അമരാവതി: ആന്ധ്ര പ്രദേശിലെ എണ്ണക്കിണറിലുണ്ടായ തീപിടിത്തം രണ്ടാം ദിവസവും അണയ്ക്കാനായിട്ടില്ല. തുടര്‍ന്ന് സുരക്ഷാ നടപടിയുടെ ഭാഗമായി പ്രദേശവാസികളെ പൂര്‍ണമായും ഒഴിപ്പിച്ചിരിക്കുകയാണ്. തീ പിടിത്തത്തിന്റെ രൂക്ഷതയില്‍ 20 ശതമാനം മാത്രമാണ് കുറവുണ്ടായതെന്നാണ് റിപ്പോര്‍ട്ടുകള്‍ പറയുന്നത്. ഡല്‍ഹിയില്‍നിന്ന് ഒ.എന്‍.ജി.സിയുടെ വിദഗ്ധ സംഘം സ്ഥലത്ത് എത്തിയിട്ടുണ്ട്.

സംഭവവികാസങ്ങള്‍ സൂക്ഷ്മമായി നിരീക്ഷിച്ചുകൊണ്ടിരിക്കുകയാണ്, അതേസമയം പൊതുജന സുരക്ഷ ഉറപ്പാക്കാന്‍ അടിയന്തര നടപടികള്‍ സ്വീകരിച്ചിട്ടുണ്ട്. മുതിര്‍ന്ന ജില്ലാ ഉദ്യോഗസ്ഥരും ഒഎന്‍ജിസി ഉദ്യോഗസ്ഥരും നിലവില്‍ സ്ഥലത്തെത്തി സ്ഥിതിഗതികള്‍ നിരീക്ഷിക്കുന്നു.

ഇന്നലെ ഉച്ചയ്ക്ക് 12.40ഓടെയാണ് ഡോ. ബി.ആര്‍. അംബേദ്കര്‍ കൊണസീമ ജില്ലയിലെ മോറി, ഇരുസുമാണ്ട ഗ്രാമങ്ങള്‍ക്ക് സമീപത്തെ എണ്ണക്കിണറില്‍ തീപിടിത്തമുണ്ടായത്. ഒ.എന്‍.ജി.സിയുടെ മോറി-5 എന്ന കിണറിനാണ് തിപിടിച്ചത്. എണ്ണക്കിണറില്‍ അറ്റകുറ്റപ്പണിയുടെ ഭാഗമായി ഡ്രില്‍ ചെയ്യുന്നതിനിടെ പൈപ്പ് ലൈനില്‍ തകരാര്‍ സംഭവിക്കുകയും ഗ്യാസ് ലീക്കുണ്ടാകുകയുമായിരുന്നുവെന്നാണ് റിപ്പോര്‍ട്ട്. 

 ആളപായമൊന്നുമുണ്ടായിട്ടില്ല. തീപിടിത്തമുണ്ടായ ഉടന്‍ ഫയര്‍ എന്‍ജിനുകള്‍ ചുറ്റിലുംനിന്ന് വെള്ളം ചീറ്റി കുട സൃഷ്ടിച്ച് താപനില കുറയ്ക്കാന്‍ ശ്രമിച്ചിരുന്നു. ഇത് വലിയ രീതിയില്‍ സഹായിച്ചു എന്നാണ് ഒ.എന്‍.ജി.സി അധികൃതര്‍ പറയുന്നത്.

അഞ്ച് കി.മീ ചുറ്റളവില്‍നിന്നും ആളുകളെ പൂര്‍ണമായി ഒഴിപ്പിച്ചിരിക്കുകയാണ്. മൂന്ന് ഗ്രാമങ്ങളില്‍നിന്നായി 600ഓളം പേരെ ഒഴിപ്പിച്ചതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു, ഒരു കിലോമീറ്റര്‍ നോ സോണ്‍ ആയും പ്രഖ്യാപിച്ചിട്ടുണ്ട്.

അഹമ്മദാബാദ് കേന്ദ്രമായി പ്രവര്‍ത്തിക്കുന്ന ഡീപ് ഇന്‍ഡസ്ട്രീസ് ലിമിറ്റഡിന്റെ പക്കലാണ് ഇപ്പോള്‍ മോറി-5 എണ്ണക്കിണറുള്ളത്. 2024 ല്‍ 1,402 കോടി രൂപയുടെ കരാറിലൂടെയാണ് ഡീപ് ഇന്‍ഡസ്ട്രീസ് ലിമിറ്റഡ് ഈ എണ്ണക്കിണര്‍ ഏറ്റെടുത്തത്.

the fire at an ongc oil well in andhra pradesh’s konaseema district could not be controlled for the second consecutive day, prompting complete evacuation of nearby villages. ongc expert teams from delhi are monitoring the situation as safety measures are intensified.