പാലക്കാട്: ദുഃഖവെള്ളി, ഈസ്റ്റർ  പ്രമാണിച്ച് യാത്രക്കാരുടെ തിരക്ക് കണക്കിലെടുത്ത്  റെയിൽവേ പ്രത്യേക ട്രെയിനുകൾ പ്രഖ്യാപിച്ചു. ചെന്നൈ എഗ്‌മൂർ - തിരുവനന്തപുരം നോർത്ത്, ഹുബ്ബള്ളി - കൊല്ലം എന്നീ റൂട്ടുകളിലാണ് ഈ സ്പെഷൽ സർവിസുകൾ നടത്തുന്നത്.

ചെന്നൈ എഗ്‌മൂർ - തിരുവനന്തപുരം നോർത്ത് സ്പെഷൽ (06113/06114) ട്രെയിൻ ചെന്നൈയിൽ നിന്ന് ഇന്നും  മടക്കയാത്ര ഏപ്രിൽ 5 നുമാണ് ക്രമീകരിച്ചിരിക്കുന്നത്.  ഇന്ന് രാത്രി 11.55-ന് ചെന്നൈ എഗ്‌മൂറിൽ നിന്ന് പുറപ്പെട്ട് നാളെ വൈകീട്ട് 6 ന് തിരുവനന്തപുരം നോർത്തിൽ എത്തും.  തിരുവനന്തപുരം നോർത്തിൽ നിന്ന് ഏപ്രിൽ 5-ന് വൈകീട്ട് 5.15-ന് പുറപ്പെടുന്ന ഈ ട്രെയിൻ പിറ്റേദിവസം രാവിലെ 11.30-ന് ചെന്നൈ എഗ്‌മൂറിൽ എത്തും. 4 എസി ത്രീ ടയർ, 10 സ്ലീപ്പർ ക്ലാസ്, 4 ജനറൽ സെക്കൻഡ് ക്ലാസ്, 2 സെക്കൻഡ് ക്ലാസ് (ദിവ്യാംഗ സൗഹൃദം) കോച്ചുകളാണ് ഉണ്ടാവുക. പെരമ്പൂർ, അരക്കോണം, കാട്പാടി, ജോലാർപേട്ട, സേലം, ഈറോഡ്, തിരുപ്പൂർ, പോടന്നൂർ, പാലക്കാട്, തൃശൂർ, ആലുവ, എറണാകുളം ടൗൺ, കോട്ടയം, ചങ്ങനാശ്ശേരി, തിരുവല്ല, ചെങ്ങന്നൂർ, മാവേലിക്കര, കായംകുളം, കൊല്ലം എന്നിവയാണ് പ്രധാന സ്റ്റോപ്പുകൾ.

ALSO READ: നാറ്റോ 'കടലാസ് പുലി'; സഖ്യം വിടുമെന്ന് ട്രംപിന്റെ പരസ്യ ഭീഷണി

ഇന്ന് രാവിലെ 7.05-ന് ഹുബ്ബള്ളിയിൽ നിന്ന് പുറപ്പെടുന്ന  ഹുബ്ബള്ളി - കൊല്ലം - ഹുബ്ബള്ളി സ്പെഷൽ  നാളെ  രാവിലെ 07.00-ന് കൊല്ലത്തെത്തും. തിരിച്ച് നാളെ  രാവിലെ 10.45-ന് കൊല്ലത്ത് നിന്ന് പുറപ്പെടുന്ന ട്രെയിൻ പിറ്റേദിവസം രാവിലെ 10.40-ന് ഹുബ്ബള്ളിയിലെത്തും.  1 എസി ടൂ ടയർ, 3 എസി ത്രീ ടയർ, 7 സ്ലീപ്പർ ക്ലാസ്, 4 ജനറൽ സെക്കൻഡ് ക്ലാസ്, 2 സെക്കൻഡ് ക്ലാസ് (ദിവ്യാംഗ സൗഹൃദം) എന്നീ കോച്ചുകളാണ് ഇതിൽ ഉൾപ്പെടുത്തിയിട്ടുള്ളത്.   ഹാവേരി, ദാവൻഗരെ, തുമകൂരു, എസ്.എം.വി.ടി ബംഗളൂരു, കൃഷ്ണരാജപുരം, ബംഗാർപേട്ട്, സേലം, ഈറോഡ്, പാലക്കാട്, തൃശൂർ, എറണാകുളം ടൗൺ, കോട്ടയം, ചെങ്ങന്നൂർ, കായംകുളം എന്നിവിടങ്ങളിൽ സ്റ്റോപ്പുകൾ ഉണ്ടാകും.