ന്യൂഡൽഹി: ഇന്ത്യയിൽ ഭരണമാറ്റം വരുത്താൻ ചൈന ശ്രമിക്കുന്നുവെന്ന ഗുരുതര ആരോപണവുമായി ടിബറ്റൻ പ്രവാസി സർക്കാരിന്റെ മുൻ പ്രസിഡന്റ് ഡോ. ലോബ്സാങ് സങ്ഗേ. ഇന്ത്യയിലെ രാഷ്ട്രീയക്കാരെയും വിവിധ മേഖലകളിലെ പ്രമുഖരെയും സ്വാധീനിച്ച് ഭരണമാറ്റത്തിന് വഴിയൊരുക്കാൻ ഡൽഹിയിലെ ചൈനീസ് എംബസി ശ്രമിക്കുന്നുണ്ടെന്നാണ് അദ്ദേഹത്തിന്റെ വെളിപ്പെടുത്തൽ. എൻഡിടിവിക്ക് നൽകിയ അഭിമുഖത്തിലാണ് ഡോ. സങ്ഗേ ഈ ആരോപണങ്ങൾ ഉന്നയിച്ചത്.

"ഉന്നതരെ സ്വന്തം വരുതിയിൽ നിർത്തുക എന്നത് ചൈനയുടെ പുരാതന തന്ത്രമാണ്. അവർ രാഷ്ട്രീയ നേതാക്കളെയും, ബുദ്ധിജീവികളെയും, വ്യവസായികളെയും, മാധ്യമപ്രവർത്തകരെയും, ഇപ്പോൾ യൂട്യൂബർമാരെ വരെ വിലയ്ക്കെടുക്കുന്നു. ടിബറ്റ്, സിൻജിയാങ്, മംഗോളിയ എന്നിവിടങ്ങളിൽ ഈ രീതി അവർ വിജയകരമായി നടപ്പാക്കി. ഇന്ത്യയിലും ഇതേ തന്ത്രം പരീക്ഷിക്കുകയാണ്," അദ്ദേഹം വ്യക്തമാക്കി.

ഡൽഹിയിലെ ചൈനീസ് എംബസിയുടെ ദേശീയ ദിനാഘോഷങ്ങളിൽ പങ്കെടുക്കുന്നവരെ ശ്രദ്ധിക്കണമെന്ന് ഡോ. സങ്ഗേ ആവശ്യപ്പെട്ടു. "ആരാണ് അവിടെ പങ്കെടുക്കുന്നതെന്ന് പരിശോധിക്കുക. രാഷ്ട്രീയക്കാരും, വ്യവസായ പ്രമുഖരും, മറ്റു വ്യക്തികളും അവിടെ ഉണ്ടാകും. എല്ലാവരെയും വിലയ്ക്കെടുക്കുന്നില്ലെങ്കിലും, ചൈന ഈ ശ്രമം തുടർന്നുകൊണ്ടേയിരിക്കുന്നു," അദ്ദേഹം ചൂണ്ടിക്കാട്ടി.

അയൽരാജ്യങ്ങളിലെ ചൈനീസ് സ്വാധീനം

ഇന്ത്യയുടെ അയൽരാജ്യങ്ങളിൽ ചൈന നടത്തുന്ന രാഷ്ട്രീയ ഇടപെടലുകളും അദ്ദേഹം എടുത്തുപറഞ്ഞു. "നേപ്പാളിൽ ഒരു പാർട്ടി ചൈനയെ പരസ്യമായി പിന്തുണയ്ക്കുമ്പോൾ, മറ്റൊരു പാർട്ടി ഇന്ത്യയെ അനുകൂലിക്കുന്നു. ശ്രീലങ്ക, ബംഗ്ലാദേശ്, മാലദ്വീപ് എന്നിവിടങ്ങളിൽ ചൈന ഭരണവർഗത്തെ സ്വാധീനിച്ചിരിക്കുന്നു. പാകിസ്താനിൽ എല്ലാ പ്രധാന രാഷ്ട്രീയ പാർട്ടികളും ചൈനയെ പിന്തുണയ്ക്കുന്നു. ഇതാണ് അവരുടെ ഉന്നതരെ വരുതിയിലാക്കലിന്റെ തന്ത്രം," അദ്ദേഹം വിശദീകരിച്ചു.

ആഗോള തന്ത്രവും ഇന്ത്യയിലെ സ്വാധീനവും

ചൈനയുടെ തന്ത്രം ദക്ഷിണേഷ്യയ്ക്കപ്പുറം വ്യാപിക്കുന്നുവെന്നും ഡോ. സങ്ഗേ ചൂണ്ടിക്കാട്ടി. "യൂറോപ്പിൽ ചൈനയെ പുകഴ്ത്തി സംസാരിക്കുന്ന മന്ത്രിമാർ പിന്നീട് ചൈനീസ് കമ്പനികളിൽ ലക്ഷങ്ങളോ ഒരു ദശലക്ഷം ഡോളറോ വരെ ശമ്പളത്തിൽ ഡയറക്ടർമാരായി ജോലി നേടുന്നത് ഞാൻ കണ്ടിട്ടുണ്ട്. ഇങ്ങനെയാണ് ചൈന ആളുകളെ വിലയ്ക്കെടുക്കുന്നത്," അദ്ദേഹം പറഞ്ഞു.

ഇന്ത്യയിലെ രാഷ്ട്രീയ പാർട്ടികളോടും പ്രമുഖരോടും ജാഗ്രത പാലിക്കാൻ അദ്ദേഹം ആവശ്യപ്പെട്ടു. "ഭരണകക്ഷിയും പ്രതിപക്ഷവും, വ്യവസായികളും മാധ്യമപ്രവർത്തകരും ജാഗ്രതയോടെയിരിക്കണം. ചൈന തങ്ങളുടെ അജണ്ട നടപ്പാക്കാൻ ആരെയും വിലയ്ക്കെടുക്കും. ഇന്ത്യയെ ആഗോള ശക്തിയാകുന്നതിൽ നിന്ന് തടയുകയാണ് അവരുടെ ലക്ഷ്യം," അദ്ദേഹം മുന്നറിയിപ്പ് നൽകി.

സാമ്പത്തിക സ്വാധീനവും വ്യാപാര കമ്മിയും

ചൈനയുടെ സാമ്പത്തിക സ്വാധീനവും അദ്ദേഹം ചൂണ്ടിക്കാട്ടി. "ഇന്ത്യ ചൈനയിൽ നിന്ന് 11,300 കോടി ഡോളറിന്റെ സാധനങ്ങൾ വാങ്ങുന്നു, പക്ഷേ 1400 കോടി ഡോളറിന്റെ സാധനങ്ങൾ മാത്രമാണ് വിൽക്കുന്നത്. ഇത് 9900 കോടി ഡോളറിന്റെ വ്യാപാര കമ്മിയാണ്. ഇതിനർത്ഥം ഇന്ത്യയിൽ കുറഞ്ഞ ഫാക്‌ടറികളും, കുറഞ്ഞ ഉൽപ്പാദനവും, കുറഞ്ഞ തൊഴിലവസരങ്ങളുമാണ്. ചൈനയുമായുള്ള ഈ ഏകപക്ഷീയ വ്യാപാരം അപകടകരമാണ്," അദ്ദേഹം പറഞ്ഞു.

ജനാധിപത്യ മിഥ്യ

ചൈനയുമായുള്ള വ്യാപാരം അവരെ ജനാധിപത്യപരമാക്കുമെന്ന ഹെന്റി കിസിംഗറിന്റെ സിദ്ധാന്തത്തെ ഡോ. സങ്ഗേ വിമർശിച്ചു. "30 വർഷം പാശ്ചാത്യ ലോകം ഈ മിഥ്യയിൽ വിശ്വസിച്ച് ചൈനയിൽ നിക്ഷേപം നടത്തി. പക്ഷേ, ജനാധിപത്യപരമാകുന്നതിനു പകരം ചൈന കൂടുതൽ ശത്രുതാപരമായി. ഇന്ത്യ ഈ തെറ്റ് ആവർത്തിക്കരുത്. ചൈനയുമായി സഹകരിച്ച് ലാഭം ഉണ്ടാക്കാമെന്ന് കരുതുന്നവർക്ക് തെറ്റ് പറ്റുന്നു. ബീജിങിന്റെ തന്ത്രം ഉന്നതരെ സ്വാധീനിച്ച് കീഴ്പ്പെടുത്തലാണ്. ഇന്ത്യ വൈകും മുമ്പ് ജാഗ്രത പാലിക്കണം," അദ്ദേഹം മുന്നറിയിപ്പ് നൽകി.