പാലക്കാട്: പാലക്കാട് പല്ലശ്ശന സ്വദേശി വിനോദിനിയുടെ (ഒന്‍പത്) വലതു കൈ മുറിച്ചു മാറ്റേണ്ടി വന്ന സംഭവത്തില്‍ പാലക്കാട് ജില്ലാ ആശുപത്രിയിലെ രണ്ട് ഡോക്ടര്‍മാര്‍ക്ക് സസ്‌പെന്‍ഷന്‍. ഡോക്ടര്‍ മുസ്തഫ, ഡോക്ടര്‍ സര്‍ഫറാസ് എന്നിവര്‍ക്കെതിരെയാണ് നടപടി എടുത്തത്. ചികിത്സാ പ്രോട്ടോക്കോള്‍ ലംഘിച്ചെന്നു കണ്ടെത്തിയതിന്റെ അടിസ്ഥാനത്തിലാണ് നടപടി എടുത്തിരിക്കുന്നത്.

വീടിന് സമീപത്ത് കളിക്കുന്നതിനിടെ വീണ് പരിക്കേറ്റ കുട്ടിയുടെ കൈക്ക് പാലക്കാട് ജില്ലാ ആശുപത്രിയില്‍ നിന്നാണ് പ്ലാസ്റ്റര്‍ ഇട്ടത്. രക്തയോട്ടം നിലച്ച് നീര് വച്ച് പഴുത്ത സ്ഥിതിയിലായിരുന്ന കൈ പിന്നീട് കോഴിക്കോട് മെഡിക്കല്‍ കോളജില്‍ വച്ചാണ് മുറിച്ചുമാറ്റിയത്. സംഭവത്തില്‍ ചികിത്സാ പിഴവ് ഇല്ലെന്ന് പാലക്കാട് ജില്ലാ ആശുപത്രി സൂപ്രണ്ട് വിശദീകരിക്കുകയും ഡിഎംഒ നിയോഗിച്ച സമിതി അന്വേഷണ റിപോര്‍ട്ട് സമര്‍പ്പിക്കുകയും ചെയ്ത ശേഷമാണ് ഡോക്ടര്‍മാര്‍ക്കെതിരെ നടപടി എടുത്തത്.

സെപ്റ്റംബര്‍ 24ന് വീടിന് സമീപത്ത് കളിക്കുന്നതിനിടെയാണ് പെണ്‍കുട്ടിക്ക് പരിക്കേറ്റത്. അന്ന് തന്നെ ജില്ലാ ആശുപത്രിയില്‍ വച്ച് കൈയില്‍ പ്ലാസ്റ്റര്‍ ഇടുകയും ചെയ്തിരുന്നു. അഞ്ച് ദിവസത്തിന് ശേഷം പ്ലാസ്റ്റര്‍ മാറ്റിയപ്പോഴാണ് കുട്ടിയുടെ കൈ രക്തയോട്ടം നിലച്ച് അഴുകിയ നിലയിലാണെന്ന് തിരിച്ചറിഞ്ഞത്.

പ്ലാസ്റ്റര്‍ ഇട്ടതുകൊണ്ടുള്ള പ്രശ്‌നമല്ലെന്നും കൈയില്‍ വലിയ മുറിവ് ഉണ്ടായിരുന്നില്ലെന്നുമാണ് സൂപ്രണ്ടിന്റെ വിശദീകരണം. കൈ പൂര്‍ണമായും പ്ലാസ്റ്റര്‍ ഇട്ടിരുന്നില്ല. 24, 25, 30 തീയതികളിലാണ് കുട്ടിയെ കൊണ്ടുവന്നത്. നീരുണ്ടെങ്കില്‍ വരണമെന്ന് അറിയിച്ചിരുന്നു. എന്നാല്‍ നീരുണ്ടായ ഉടന്‍ എത്തിച്ചില്ലെന്നും സൂപ്രണ്ട് ഡോക്ടര്‍ ജയശ്രീ കുറ്റപ്പെടുത്തി.

സംഭവത്തില്‍ ഡോക്ടര്‍മാരുടെ ഭാഗത്ത് പിഴവ് സംഭവിച്ചിട്ടില്ലെന്നാണ് അന്വേഷണ റിപോര്‍ട്ട്. പാലക്കാട് ജില്ലാ ആശുപത്രിയില്‍ പെണ്‍കുട്ടിക്ക് കൃത്യമായ ചികിത്സ ലഭിച്ചിരുന്നു. സപ്റ്റംബര്‍ 30ന് കുട്ടിയെ ആശുപത്രിയില്‍ എത്തിച്ചപ്പോള്‍ കൈയിലെ രക്തയോട്ടം നിലച്ചിരുന്നു.

 പാലക്കാട് ജില്ലാ ആശുപത്രിയില്‍ ഉടന്‍ പ്രാഥമിക ചികിത്സ നല്‍കിയ ശേഷം കുട്ടിയെ കോഴിക്കോടേക്ക് മാറ്റുകയായിരുന്നു എന്നിങ്ങനെയാണ് അന്വേഷണത്തിലെ കണ്ടെത്തല്‍. ഡിഎംഒ നിയോഗിച്ച രണ്ട് ഡോക്ടര്‍മാരാണ് സംഭവം അന്വേഷിച്ചിരുന്നത്. ഡ്യൂട്ടി ഡോക്ടറുടെയും വകുപ്പ് മേധാവിയുടെയും മൊഴിയുടെ അടിസ്ഥാനത്തിലാണ് റിപോര്‍ട്ട് തയ്യാറാക്കിയത്. ഇത് ഡിഎംഒയ്ക്ക് കൈമാറി.

ഡോക്ടര്‍മാരെ പിന്തുണച്ച് കെജിഎംഒഎയും രംഗത്തെത്തിയിട്ടുണ്ട്. കുട്ടിയ്ക്ക് പരമാവധി ചികിത്സ നല്‍കിയിരുന്നതായി കെജിഎംഒഎ വ്യക്തമാക്കി. കൈമുറിച്ചു മാറ്റേണ്ടി വന്നത് അപൂര്‍വമായി സംഭവിക്കുന്ന ചികിത്സ സങ്കീര്‍ണത മൂലമാണെന്നും സംഘടനാ നേതാക്കള്‍ വിശദീകരിച്ചു.

Two doctors at the Palakkad District Hospital — Dr. Mustafa and Dr. Sarfaraz — have been suspended following a case of alleged medical negligence that led to the amputation of a 9-year-old girl's right hand. The child, Vinodini from Pallassana, was injured while playing near her house on September 24 and was treated at the district hospital with a plaster cast. However, due to improper treatment and a lack of blood circulation, her hand became severely infected and had to be amputated at Kozhikode Medical College.