കൊല്ലം: ക്ലാപ്പനയില്‍ എസ്‌വിഎച്ച്എസ്എസിലെ വിദ്യാര്‍ഥികള്‍ക്ക് കെഎസ്ആര്‍ടിസിയുടെ 50 ട്രാവല്‍ കാര്‍ഡുകള്‍ സ്‌പോണ്‍സര്‍ ചെയ്ത് സിആര്‍ മഹേഷ് എംഎല്‍എ. സ്‌കൂള്‍ സമയത്ത് ഒരു കെഎസ്ആര്‍ടിസി ബസ് മാത്രമാണ് അതുവഴി സര്‍വീസ് നടത്തുന്നത്. ഒരു റൂട്ടില്‍ ഒറ്റ ബസ് മാത്രമേ സര്‍വീസ് നടത്തുന്നുള്ളൂവെങ്കില്‍ ആ ബസില്‍ കണ്‍സെഷന്‍ അനുവദിക്കേണ്ടതില്ലെന്നാണ് കെഎസ് ആര്‍ടിസിയുടെ നയം. ഇത് യാത്രാ ചെലവ് താങ്ങാന്‍ പറ്റാത്ത സാഹചര്യമുണ്ടാക്കിയിരുന്നു.

രക്ഷിതാക്കളും സ്‌കൂള്‍ അധികൃതരും ഇക്കാര്യം എംഎല്‍എയുടെ ശ്രദ്ധയില്‍ പെടുത്തിയതോടെയാണ് ഇതിനു പരിഹാരമുണ്ടായത്. 
യാത്രക്കാര്‍ക്ക് കെഎസ്ആര്‍ടിസി ട്രാവല്‍ കാര്‍ഡ് അനുവദിക്കാറുണ്ടെങ്കിലും ഒരു സ്‌കൂളിലെ വിദ്യാര്‍ഥികള്‍ക്കു മാത്രമായി കാര്‍ഡ് അനുവദിക്കുന്നത് സംസ്ഥാനത്തു തന്നെ ഇതാദ്യമാണ്. കാര്‍ഡിന്റെ വില 100 രൂപയാണ്. യാത്ര ചെയ്യാന്‍ കുട്ടികള്‍ മുന്‍കൂട്ടി പണം ചാര്‍ജ് ചെയ്യണം. ഇപ്പോള്‍ ഓരോ കാര്‍ഡിനും 400 രൂപയ്ക്കു വീതം ചാര്‍ജ് ചെയ്തിട്ടുണ്ടെന്ന് എംഎല്‍എ പറഞ്ഞു.

ALSO READ: ഇടുക്കിയില്‍ അതിശക്തമായ മഴയില്‍ നിര്‍ത്തിയിട്ട ട്രാവലര്‍ ഒഴുകിപ്പോയി- കല്ലാര്‍ ഡാമിന്റെ ഷട്ടറുകള്‍ മുഴുവനായും ഉയര്‍ത്തിയിട്ടുണ്ട്

ചലോ ആപ്പ് വഴിയാണ് ഇതം സംഘടിപ്പിച്ചിരിക്കുന്നത്.  ട്രാവല്‍ കാര്‍ഡും രക്ഷിതാക്കളുടെ മൊബൈല്‍ നമ്പരും ബന്ധിപ്പിച്ചാല്‍ കുട്ടികള്‍ ഏതെല്ലാം സമയത്ത് എവിടെനിന്ന് എവിടേക്ക് ഏത് ബസില്‍ യാത്ര പോകുന്നു എന്ന് രക്ഷാകര്‍ത്താക്കള്‍ക്കറിയാന്‍ സാധിക്കുന്നതാണ്. ട്രാവല്‍ കാര്‍ഡ് വിവരണത്തിന്റെ ഉദ്ഘാടനവും സ്‌കൂളില്‍ സി.ആര്‍ മഹേഷ് എംഎല്‍എ നിര്‍വഹിച്ചു.

സ്‌കൂള്‍ മാനേജര്‍ എസ് ജയചന്ദ്രന്‍ അധ്യക്ഷതവഹിച്ചിട്ടുണ്ട്. പഞ്ചായത്ത് പ്രസിഡന്റ് ഒ മിനിമോള്‍ സ്‌കൂള്‍ പ്രിന്‍സിപ്പല്‍ എസ് ഷീജ പിടിഎ പ്രസിഡന്റ് എബിമോഹന്‍ തുടങ്ങിയവരും പങ്കെടുത്തു.