കൊല്ലം:  കരുനാഗപ്പള്ളിയില്‍ പട്ടാപ്പകല്‍ ഗുണ്ടാ നേതാവ് അലുവ അതുലിനെ വെട്ടിക്കൊന്ന സംഭവത്തില്‍ പ്രധാന പ്രതി ഉള്‍പ്പെടെ നാലുപേര്‍ പിടിയില്‍. പിടിയിലായവരില്‍ രണ്ടുപേര്‍ നേരിട്ട് കൊലപാതകത്തില്‍ പങ്കുള്ളവരാണ്. പ്രതികള്‍ സഞ്ചരിച്ച വാഹനവും പൊലിസ് കസ്റ്റഡിയിലെടുത്തു. സംഭവത്തില്‍ അന്വേഷണം പുരോഗമിക്കുകയാണെന്നും, കൂടുതല്‍ പ്രതികളെ പിടികൂടുമെന്നും സിറ്റി പൊലിസ് കമ്മീഷണര്‍ പറഞ്ഞു. 

കടത്തൂര്‍-വയനകം ഗുണ്ടാ സംഘങ്ങളുടെ കുടിപ്പകയാണ് കൊലപാതകത്തിലേക്ക് നയിച്ചത്. ജിം സന്തോഷ് വധക്കേസിലെ പ്രധാന പ്രതിയായ അലുവ സന്തോഷിനെ ഇന്ന് ഉച്ചയോടൊയാണ് പ്രതികള്‍ നടുറോഡിലിട്ട് വെട്ടിക്കൊന്നത്. കേസില്‍ ജാമ്യത്തിലിറങ്ങിയ അതുല്‍ സ്‌റ്റേഷനില്‍ ഒപ്പിട്ടിറങ്ങി മടങ്ങവെയാണ് പുതിയകാവിന് സമീപത്ത് വെച്ച് പ്രതികള്‍ വളഞ്ഞത്. അതുലിന്റെ കാറിനെ പിന്തുടര്‍ന്ന പ്രതികള്‍ കാറ് ഇടിച്ച് തെറിപ്പിക്കുകയും, കത്തിയും വടിവാളുകളും ഉപയോഗിച്ച് വെട്ടിക്കൊല്ലുകയുമായിരുന്നു. അതുലിനോടൊപ്പം കാറിലുണ്ടായിരുന്ന കൂട്ടുപ്രതി മനുവിനും കൈക്ക് വെട്ടേറ്റിട്ടുണ്ട്. ഇയാളെ ആശുപത്രിയില്‍ പ്രവേശിപ്പിച്ചു.

ALSO READ: ഇൻഷൂറൻസ് ഇല്ലെങ്കിലും ഇനി സൗജന്യ ചികിത്സ ലഭിക്കും; പ്രഖ്യാപനവുമായി ആരോഗ്യമന്ത്രി 

ഓച്ചിറയിലെ വയനകം ഗുണ്ടാ സംഘത്തിലെ അംഗമാണ് അലുവ അതുൽ. അമ്മയുടെ മുന്നിലിട്ട് ജിം സന്തോഷിനെ കൊലപ്പെടുത്തി മടങ്ങും വഴി അതുലും സംഘവും മറ്റ് രണ്ട് പേരെ വെട്ടി പരിക്കേൽപ്പിച്ചിരുന്നു. കടത്തൂർ സംഘത്തിൽപ്പെട്ടവരെയാണ് അതുലും കൂട്ടാളികളും ആക്രമിച്ചത്. ഇതിൻ്റെ വൈരാഗ്യമാണ് അലുവ അതുലിൻ്റെ കൊലപാതകത്തിലേക്ക് നയിച്ചതെന്നാണ് നിഗമനം