പത്തനംതിട്ട: കവി കുരീപ്പുഴ ശ്രീകുമാറിന്റെ പ്രസംഗം തടസപ്പെടുത്തി ബിജെപി പ്രവര്‍ത്തകര്‍. ദളിത് വിഷയങ്ങളും, കുംഭമേള വൈറല്‍ താരം കേരളത്തില്‍ എത്തി വിവാഹം ചെയ്ത സംഭവത്തെയും പരാമര്‍ശിച്ചപ്പോഴാണ് പ്രതിഷേധവുമായി ബിജെപി രംഗത്തെത്തിയത്. പത്തനംതിട്ടയില്‍ നെല്ലിക്കല്‍ മുരളീധരന്‍ ഫൗണ്ടേഷന്റെ അവാര്‍ഡ്ദാന ചടങ്ങിനിടെയാണ് സംഭവം.

പ്രസംഗത്തില്‍ സമകാലിക ദളിത് വിഷയങ്ങളും കുരീപ്പുഴ സംസാരിച്ചിരുന്നു. ഉത്തരേന്ത്യയിലെ അപകടകരമായ സാഹചര്യത്തെ വിശദീകരിക്കുന്നതിനിടയിലാണ് വൈറല്‍ താരം മൊണാലിസയുടെ വിവാഹത്തെക്കുറിച്ച് ഇദ്ദേഹം പരാമര്‍ശിച്ചത്. ഇത് ബിജെപിക്കാരെ പ്രകോപിക്കുകയും, ബിജെപി മുന്‍ ജില്ലാ പ്രസിഡന്റ് പ്രതാപചന്ദ്ര വര്‍മ്മയും, ഒപ്പം എത്തിയ ബന്ധുവും പ്രസംഗം തടസപ്പെടുത്തുകയും ചെയ്തു. 

ഇന്ത്യ അപകടകരമായ അവസ്ഥയിലേക്ക് നിങ്ങുന്നുവെന്നും, കേരളമാണ് ആകെ ആശ്വാസം തരുന്ന ഇടമെന്നും അദ്ദേഹം പറഞ്ഞിരുന്നു. ഉത്തരേന്ത്യയില്‍ നടക്കുന്ന കാര്യങ്ങള്‍ സൂചിപ്പിച്ച സാഹചര്യത്തിലാണ് കുംഭമേള വൈറല്‍ താരം കേരളത്തില്‍ വന്ന് കല്യാണം കഴിച്ച കാര്യം കുരീപ്പുഴ സൂചിപ്പിച്ചത്. രാജ്യത്ത് ദളിതര്‍ അനുഭവിക്കുന്ന പീഡനങ്ങളും ആക്രമണങ്ങളും, തൃശൂര്‍ പൂരവുമായി ബന്ധപ്പെട്ട അപകടം ഉയര്‍ത്തുന്ന ചോദ്യങ്ങള്‍, വര്‍ഗീയ ആക്രമണങ്ങള്‍ തുടങ്ങി പല വിഷയങ്ങള്‍ സൂചിപ്പിച്ചുകൊണ്ടാണ് അദ്ദേഹം പ്രസംഗം പൂര്‍ത്തിയാക്കിയത്. ഇതാണ് ബിജെപിയെ പ്രകോപിപ്പിച്ചത്. രാഷ്ട്രീയ പ്രസംഗം ഇവിടെ നടത്തരുതെന്ന് ആക്രോശിച്ചാണ് ബിജെപിക്കാര്‍ പ്രതിഷേധിച്ചത്. ബഹളം വെച്ചവരെ സംഘാടകര്‍ ഇടപെട്ട് പുറത്താക്കിയതിന് ശേഷമാണ് കുരീപ്പുഴ പ്രസംഗം തുടര്‍ന്നത്. 

ALSO READ: കോളജ് പരിസരത്തുവെച്ച് എംഡിഎംഎയുമായി യുവതി പിടിയില്‍  

BJP disrupted the speech of poet Kurippuzha Sreekumar Pathanamthitta