ഹരിപ്പാട്: ആലപ്പുഴയിൽ ക്ഷേത്ര ദർശനത്തിനെത്തിയ പ്ലസ് വൺ വിദ്യാർഥി മുങ്ങിമരിച്ചു. 17കാരനായ ആദ്വൈത് ആണ് മരിച്ചത്. ഹരിപ്പാട് സുബ്രമണ്യ സ്വാമി ക്ഷേത്രത്തിലെ പെരുംകുളത്തിൽ വ്യാഴാച പുലർച്ചെ 4.30നാണ് അപകടം നടന്നത്. തൈപ്പൂയ കാവടിയുമായി ബന്ധപ്പെട്ട് മാതാവിനും മുത്തശ്ശനുമൊപ്പം ക്ഷേത്ര ദർശനത്തിനായി എത്തിയതായിരുന്നു  ആദ്വൈത്. 

കുളിക്കാനായി ഇറങ്ങിയ ആദ്വൈതിനെ കാണാതായതിന് പിന്നാലെ നടത്തിയ തിരച്ചിലിൽ 17കാരനെ വെള്ളത്തിൽ മുങ്ങിയ നിലയിൽ കണ്ടെത്തുകയായിരുന്നു. ഉടനെ ഹരിപ്പാട് താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ സാധിച്ചില്ല.