ദുബൈ: ഇറാനില്‍നിന്നുള്ള ഡ്രോണ്‍ വിജയകരമായി തകര്‍ത്തതിനെത്തുടര്‍ന്ന് അവശിഷ്ടങ്ങള്‍ പതിച്ച് അബൂദബിയില്‍ ഒരാള്‍ക്ക് പരുക്ക്. മുസഫ ഐകാഡ് (ICAD) സിറ്റിയിലുള്ള റിന്‍ സിസ്റ്റംസ് കമ്പനിയിലാണ് സംഭവം. ഘാന സ്വദേശിക്കാണ് പരുക്കേറ്റത്. കൂടുതല്‍ വിവരങ്ങള്‍ക്കായി ഔദ്യോഗിക കേന്ദ്രങ്ങളെ മാത്രം ആശ്രയിക്കണമെന്നും, ഊഹാപോഹങ്ങളും സ്ഥിരീകരിക്കാത്ത വാര്‍ത്തകളും പ്രചരിപ്പിക്കുന്നത് ഒഴിവാക്കണമെന്നും അധികൃതര്‍ പൊതുജനങ്ങളോട് അഭ്യര്‍ത്ഥിച്ചു.
മിസൈല്‍, ഡ്രോണ്‍ ഭീഷണികളെത്തുടര്‍ന്ന് രാജ്യത്തെ സാഹചര്യം നിലവില്‍ സുരക്ഷിതമാണെന്ന് സ്ഥിരീകരിച്ച് ഇന്ന് രാവിലെ യുഎഇ നിവാസികള്‍ക്ക് ആഭ്യന്തര മന്ത്രാലയത്തില്‍ നിന്ന് മൊബൈല്‍ അലര്‍ട്ടുകള്‍ ലഭിച്ചു. ജനങ്ങളുടെ സഹകരണത്തിന് നന്ദി അറിയിച്ച അധികൃതര്‍, രാജ്യത്തെ സാധാരണ പ്രവര്‍ത്തനങ്ങള്‍ പുനരാരംഭിക്കാമെന്ന് ഉറപ്പുനല്‍കി.
കൂടുതല്‍ ജാഗ്രത പാലിക്കാനും സുരക്ഷാ നിര്‍ദ്ദേശങ്ങള്‍ പിന്തുടരാനും, സാഹചര്യങ്ങള്‍ക്കനുസരിച്ചുള്ള പുതിയ വിവരങ്ങള്‍ക്ക് ഔദ്യോഗിക സംവിധാനങ്ങള്‍ പരിശോധിക്കാനും അധികൃതര്‍ ജനങ്ങള്‍ക്ക് നിര്‍ദ്ദേശം നല്‍കി.
വ്യോമപ്രതിരോധ സംവിധാനങ്ങള്‍ വിജയകരമായി ലക്ഷ്യം ഭേദിച്ചതിന് പിന്നാലെ അവശിഷ്ടങ്ങള്‍ പതിച്ച് ഞായറാഴ്ച ഖോര്‍ഫക്കാന്‍ തുറമുഖത്തുണ്ടായ സംഭവത്തില്‍, സ്ഥലത്ത് തീപിടുത്തമുണ്ടായിരുന്നു. സംഭവത്തില്‍ ഗുരുതരമായി പരിക്കേറ്റ ഒരു നേപ്പാള്‍ സ്വദേശിയെ ചികിത്സയ്ക്കായി ആശുപത്രിയിലേക്ക് മാറ്റി. മൂന്ന് പാകിസ്ഥാന്‍ സ്വദേശികള്‍ക്കും നിസ്സാരമായ പരിക്കുകളേറ്റിട്ടുണ്ട്.

Summary Authorities in Abu Dhabi are managing an incident at Rinn Systems Company in Musaffah—ICAD City after shrapnel fell following a successful air defence interception. A Ghanaian national sustained moderate injuries in the incident.