തലശ്ശേരി: പാനൂര്‍ അക്കാനിശ്ശേരിയിലെ ആള്‍താമസമില്ലാത്ത വീട്ടുമുറ്റത്ത് ഒളിപ്പിച്ച നിലയില്‍ നാല് വടിവാളുകള്‍ കണ്ടെടുത്തു. ജില്ലാ പൊലിസ് ചീഫിന്റെ കീഴിലുള്ള പ്രത്യേക സ്‌ക്വാഡിന്റെ നിര്‍ദേശ പ്രകാരം നടത്തിയ റെയ്ഡിലാണ് ആയുധങ്ങള്‍ കണ്ടെത്തിയത്.
തുടര്‍ന്ന് ഇതേവീട്ടില്‍ കൂടുതല്‍ പരിശോധന നടത്തുന്നതിനിടയില്‍ വീട്ടിന്റെ ടെറസില്‍ നിന്ന് പൈപ്പ് ബോംബ് പോലുള്ള വസ്തു കണ്ടെടുത്തു. എന്നാല്‍ പിന്നീട് ബോംബ് സ്‌ക്വാഡ് നടത്തിയ പരിശോധനയില്‍ ഇത് പൈപ്പ് ബോംബല്ലെന്നും ഇതിന്റെ ഡമ്മിയാണെന്നും കണ്ടെത്തി.
വടിവാളുകള്‍ വീട്ടുമുറ്റത്തെ തേങ്ങ പൊതിച്ച ചകിരിക്കുള്ളില്‍ ഒളിപ്പിച്ച നിലയിലായിരുന്നു.കോഴിക്കോട് സിറ്റി ബോംബ് സ്‌ക്വാഡിന്റെ നേതൃത്വത്തില്‍ പാനൂര്‍ പ്രദേശത്ത് മൂന്നു ദിവസമായി റെയ്ഡ് നടത്തി വരികയാണ്. ഇതിനിടെയാണ് ആയുധങ്ങള്‍ കണ്ടെടുത്തത്. അടുത്ത ദിവസങ്ങളില്‍ പ്രദേശത്ത് കൂടുതല്‍ പരിശോധന നടത്തുമെന്ന് പൊലിസ് പറഞ്ഞു. പാനൂര്‍ സി.ഐ കെ.എസ് ഷാജി, എസ്.ഐ രാജീവന്‍ തുടങ്ങിയവരുടെ നേതൃത്വത്തിലാണ് റെയ്ഡ് നടത്തിയത്.