കൊൽക്കത്ത: പശ്ചിമ ബംഗാളിലെ കരട് വോട്ടർ പട്ടികയിലെ അവകാശവാദങ്ങളിലും എതിർപ്പുകളിലും വാദം കേൾക്കുന്നതിനിടെ ലഭിച്ച തിരിച്ചറിയൽ രേഖകൾ അപ്‌ലോഡ് ചെയ്യുന്ന പ്രക്രിയ മനഃപൂർവ്വം വൈകിപ്പിക്കുന്നതായി തിരഞ്ഞെടുപ്പ് കമ്മീഷൻ. വിഷയത്തിൽ ഇലക്ടറൽ രജിസ്ട്രേഷൻ ഓഫീസർമാരും (ഇആർഒ) അസിസ്റ്റന്റ് ഇലക്ടറൽ രജിസ്ട്രേഷൻ ഓഫീസർമാരും (എഇആർഒ) കുറ്റക്കാരാണെന്ന് ഇന്ത്യൻ തിരഞ്ഞെടുപ്പ് കമ്മീഷൻ (ഇസിഐ) കണ്ടെത്തി.

പശ്ചിമ ബംഗാൾ മുഖ്യ തിരഞ്ഞെടുപ്പ് ഓഫീസർ (സിഇഒ) നൽകുന്ന വിവരപ്രകാരം 120 ഇആർഒകളും 150  എഇആർഒകളും കുറ്റക്കാരാണ്. ഇതിൽ ഉൾപ്പെട്ടിരിക്കുന്ന ആളുകളുടെ വിവരങ്ങൾ ഇതുവരെ ഔദ്യോഗികമായി നൽകിയിട്ടില്ല. ​ 

ഫെബ്രുവരി 14-ന് വാദം കേൾക്കുന്നതിനുള്ള നീട്ടിയ സമയപരിധി അവസാനിച്ചതിന് അഞ്ച് ദിവസത്തിന് ശേഷവും ഡോക്യുമെന്റ് അപ്‌ലോഡ് പ്രക്രിയ മനഃപൂർവ്വം മാറ്റിവച്ചതായി കണ്ടെത്തിയതായാണ് തെരഞ്ഞെടുപ്പ് കമ്മീഷനോട് അടുത്ത വൃത്തങ്ങൾ പറയുന്നത്. രേഖകൾ അപ്‌ലോഡ് ചെയ്യുന്നതിൽ മനഃപൂർവ്വം സ്വീകരിച്ച ഈ അലംഭാവം കാരണം, ധാരാളം വോട്ടർമാരുടെ രേഖകൾ ഇതുവരെ സിസ്റ്റത്തിലേക്ക് അപ്‌ലോഡ് ആയിട്ടില്ല. ഈ രേഖകൾ അപ്‌ലോഡ് ചെയ്തില്ലെങ്കിൽ, അവയുടെ സൂക്ഷ്മപരിശോധന പ്രക്രിയ സാധ്യമാകില്ല. ഇതോടെ നിരവധി പേർ പട്ടികയിൽ നിന്ന് പുറത്താകും.

ALSO READ: 'അമിത് ഷാ കൊലയാളി', 'ഗാന്ധിയെ കൊന്നത് ആർ‌എസ്‌എസ്'; 'വിവാദ' പരാമർശങ്ങളിൽ രാഹുൽ ഗാന്ധി ഇന്നും നാളെയും വിവിധ കോടതിയിൽ ഹാജരാകും 

ഇത്തരമൊരു സാഹചര്യത്തിൽ, ഫെബ്രുവരി 21-നകം സൂക്ഷ്മപരിശോധന പ്രക്രിയ പൂർത്തിയാക്കാനുള്ള നിലവിലെ സമയപരിധി മതിയാകാതെ വരും. സൂക്ഷ്മപരിശോധന സമയപരിധി നീട്ടിയാൽ, ഫെബ്രുവരി 28-ന് അന്തിമ വോട്ടർ പട്ടിക പ്രസിദ്ധീകരിക്കാൻ നിശ്ചയിച്ചിരിക്കുന്ന തീയതിയും മാറ്റിവയ്ക്കേണ്ടിവരും. 

കുറ്റക്കാരാണെന്ന് കണ്ടെത്തിയ ഇആർഒമാരെയും എഇആർഒമാരെയും വെറുതെ വിടില്ലെന്ന് കമ്മീഷൻ പറഞ്ഞു. രണ്ട് ഇആർഒമാർ, ഒമ്പത് എഇആർഒമാർ, ഒരു ഡാറ്റാ എൻട്രി ഓപ്പറേറ്റർ, മൂന്ന് മൈക്രോ ഒബ്സർവർമാർ എന്നിവർക്കെതിരെ ഇതിനകം നടപടികൾ എടുത്തിട്ടുണ്ട്.

ALSO READ: ''ഇതോ.. മുസ്‌ലിങ്ങള്‍ക്കുള്ള ബിജെപിയുടെ റമദാന്‍ സമ്മാനം''; മുസ്‌ലിം സംവരണം റദ്ദാക്കിയ മഹാരാഷ്ട്ര സര്‍ക്കാരിന്റെ നടപടിയെ വിമര്‍ശിച്ച് എംകെ സ്റ്റാലിന്‍ 

അതേസമയം, പശ്ചിമ ബംഗാളിൽ വോട്ടർ പട്ടികയിൽ നിന്ന് 70ലക്ഷം പേർ ഒഴിവായേക്കുമെന്നാണ് ഇതുവരെയുള്ള വിവരം. കരടു പട്ടികയിൽ നിന്ന് 58 ലക്ഷം പേരെ നേരത്തെ ഒഴിവാക്കിയിരുന്നു. അടുത്ത ഘട്ടം പരിശോധനയിൽ അഞ്ച് ലക്ഷം പേരെ കൂടി ഒഴിവാക്കി. അഞ്ചു ലക്ഷം പേർ തെളിവെടുപ്പിന് എത്തിയിട്ടില്ലെന്നാണ് കണക്ക്. എന്നാൽ ഇത് രേഖകൾ അപ്‌ലോഡ് ചെയ്യാത്തവരാണോ എന്നും സംശയമുണ്ട്.