കൊച്ചി: പാമ്പാക്കുട ചെണ്ടിക്കണ്ടം മാര്‍ ഗ്രിഗോറിയോസ് ചാപ്പലിന് സമീപം എംഡിഎംഎയുമായി യുവതി പിടിയില്‍. ജാര്‍ഖണ്ഡ് ബാനോ സ്വദേശിനി ദശ്മി നാഥ് (23) ആണ് പിടിയിലായത്. 

വെള്ളിയാഴ്ച്ച രാത്രി പട്രോളിങ്ങിനിടെ ബസ് സ്‌റ്റോപ്പില്‍ സംശയാസ്പദമായ സാഹചര്യത്തില്‍ കണ്ട യുവതിയെ എക്‌സൈസ് സംഘം ചോദ്യം ചെയ്യുകയായിരുന്നു. ബാഗ് പരിശോധിച്ചപ്പോളാണ് സിന്തറ്റിക് മയക്കുമരുന്ന് കണ്ടെത്തിയത്. 9.1 ഗ്രാം എംഡിഎംഎയാണ് യുവതിയുടെ പക്കലുണ്ടായിരുന്നത്. ഇതിന് മാര്‍ക്കറ്റില്‍ ലക്ഷങ്ങള്‍ വിലവരുമെന്നാണ് എക്‌സൈസ് പറയുന്നത്. 

പിറവം എക്‌സൈസ് ഇന്‍സ്‌പെക്ടര്‍ വി വിജയ രശ്മിയുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. നടപടികള്‍ പൂര്‍ത്തിയാക്കി പ്രതിയെ കോടതിയില്‍ ഹാജരാക്കും. ലഹരി മരുന്നിന്റെ ഉറവിടത്തെക്കുറിച്ചും വിപണന ശൃംഖലയെക്കുറിച്ചും അന്വേഷണം ഊര്‍ജിതമാക്കിയതായി എക്‌സൈസ് അറിയിച്ചു.

ALSO READ: 'ആം ആദ്മി ശരിയായ പാതയില്‍ തുടര്‍ന്നിരുന്നെങ്കില്‍ എംപിമാര്‍ പാര്‍ട്ടി വിടില്ലായിരുന്നു; ആപ്പിനെ കുറ്റപ്പെടുത്തി അണ്ണാ ഹസാരെ