അബൂദബി: യുഎഇയിലുടനീളം ഗാർഹിക തൊഴിലാളികളെ റിക്രൂട്ട് ചെയ്യുന്നതിനായി 311 കേന്ദ്രങ്ങൾക്ക് അം​ഗീകാരം നൽകി മാനവ വിഭവശേഷി, സ്വദേശിവൽക്കരണ മന്ത്രാലയം (MoHRE). ലൈസൻസുള്ള ഓഫീസുകളുടെ പുതുക്കിയ പട്ടിക മന്ത്രാലയം പുറത്തിറക്കി.

തൊഴിൽ വിപണി മികച്ച രീതിയിൽ നിയന്ത്രിക്കാനും കൂടുതൽ സുതാര്യത കൊണ്ടുവരാനുമാണ് നീക്കത്തിലൂടെ ല​ക്ഷ്യം വെക്കുന്നത്.
. സേവനങ്ങളുടെ കാര്യക്ഷമതയും ഗുണനിലവാരവും മെച്ചപ്പെടുത്താനും ഇതുവഴി ലക്ഷ്യമിടുന്നു. ഉപഭോക്താക്കളുടെ ആവശ്യങ്ങൾ നിറവേറ്റുന്ന, സുരക്ഷിതവും വഴക്കമുള്ളതുമായ സേവനങ്ങൾ നൽകാൻ ഈ കേന്ദ്രങ്ങൾ സഹായിക്കും.

ALSO READ: ദുബൈയിലെ അൽ അമർദി സ്ട്രീറ്റിൽ വാഹനാപകടം; വാഹനമോടിക്കുന്നവർ ജാഗ്രത പാലിക്കണമെന്ന് മുന്നറിയിപ്പ് 

അംഗീകൃത സ്ഥാപനങ്ങളിൽ മാത്രം ഇടപാടുകൾ

ലൈസൻസുള്ള, അംഗീകൃതവുമായ റിക്രൂട്ട്‌മെന്റ് ഓഫീസുകളുമായി മാത്രം ഇടപാടുകൾ നടത്തണമെന്ന് MoHRE പൊതുജനങ്ങളോട് അഭ്യർത്ഥിച്ചു. ഔദ്യോഗിക വഴികൾ ഉപയോഗിക്കുന്നത് തൊഴിലുടമകളുടെയും കുടുംബങ്ങളുടെയും അവകാശങ്ങൾ സംരക്ഷിക്കുമെന്ന് മന്ത്രാലയം വ്യക്തമാക്കി. നിലവിൽ രാജ്യവ്യാപകമായി 136 ലൈസൻസുള്ള റിക്രൂട്ട്‌മെന്റ് കേന്ദ്രങ്ങൾ പ്രവർത്തിക്കുന്നുണ്ട്. അബൂദബിയിൽ 44 ഓഫീസുകളും ദുബൈയിൽ 42 ഓഫീസുകളുമാണ് പ്രവർത്തിക്കുന്നത്. കൂടാതെ, 175 അംഗീകൃത ബിസിനസ് സേവനങ്ങളും മാർഗ്ഗനിർദ്ദേശ കേന്ദ്രങ്ങളും 14 ഡെലിവറി സേവന ദാതാക്കളും രാജ്യത്ത് പ്രവർത്തിക്കുന്നു.

നിയമലംഘകർക്കെതിരെ കർശന നടപടി

ലൈസൻസുള്ള മിക്ക ഓഫീസുകളും നിയമങ്ങൾ പാലിക്കുന്നുണ്ട്. എന്നാൽ, അടുത്തിടെ ലൈസൻസില്ലാതെ പ്രവർത്തിച്ച 11 ഗാർഹിക തൊഴിലാളി റിക്രൂട്ട്‌മെന്റ് ഓഫീസുകൾ അൽ ഐനിൽ കണ്ടെത്തിയിരുന്നു. നിയമലംഘനം നടത്തിയ ഓഫീസുകൾക്കെതിരെ പിഴ ചുമത്തുകയും നിയമപരമായ നടപടികൾ സ്വീകരിക്കുകയും ചെയ്തിരുന്നു.

ALSO READ: സാമ്പത്തിക സുരക്ഷ ശക്തമാക്കാൻ ഒരുങ്ങി ദുബൈ; ഫിഷിംഗ്, ക്രിപ്‌റ്റോ തട്ടിപ്പുകൾക്കെതിരെ വ്യാപക കാമ്പയിൻ 

ഈ വർഷം ആദ്യ പകുതിയിൽ, നിയമലംഘനങ്ങൾ നടത്തിയ 40 ഓഫീസുകൾക്ക് MoHRE പിഴ ചുമത്തിയിരുന്നു. അനധികൃത റിക്രൂട്ട്‌മെന്റ് പ്രവർത്തനങ്ങൾ പ്രോത്സാഹിപ്പിച്ച 77 ലൈസൻസില്ലാത്ത സോഷ്യൽ മീഡിയ അക്കൗണ്ടുകളും മന്ത്രാലയം അടച്ചുപൂട്ടി. നിയമവിരുദ്ധമായ പ്രവർത്തനങ്ങൾ ശ്രദ്ധയിൽപ്പെട്ടാൽ റിപ്പോർട്ട് ചെയ്യണമെന്ന് മന്ത്രാലയം പൊതുജനങ്ങളോട് അഭ്യർത്ഥിച്ചു. നിയമം ലംഘിക്കുന്ന ഓഫീസുകൾക്കെതിരെ കർശന നടപടിയെടുക്കുമെന്നും മന്ത്രാലയം അറിയിച്ചു.

ബിസിനസ് സെന്ററുകൾക്ക് പുതിയ നിയമങ്ങൾ

ബിസിനസ് സെന്ററുകളുടെ ഉത്തരവാദിത്തങ്ങളും കടമകളും നിർവചിക്കുന്ന പുതിയ മന്ത്രിതല പ്രമേയവും MoHRE നടപ്പിലാക്കി തുടങ്ങിയിട്ടുണ്ട്. ഭരണം ശക്തിപ്പെടുത്തുക, സേവന കാര്യക്ഷമത കൂട്ടുക, ഉപഭോക്താക്കളുടെ ഡാറ്റ സംരക്ഷിക്കുക എന്നിവയാണ് പ്രമേയത്തിലൂടെ ലക്ഷ്യമിടുന്നത്. അനധികൃത പ്രവർത്തനങ്ങൾക്കും തെറ്റായ വിവരങ്ങൾ നൽകുന്നതിനും കടുത്ത ശിക്ഷ നൽകാനുള്ള വ്യവസ്ഥകളും ഇതിൽ ഉൾപ്പെടുത്തിയിട്ടുണ്ട്.

uae's ministry of human resources and emiratisation has approved 311 recruitment centers to streamline hiring of domestic laborers. this initiative aims to enhance worker welfare, ensure ethical practices and boost efficiency in the sector, addressing rising demand while promoting fair employment standards across the emirates.