കോതമംഗലം: വിധവകള്‍ക്ക് വീടൊരുക്കി വ്യത്യസ്ത ഓണാഘോഷവുമായി കോതമംഗലത്തെ ലെന്‍സ് ഫെഡ് അംഗങ്ങള്‍ നാടിന് മാതൃകയായി .ഒന്നര സെന്റ് സ്ഥലത്ത് പ്ലാസ്റ്റിക് ഷീറ്റ് മേഞ്ഞ് കുടില്‍ കഴിയുന്ന വിധവകളായ അമ്മയ്ക്കും മകള്‍ക്കും വീടൊരുക്കി ലൈസന്‍സ്ഡ് എഞ്ചിനീയേഴ്‌സ് ആന്റ് സുപ്പര്‍വൈസേഴ്‌സ് ഫെഡറേഷന്റെ(ലെന്‍സ് ഫെഡ്) ഈ വര്‍ഷത്തെ ഓണാഘോഷം.
വെയിലും മഴയും ഏറെ സഹിച്ച് അടച്ചുറപ്പില്ലാത്ത കൂരയില്‍ കഴിയുകയായിരുന്ന തൊണ്ണൂറിനടുത്ത് പ്രായമുള്ള ചേലാട് ഓണായിക്കര അന്നമ്മ കുര്യാക്കോസിനും മകള്‍ ഏല്യമ്മ (57) യ്ക്കുമാണ് വീടൊരുങ്ങുന്നത്.
നഗരസഭയില്‍ നിന്നും വീട് നിര്‍മ്മിക്കണമെങ്കില്‍ മൂന്നു സെന്റ് സ്ഥലം വേണമെന്ന നിബന്ധന തടസമായി നില്‍ക്കെ വാര്‍ഡ് കൗണ്‍സിലര്‍ ലിസി പോളിന്റെ നേതൃത്വത്തില്‍ പാതി പണി പൂര്‍ത്തിയാക്കിയ കെട്ടിടത്തിന്റെ നിര്‍മ്മാണ പ്രവര്‍ത്തനങ്ങള്‍ ലെന്‍സ് ഫെഡ് ഏറ്റെടുക്കുകയായിരുന്നു.
 നിര്‍മാണ പ്രവര്‍ത്തനം പൂര്‍ത്തികരിക്കാന്‍ പണം കണ്ടെത്തുന്നതിനായി ഈ വര്‍ഷത്തെ ഓണാഘോഷ പരിപാടികള്‍ മാറ്റി വയ്ക്കുകയായിരുന്നു. വീടിന്റെ കോണ്‍ക്രിറ്റിംഗ് ജോലികള്‍ക്ക് വാര്‍ഡ് കൗണ്‍സിലര്‍, ലെന്‍സ് ഫെസ്പ്രസിഡന്റ് ഒ.ജി.സോമന്‍ ,സെക്രട്രി ലാലു ജേക്കബ്, എന്‍.പി.അനില്‍ കുമാര്‍, എബിന്‍ അയ്യപ്പന്‍, വി.എം.ലിജിന്‍ എന്നിവര്‍ നേതൃത്വം നല്‍കി.