കണ്ണൂര്‍: നിയമസഭ തെരഞ്ഞടുപ്പില്‍ മത്സരിക്കുമെന്ന് കെപിസിസി മുന്‍ അധ്യക്ഷന്‍ കെ.സുധാകരന്‍. കണ്ണൂരില്‍ നിന്ന് മത്സരിക്കുന്ന കാര്യത്തില്‍ 110 ശതമാനം ഉറപ്പാണെന്ന് അദ്ദേഹം പറഞ്ഞു. കൂടാതെ താന്‍ മത്സരിക്കുന്നതില്‍ എന്താണ് കുഴപ്പമെന്നും അദ്ദേഹം മാധ്യമപ്രവര്‍ത്തകരോട് ചോദിച്ചു.

അതേസമയം നേരത്തെ കണ്ണൂരില്‍ താന്‍ മത്സരിക്കണമോയെന്ന് പാര്‍ട്ടി തീരുമാനിക്കുമെന്നും ഇതുവരെ അക്കാര്യം പാര്‍ട്ടി ചോദിച്ചിട്ടില്ലെന്നും കെ സുധാകരന്‍ പറഞ്ഞിരുന്നു. കണ്ണൂരില്‍ മത്സരിക്കുമോയെന്ന് പാര്‍ട്ടി ചോദിക്കുമെന്നാണ് കരുതുന്നത്. അത്തരത്തിലൊരു ചോദ്യം ഉണ്ടായാല്‍ അപ്പോള്‍ നിലപാട് പറയുമെന്നും ചോദിക്കാതെ താല്‍പര്യം അറിയിക്കില്ലെന്നും കെ സുധാകരന്‍ പറഞ്ഞിരുന്നു.

നിയമസഭാ തെരഞ്ഞെടുപ്പില്‍ എംപിമാര്‍ മത്സരിക്കണോയെന്ന കാര്യത്തില്‍ കോണ്‍ഗ്രസില്‍ അന്തിമ ധാരണയായിട്ടില്ല. കെ സുധാകരനടക്കം ഇളവ് നല്‍കുന്നതും നേതൃത്വത്തിന്റെ പരിഗണനയിലാണ്. കണ്ണൂരില്‍ മത്സരിക്കുമെന്ന് നേരത്തെയും കെ സുധാകരന്‍ വ്യക്തമാക്കിയിരുന്നു. മറ്റു കോണ്‍ഗ്രസ് നേതാക്കളും കണ്ണൂര്‍ സീറ്റ് ഉന്നമിടുന്നുണ്ട്.