കൊച്ചി: ഓപറേഷന്‍ നുംഖോറിന്റെ ഭാഗമായി കൊച്ചി കസ്റ്റംസ് പിടിച്ചെടുത്ത നടന്‍ അമിത് ചക്കാലക്കലിന്റെ വാഹനം പിടിച്ചെടുത്തു. മധ്യപ്രദേശ് രജിസ്‌ട്രേഷനിലുള്ള ലാന്‍ഡ് ക്രൂയിസര്‍ എസ്.യു.വിയാണ് വിട്ടുകൊടുത്തത്. ബോണ്ടിന്റെയും ബാങ്ക് ഗ്യാരണ്ടിയുടേയും അടിസ്ഥാനത്തിലാണ് വാഹനം തിരിച്ചുനല്‍കിയത്. 

വാഹനം ഉപയോഗിക്കരുത്, കേരളത്തിന് പുറത്തുകൊണ്ട് പോകരുത് തുടങ്ങി വ്യവസ്ഥകളോടെയാണ് വിട്ടു നല്‍കിയത്. നികുതി വെട്ടിച്ച് ഭൂട്ടാനില്‍ നിന്ന് കേരളത്തിലേക്ക് വാഹനങ്ങള്‍ കടത്തുന്ന സംഭവത്തില്‍ കസ്റ്റംസ് നടത്തിയ റെയ്ഡിന്റെ ഭാഗമായാണ് അമിതിന്റെ വാഹനം പിടിച്ചെടുത്തത്. 

അതേസമയം, അമിതിന്റെ ഗ്യാരേജില്‍ നിന്ന് പിടിച്ചെടുത്ത മറ്റ് വാഹനങ്ങളുമായി ബന്ധപ്പെട്ടുള്ള പരിശോധന തുടരുകയാണ്. 

ALSO READ: നികുതി വെട്ടിക്കാനായി മുന്നിൽ പല വഴികൾ; തടയാൻ ഓപറേഷൻ നുംഖോർ

ഓപ്പറേഷൻ നുംഖോർ

ഭൂട്ടാനിൽ നിന്ന് ആഡംബര വാഹനങ്ങൾ ഇന്ത്യയിൽ എത്തിച്ച്  വ്യാജ രേഖകൾ ഉണ്ടാക്കി നികുതി വെട്ടിപ്പ് നടത്തുന്ന രീതിയാണ് കണ്ടെത്തിയത്. ഇത് സംബന്ധിച്ച് സൂചന കിട്ടിയതോടെയാണ് അധികൃതർ ഇത് കണ്ടെത്തുന്നതിനായി ഓപറേഷൻ നുംഖോർ ആവിഷ്കരിച്ചത്. 

''നുംഖോർ'' എന്ന ഭൂട്ടാൻ വാക്കിന്റെ അർഥം വാഹനം എന്നാണ്. ഭൂട്ടാൻ സൈന്യം ഉപയോഗിച്ച് ഉപേക്ഷിച്ചത് എന്ന വ്യാജേന ഈ വാഹനങ്ങൾ ഇന്ത്യയിൽ എത്തിക്കുകയായിരുന്നു. ഹിമാചൽ പ്രദേശ്, അരുണാചൽ പ്രദേശ്, മധ്യപ്രദേശ്, ഉത്തർപ്രദേശ് തുടങ്ങിയ സംസ്ഥാനങ്ങളുടെ രജിസ്ട്രേഷൻ സംഘടിപ്പിച്ചാണ് ഇവ കേരളത്തിൽ ഉൾപ്പെടെ വിൽപ്പന നടത്തിയത്. ഇതിനായി വിവിധ രാജ്യങ്ങളുടെ എംബസികൾ,  ഇന്ത്യൻ സൈന്യത്തിലെ ഉന്നത ഉദ്യോഗസ്ഥൻ എന്നിവരുടെ വ്യാജ രേഖകളും  തയാറാക്കിയിരുന്നു.

വിദേശ എംബസികൾ ഉപയോഗിച്ച ശേഷം വിൽപ്പന നടത്തിയത്, ഇന്ത്യൻ സൈന്യത്തിലെ ഉന്നത ഉദ്യോഗസ്ഥർ ഉപയോഗിച്ച ശേഷം ലേലം ചെയ്തത് തുടങ്ങിയ പേരുകൾ പറഞ്ഞായിരുന്നു  ഇവ കേരളത്തിൽ എത്തിച്ചു താരതമ്യേന കുറഞ്ഞ വിലക്ക്  വിറ്റത്. 

ആഡംബര കാറുകളായ ലാൻഡ് ക്രൂസർ, ലക്സസ്, ഡിഫൻഡർ, പ്രാഡോ തുടങ്ങിയവ വളരെ കുറഞ്ഞ വില കാണിച്ച് ഇന്ത്യയിൽ എത്തിച്ചതിനുശേഷം പത്ത് ഇരട്ടി വില ഈടാക്കി വിൽക്കുന്നതായിരുന്നു രീതി. നികുതി വെട്ടിപ്പ് നടത്തിയ വാഹനങ്ങൾ ആയിരുന്നതിനാൽ ഇടനിലക്കാർ ഇത്തരത്തിൽ ലാഭം എടുത്താൽ പോലും യഥാർഥ വിലയേക്കാൾ വളരെ കുറവായിരിക്കും എന്നതിനാലാണ് സിനിമാ താരങ്ങൾ ഉൾപ്പെടെയുള്ളവർ ഈ കെണിയിൽ വീണത്. ഇവയ്ക്ക് കേരള രജിസ്ട്രേഷൻ ലഭിക്കുന്നതിനായി മോട്ടോർ വാഹന വകുപ്പിന്റെ പരിവാഹൻ സൈറ്റ് തന്നെ ദുരുപയോഗം ചെയ്തതായും സംശയമുണ്ട്.

ALSO READ: ഭൂട്ടാന്‍ വാഹനക്കടത്ത് അന്വേഷണത്തില്‍ ഏഴ് കേന്ദ്ര ഏജന്‍സികള്‍ 

പ്രാഡോ കാർ  ഒരു ലക്ഷം രൂപയ്ക്ക് ഹിമാചൽ പ്രദേശിൽ രജിസ്റ്റർ ചെയ്തു എന്ന് കണ്ടെത്തിയതിനെ തുടർന്നാണ് ഈ തട്ടിപ്പിലേക്ക് സൂചന ലഭിച്ചത്. തുടർന്ന് നടത്തിയ പരിശോധനയിൽ ഇത്തരത്തിലുള്ള നൂറുകണക്കിന്  ആഡംബര കാറുകൾ കേരളം ഉൾപ്പെടെയുള്ള ദക്ഷിണേന്ത്യൻ സംസ്ഥാനങ്ങളിലേക്ക് കടത്തിയതായി കണ്ടെത്തി. കേരളത്തിൽ മാത്രം 198 കാറുകൾ കടത്തിയതിന്റെ സൂചനയും ലഭിച്ചു. തുടർന്നാണ് നികുതിവെട്ടിപ്പ് കണ്ടെത്തുന്നതിനായി കസ്റ്റംസ് റവന്യൂ ഇന്റലിജൻസ് ''ഓപ്പറേഷൻ നുംഖോർ'' ആവിഷ്കരിച്ചത്.

 കൊച്ചി കസ്റ്റംസ് പ്രിവന്റീവ് വിഭാഗത്തിന്റെ നേതൃത്വത്തിൽ സെപ്റ്റംബർ 23-ന് ആരംഭിച്ച ഓപ്പറേഷൻ നുംഖോറിൽ കേരളത്തിലെ അഞ്ച് ജില്ലകളിലായി 30ല്‍ അധികം സ്ഥലങ്ങളിലാണ് റെയ്ഡ് നടന്നത്. 38 ആഡംബര വാഹനങ്ങളാണ് കേരളത്തിൽ നിന്ന് പിടിച്ചെടുത്തത്.  ഫെറാറി, മക്ലാറൻ, ലാംബോർഗിനി തുടങ്ങിയ ബ്രാൻഡുകളും പിടിച്ചെടുത്തവയിൽ ഉൾപ്പെടുന്നതായാണ് വിവരം. നടന്മാരായ പൃഥ്വിരാജ് സുകുമാരൻ, മമ്മൂട്ടി, അമിത് ചക്കലക്കൽ എന്നിവരുടെ വീടുകളിലും പരിശോധന നടന്നു.

Customs has released actor Amit Chakkalakkal’s seized Land Cruiser SUV under Operation Numkhor on bond and bank guarantee, with strict conditions on its use.