വിവാദത്തിന് വഴി തെളിച്ചിരുന്നു. ദശലക്ഷക്കണക്കിന് പ്രവാസികളേയും ബഹു സാംസ്കാരിക മേഖലകളിൽ വിജയം നേടിയ ദുബൈയെയും അവഹേളിക്കുന്നതാണ് വില്യംസണിന്റെ പരാമർശങ്ങളെന്ന് അഹമ്മദ് ബിൻ സുലൈം വ്യക്തമാക്കി. 

ALSO READ: വില കുത്തനെ ഉയര്‍ന്നിട്ടും യുഎഇയില്‍ സ്വര്‍ണ വില്‍പ്പന തകൃതി; കാരണം ഇത് 

മുൻ റിയാലിറ്റി ടിവി താരവും പോഡ്‌കാസ്റ്ററുമായ വില്യംസൺ, യുഎസ് ഫിറ്റ്‌നസ് വിദഗ്ധനായ ഡോ. മൈക്ക് ഇസ്രായെലുമായുള്ള സംഭാഷണത്തിനിടെയാണ് ദുബൈയെ അടിമവേലയിൽ നിർമിച്ചതെന്ന് ആക്ഷേപിച്ചത്. വില്യംസൺ വിവരമില്ലാത്തവനെന്ന് അഹമ്മദ് ബിൻ സുലൈം തിരിച്ചടിച്ചു. 2026-ലെ സെൽഫ് ഡിസ്കവറി വേൾഡ് ടൂറിൽ ദുബൈയെ ഉൾപ്പെടുത്തിയതാണ് ക്രിസ് വില്യംസണെ ചൊടിപ്പിച്ചതെന്നാണ് സൂചന.

"ആർക്കും അവർ സന്ദർശിക്കുന്ന സ്ഥലങ്ങളെക്കുറിച്ച് അഭിപ്രായം പറയാം. ദുബൈ തനിക്ക് ഉപരിപ്ലവമാണെന്ന് വില്യംസന് പറയാമായിരുന്നു. പക്ഷേ, 'ഗ്രഹത്തിലെ ഏറ്റവും ഭയാനകമായ സ്ഥലം' എന്ന് വിളിക്കുന്നതും 'അടിമവേല' ആരോപിക്കുന്നതും ദുബൈയുടെ വിജയവും ഇവിടെ താമസിക്കുന്ന ദശലക്ഷക്കണക്കിന് പ്രവാസികളുടെ അനുഭവവും അവമതിക്കുന്നതിന് സമാനമാണ്." പ്രമുഖ യുഎഇ മാധ്യമമായ ഖലീജ് ടൈംസിനോട് സംസാരിക്കവേ അഹമ്മദ് ബിൻ സുലൈം വിശദീകരിച്ചു. 

അസാധാരണമായ ആരോപണങ്ങൾക്ക് തെളിവ് വേണം. ക്രിസ്, ദുബൈയിലേക്ക് വരട്ടെ, ഇവിടത്തെ ജീവിതം കണ്ടിട്ട് ഇപ്പോഴും ഇതേ അഭിപ്രായമാണോ എന്ന് പറയട്ടെ!, അദ്ദേഹം പറഞ്ഞു. 

"ക്ലിക്ക്ബെയ്റ്റ് വേലകൾ ഇവിടെ നടക്കില്ല"

"ഉദ്ദേശ്യം എന്തായാലും, ഫലം ക്ലിക്ക്ബെയ്റ്റാണ്. അമിതവാദങ്ങൾ സൂക്ഷ്മതയേക്കാൾ ശ്രദ്ധ നേടും. പക്ഷേ, ദുബൈലേക്ക് വന്ന് താമസക്കാരെ കണ്ട് യാഥാർത്ഥ്യം മനസിലാക്കണം. ദുബൈ നിനക്ക് പറ്റിയില്ലെങ്കിൽ, ഓകെ, പക്ഷേ ഇവിടെ ജീവിക്കുന്നവരുടെ അനുഭവം നിന്റെ കാഴ്ചപ്പാടല്ല." വില്യംസന്റെ പരാമർശങ്ങൾ ക്ലിക്ക്ബെയ്റ്റിന്റെ ഭാഗമാണോ എന്ന ചോദ്യത്തിന് അഹമ്മദ് ബിൻ സുലൈെം മറുപടി പറഞ്ഞു. 

ALSO READ: ദുബൈ മെട്രോയുടെ മൂന്നാമത്തെ റൂട്ട്: നിങ്ങൾ അറിയേണ്ടതെല്ലാം 

അടിമവേല ആരോപണത്തെയും അഹമ്മദ് ബിൻ സുലൈം തള്ളി. "ഇത് കാലഹരണപ്പെട്ടതും വസ്തുതാപരമായി തെറ്റുമാണ്. ദുബൈ തൊഴിൽ പരിഷ്കാരങ്ങളും വേതന സംരക്ഷണ സംവിധാനങ്ങളും നടപ്പാക്കിയിട്ടുണ്ട്." അദ്ദേഹം ചൂണ്ടിക്കാട്ടി. 2025-ന്റെ ആദ്യ പകുതിയിൽ 9.88 ദശലക്ഷം സന്ദർശകരെയാണ് ദുബൈ സ്വാഗതം ചെയ്തത്. 2024-ൽ ദുബൈയിലെ ജനസംഖ്യ 169,000 വർധിച്ചു. 2018-ന് ശേഷമുള്ള ഏറ്റവും വലിയ വളർച്ചയാണിത്. 

"ആളുകൾ ദുബൈ വിടുന്നില്ല, കൂടുതൽ പേർ ഇവിടേക്ക് വരികയാണ് ചെയ്യുന്നത്," ബിൻ സുലൈം പറഞ്ഞു.

British podcaster Chris Williamson labeled Dubai as one of the "most horrible places on the planet," prompting a sharp rebuttal from DMCC CEO Ahmed Bin Sulayem. Discover how the official defended Dubai’s multicultural success and addressed the controversial remarks.