കുവൈത്ത് സിറ്റി:  കുവൈത്തില്‍ ഫാമിലി വിസിറ്റ് വിസയില്‍ കഴിയുന്ന പ്രവാസികളുടെ ഭാര്യക്കും കുട്ടികള്‍ക്കും ഡിപ്പെന്‍ഡന്റ് റെസിഡന്‍സി വിസ അനുവദിക്കുമോ എന്ന കാര്യത്തില്‍ ഇപ്പോഴും വ്യക്തതയില്ല. ഇതുമായി ബന്ധപ്പെട്ട ഔദ്യോഗിക അറിയിപ്പ് പുറത്തുവന്നിട്ടില്ലാത്തതിനാല്‍ പ്രവാസി കുടുംബങ്ങള്‍ക്കിടയില്‍ ആശയക്കുഴപ്പം തുടരുകയാണ്. ഫാമിലി വിസിറ്റ് വിസ സംബന്ധിച്ച പുതിയ നിയമഭേദഗതികള്‍ വന്നതോടെയാണ് ഈ വിഷയത്തില്‍ കൂടുതല്‍ ചര്‍ച്ചകള്‍ ഉയര്‍ന്നത്.

അടുത്തിടെ ഫാമിലി വിസിറ്റ് വിസ സംബന്ധിച്ച് പുറത്തിറങ്ങിയ അറിയിപ്പുകള്‍ക്ക് പിന്നാലെ, ഈ വിസ ഭാവിയില്‍ റെസിഡന്‍സി വിസയാക്കി മാറ്റുവാന്‍ കഴിയുമെന്ന തരത്തിലുള്ള വിവരങ്ങള്‍ പുറത്തുവന്നിരുന്നു. ഇതോടെ നിരവധി പ്രവാസികള്‍ക്ക് കുടുംബത്തെ സ്ഥിരമായി കുവൈത്തിലേക്ക് കൊണ്ടുവരാമെന്ന പ്രതീക്ഷയുണ്ടായി. എന്നാല്‍ ഇത് എപ്പോള്‍, എങ്ങനെ നടപ്പിലാകും എന്ന കാര്യത്തില്‍ ഇതുവരെ വ്യക്തത വന്നിട്ടില്ല.

നിലവില്‍ കുവൈത്തിലെ വിവിധ റെസിഡന്‍സി അപേക്ഷ കേന്ദ്രങ്ങളില്‍ ഫാമിലി വിസിറ്റ് വിസയെ ഡിപ്പെന്‍ഡന്റ് റെസിഡന്‍സി വിസയാക്കി മാറ്റാനുള്ള അപേക്ഷകള്‍ സ്വീകരിക്കുന്നില്ലെന്നാണ് വിവരം. ഫാമിലി വിസിറ്റ് വിസ കുടുംബാംഗങ്ങള്‍ കുറച്ചുകാലത്തേക്ക് രാജ്യത്ത് താമസിക്കാനായി അനുവദിക്കുന്ന വിസ മാത്രമാണെന്നും, അത് സ്വയം റെസിഡന്‍സി വിസയായി മാറില്ലെന്നും ബന്ധപ്പെട്ടവര്‍ വ്യക്തമാക്കുന്നു.

റെസിഡന്‍സി വിസയുമായി ബന്ധപ്പെട്ട നടപടികള്‍ തുടങ്ങാന്‍ ഔദ്യോഗിക അറിയിപ്പുകളും വ്യക്തമായ നിര്‍ദേശങ്ങളും പുറത്തിറങ്ങേണ്ടതുണ്ടെന്നാണ് അധികൃതര്‍ പറയുന്നത്. ഇതിനായി സാങ്കേതിക സംവിധാനങ്ങള്‍ പുതുക്കുന്നതിനുള്ള പ്രവര്‍ത്തനങ്ങള്‍ നടക്കുകയാണെന്നും സൂചനയുണ്ട്.

അതേസമയം, ഔദ്യോഗിക അറിയിപ്പ് വരുന്നതുവരെ സ്ഥിരീകരിക്കാത്ത വിവരങ്ങള്‍ വിശ്വസിക്കരുതെന്നും, വിസ സംബന്ധിച്ച കാര്യങ്ങളില്‍ ഔദ്യോഗിക ചാനലുകള്‍ വഴിയുള്ള വിവരങ്ങള്‍ മാത്രം ആശ്രയിക്കണമെന്നും പ്രവാസികള്‍ക്ക് മുന്നറിയിപ്പ് നല്‍കിയിട്ടുണ്ട്.

Confusion continues among expatriate families in Kuwait as there is no clear guidance on converting family visit visas to dependent residency visas. Authorities have not provided official instructions yet, leaving families unsure about the process