ദോഹ: ദോഹയിലെ ഹമാസ് നേതാക്കൾക്കെതിരായ ആക്രമണത്തിലൂടെ ഗസ്സയിലെ വെടിനിർത്തൽ ശ്രമങ്ങൾ തടസ്സപ്പെടുത്താനാണ് ഇസ്റാഈൽ ശ്രമിച്ചതെന്ന് ഖത്തർ അമീർ ഷെയ്ഖ് തമീം ബിൻ ഹമദ് അൽതാനി. ഇന്ന് നടന്ന അടിയന്തര അറബ്-ഇസ് ലാമിക ഉച്ചകോടിക്കിടെയായിരുന്നു അദ്ദേഹത്തിന്റെ പ്രതികരണം. ഗസ്സയിലെ ആക്രമണങ്ങളും മാനുഷിക പ്രതിസന്ധിയും അവസാനിപ്പിക്കാൻ ഇസ്റാഈലിന് മേൽ സമ്മർദ്ദം ചെലുത്താൻ ഖത്തർ സംയുക്ത അറബ് ലീഗും ഓർഗനൈസേഷൻ ഓഫ് ഇസ്ലാമിക് കോ-ഓപ്പറേഷനും (OIC) വിളിച്ചുചേർത്ത ഉച്ചകോടിയിൽ വിവിധ രാജ്യങ്ങളുടെ പ്രതിനിധി സംഘം ദോഹയിലെത്തിയിരുന്നു.

ALSO READ: അടിയന്തര അറബ്-ഇസ്‌ലാമിക ഉച്ചകോടി: ഇസ്റാഈൽ ആക്രമണത്തിനെതിരായ നിർണായക തീരുമാനങ്ങൾക്ക് കാതോർത്ത് ലോകം; അറബ് നേതാക്കൾ ദോഹയിൽ 

യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനെ പ്രതിനിധീകരിച്ച്, വൈസ് പ്രസിഡന്റും ഉപപ്രധാനമന്ത്രിയും പ്രസിഡൻഷ്യൽ കോടതി ചെയർമാനുമായ ഷെയ്ഖ് മൻസൂർ ബിൻ സായിദ് അൽ നഹ്യാൻ ദോഹയിലെത്തിയിരുന്നു. സംഘത്തിൽ ഷെയ്ഖ് അബ്ദുല്ല ബിൻ സായിദ് അൽ നഹ്യാൻ, പ്രതിരോധ സഹമന്ത്രി മുഹമ്മദ് ബിൻ മുബാറക് ബിൻ ഫദേൽ അൽ മസ്രൂയി, സഹമന്ത്രി ഷെയ്ഖ് ഷഖ്ബൂത്ത് ബിൻ നഹ്യാൻ അൽ നഹ്യാൻ, സഹമന്ത്രി ഖലീഫ ഷഹീൻ അൽ മാരാർ, സഹമന്ത്രി ലാന സാക്കി നുസൈബെ, സഹമന്ത്രി സയീദ് മുബാറക് അൽ ഹജേരി എന്നിവരും ഉണ്ട്.

കഴിഞ്ഞ ആഴ്ച ദോഹയിൽ ഇസ്റാഈൽ നടത്തിയ വ്യോമാക്രമണത്തിൽ നിന്ന് ഹമാസ് നേതാക്കൾ രക്ഷപ്പെട്ടതായി ഹമാസ് അവകാശപ്പെട്ടിരുന്നു. ആക്രമണത്തിൽ ആറ് പേർ കൊല്ലപ്പെട്ടിരുന്നു. ആക്രമണം അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ശാസനം ഉൾപ്പെടെ വിമർശനങ്ങൾക്ക് കാരണമായിരുന്നു. ഗസ്സയിലെ വെടിനിർത്തൽ ചർച്ചകളിൽ ഖത്തറായിരുന്നു പ്രധാന മധ്യസ്ഥൻ. 

"ചർച്ച നടത്തുന്ന സംഘത്തെ വധിക്കാൻ ഉത്സാഹത്തോടെയും വ്യവസ്ഥാപിതമായും പ്രവർത്തിക്കുന്നവർ, ചർച്ചകളെ പരാജയപ്പെടുത്താൻ ഉദ്ദേശിക്കുന്നു," അമീർ തന്റെ ആമുഖ പ്രസംഗത്തിൽ പറഞ്ഞു. "അവർക്ക് ചർച്ചകൾ യുദ്ധത്തിന്റെ ഒരു ഭാഗം മാത്രമാണ്." ഇസ്റാഈൽ പ്രധാനമന്ത്രി ബെഞ്ചമിൻ നെതന്യാഹു അറബ് മേഖലയെ തന്റെ സ്വാധീന മേഖലയാക്കി മാറ്റാനുള്ള പാഴ്ക്കിനാവ് കാണുകയാണെന്നും അമീർ ആരോപിച്ചു.

യുഎസ് പിന്തുണയും റൂബിയോയുടെ സന്ദർശനവും

ദോഹയിൽ യോഗം ആരംഭിക്കുമ്പോൾ, യുഎസ് സ്റ്റേറ്റ് സെക്രട്ടറി മാർക്കോ റൂബിയോ ഇസ്റാഈൽ സന്ദർശിക്കുകയായിരുന്നു. ചൊവ്വാഴ്ച റൂബിയോ ഖത്തറിലേക്ക് പോകുമെന്ന് യുഎസ് ഉദ്യോഗസ്ഥൻ അറിയിച്ചു. "ഇരട്ടത്താപ്പ് അവസാനിപ്പിക്കാനും ഇസ്റാഈലിനെ ശിക്ഷിക്കാനും സമയമായി," ഖത്തർ പ്രധാനമന്ത്രി ഷെയ്ഖ് മുഹമ്മദ് ബിൻ അബ്ദുൾറഹ്മാൻ അൽ താനി ഇന്നലെ നടന്ന യോഗത്തിൽ പറഞ്ഞു.

ALSO READ: 'ഹമാസിനെ എന്തു വേണമെങ്കിലും ചെയ്‌തോളൂ എന്നാല്‍ ഖത്തറിനോടുള്ള സമീപനത്തില്‍ സൂക്ഷ്മത പാലിക്കുക അവര്‍ നമ്മുക്ക് വേണ്ടപ്പെട്ടവര്‍' നെതന്യാഹുവിന് ട്രംപിന്റെ താക്കീത്  

യോ​ഗത്തിൽ സഊദി കിരീടാവകാശി മുഹമ്മദ് ബിൻ സൽമാൻ, ഇറാൻ പ്രസിഡന്റ് മസൂദ് പെസെഷ്കിയാൻ, ഇറാഖ് പ്രധാനമന്ത്രി മുഹമ്മദ് ഷിയ അൽ സുഡാനി, തുർക്കി പ്രസിഡന്റ് റജബ് തയ്യിബ് ഉർദുഗാൻ, ഫലസ്തീൻ പ്രസിഡന്റ് മഹ്മൂദ് അബ്ബാസ്, ജോർദാൻ രാജാവ് അബ്ദുല്ല രണ്ടാമൻ, പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് എന്നിവരും പങ്കെടുത്തു.

ഖത്തറിലെ ഇസ്റാഈൽ ആക്രമണത്തെക്കുറിച്ച് ഐക്യരാഷ്ട്രസഭ മനുഷ്യാവകാശ കൗൺസിൽ ചൊവ്വാഴ്ച അടിയന്തര ചർച്ച നടത്തുമെന്ന് അറിയിച്ചു. 

Qatar’s Amir Sheikh Tamim bin Hamad Al Thani accused Israel of targeting Doha to derail Gaza ceasefire negotiations during an emergency Arab-Islamic Summit. The summit, attended by Arab and Muslim leaders, focused on unified action to address Gaza’s war and humanitarian crisis.