അബുദബി: യുഎഇയിൽ വരും ദിവസങ്ങളിൽ തണുപ്പ് കൂടുമെന്നും വിവിധയിടങ്ങളിൽ നേരിയ മഴയ്ക്ക് സാധ്യതയുണ്ടെന്നും ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. ജനുവരി 30 വെള്ളിയാഴ്ച രാജ്യത്തിന്റെ വിവിധ ഭാഗങ്ങളിൽ താപനില കുറയുന്നതിനൊപ്പം മേഘാവൃതമായ കാലാവസ്ഥയായിരിക്കും അനുഭവപ്പെടുക.

വടക്കൻ, കിഴക്കൻ മേഖലകളിൽ ആകാശം ഭാഗികമായി മേഘാവൃതമായിരിക്കും. ചിലയിടങ്ങളിൽ നേരിയ മഴയ്ക്ക് സാധ്യതയുണ്ടെന്നും റിപ്പോർട്ടിലുണ്ട്. രാത്രികാലങ്ങളിലും ശനിയാഴ്ച പുലർച്ചെയും തീരദേശങ്ങളിലും ഉൾപ്രദേശങ്ങളിലും അന്തരീക്ഷത്തിൽ ഈർപ്പം വർദ്ധിക്കാൻ സാധ്യതയുണ്ട്. ഇത് കാഴ്ചപരിധി കുറയ്ക്കുന്ന രീതിയിലുള്ള മൂടൽമഞ്ഞിന് കാരണമായേക്കാം.

ALSO READ: ആപ്താമിൽ പാക്കറ്റിന് അടിയിൽ ഈ തീയതിയുണ്ടോ? എങ്കിൽ കുഞ്ഞുങ്ങൾക്ക് നൽകരുത്; സുരക്ഷാ മുന്നറിയിപ്പുമായി യുഎഇ അധികൃതർ 

അന്തരീക്ഷത്തിൽ വടക്കുപടിഞ്ഞാറൻ ദിശയിൽ നിന്ന് മണിക്കൂറിൽ 10 മുതൽ 25 കിലോമീറ്റർ വരെ വേഗതയിൽ കാറ്റ് വീശാൻ സാധ്യതയുണ്ട്. ചില സമയങ്ങളിൽ കാറ്റിന്റെ വേഗത മണിക്കൂറിൽ 40 കിലോമീറ്റർ വരെ ഉയർന്നേക്കാം. ജയ്സ് പർവതനിരകളിലെ താപനില 7°C വരെ താഴ്ന്നേക്കാമെന്നും അധികൃതർ മുന്നറിയിപ്പ് നൽകുന്നു.

യുഎഇയിലെ പ്രധാന നഗരങ്ങളിൽ വെള്ളിയാഴ്ച മിതമായ കാലാവസ്ഥയായിരിക്കും അനുഭവപ്പെടുക. അബുദബിയിലും ദുബൈയിലും പരമാവധി താപനില 25°C ആയിരിക്കുമ്പോൾ, ഷാർജയിൽ ഇത് 26°C വരെ ഉയർന്നേക്കാം. കുറഞ്ഞ താപനിലയുടെ കാര്യത്തിൽ ദുബൈയിൽ 19°C രേഖപ്പെടുത്തുമ്പോൾ അബുദബിയിലും ഷാർജയിലും തണുപ്പ് അല്പം കൂടി വർധിച്ച് 16°C വരെ താഴാൻ സാധ്യതയുണ്ട്.

മറ്റ് പ്രദേശങ്ങളിൽ പൊതുവെ താപനില 26 ഡിഗ്രി സെൽഷ്യസിൽ താഴെയായി തുടരും. മൂടൽമഞ്ഞ് സാധ്യതയുള്ളതിനാൽ വാഹനമോടിക്കുന്നവർ ജാഗ്രത പാലിക്കണമെന്ന് അധികൃതർ നിർദ്ദേശിച്ചു.

weather conditions in the uae are set to change tomorrow, with a slight drop in temperature and chances of light rain and fog in some regions, according to forecasts.