ബെംഗളൂരു: വോട്ടര്‍പട്ടികയില്‍ നിന്ന് അനധികൃതമായി വോട്ട് നീക്കിയെന്ന് ആരോപണമുയര്‍ന്ന കലബുറഗിയിലെ ആലന്ദ് നിയോജകമണ്ഡലത്തില്‍ മുന്‍ ബി.ജെ.പി എം.എല്‍.എയുടെ വീടിനുസമീപം വോട്ടര്‍പട്ടികയുമായി ബന്ധപ്പെട്ടരേഖകള്‍ കത്തിനശിച്ചനിലയില്‍ കണ്ടെത്തി. മുന്‍ എം.എല്‍.എ സുഭാഷ് ഗുട്ടെഡാറുടെ വസതിക്ക് സമീപത്ത് നിന്നാണ് രേഖകള്‍ കണ്ടെത്തിയത്. വോട്ടര്‍മാരുടെ പേരുകള്‍ വോട്ടര്‍പട്ടികയില്‍ നിന്ന് ഒഴിവാക്കിയെന്ന കേസ് അന്വേഷിക്കുന്ന പ്രത്യേക അന്വേഷണ സംഘം (എസ്‌ഐടി) നടത്തുന്ന പരിശോധനയ്ക്കിടെയാണ് സംഭവം കണ്ടെത്തിയത്.

വെള്ളിയാഴ്ച്ചയാണ് ഗുട്ടേദാറിന്റെയും മക്കളുടേയും വീടുകളില്‍ എസ്.ഐ.ടി റെയ്ഡ് നടത്തിയത്. 

അതേസമയം, രേഖകള്‍ കത്തിനശിച്ചതായി കണ്ടത്തിയതില്‍ സംശയിക്കാനായി ഒന്നുമില്ലെന്നും ദീപാവലിയോടനുബന്ധിച്ച് വീട് വൃത്തിയാക്കിയ ജീവനക്കാരന്‍ കത്തിച്ചതാണെന്നും ഗുട്ടേദാര്‍ അവകാശപ്പെട്ടു.

വോട്ടുകള്‍ നീക്കംചെയ്യാനുള്ള ഏഴാംനമ്പര്‍ ഫോറങ്ങള്‍ വ്യാജമായി നിര്‍മിച്ചെന്ന് കരുതുന്ന നാലുപേരുടെ വീടുകളിലാണ് പരിശോധന നടന്നിരുന്നത്. ഇവിടെ നിന്ന് ഇലക്ട്രോണിക് ഉപകരണങ്ങളുള്‍പ്പെടെ പിടിച്ചെടുത്തിരുന്നു.