‍അബുദബി: പശ്ചിമേഷ്യൻ മേഖല അതീവ നിർണായകമായ ഒരു ഘട്ടത്തിലൂടെയാണ് കടന്നുപോകുന്നതെന്നും, ഈ സാഹചര്യത്തിൽ നയതന്ത്രപരമായ അഭിനന്ദനങ്ങളുടെ സമയം കഴിഞ്ഞുവെന്നും യുഎഇ പ്രസിഡന്റിന്റെ നയതന്ത്ര ഉപദേഷ്ടാവ് ഡോ. അൻവർ ഗർഗാഷ്. നിലവിലെ സാഹചര്യത്തിൽ സത്യസന്ധതയും കൃത്യമായ നിലപാടുകളുമാണ് അനിവാര്യമെന്ന് അദ്ദേഹം ചൂണ്ടിക്കാട്ടി.

ഗൾഫ് രാജ്യങ്ങൾക്കെതിരായ ഇറാന്റെ നീക്കങ്ങളിൽ യുഎഇ സ്വീകരിച്ച ഉറച്ച നിലപാടിൽ ആരും അത്ഭുതപ്പെടേണ്ടതില്ലെന്ന് അദ്ദേഹം വ്യക്തമാക്കി. അനാവശ്യമായ സംഘർഷങ്ങൾ ഉടലെടുക്കുമ്പോൾ നയതന്ത്രപരമായ വ്യക്തത അനിവാര്യമാണെന്നും ഗർഗാഷ് കൂട്ടിച്ചേർത്തു.

മേഖലയുടെ സുരക്ഷയും സ്ഥിരതയും ഉറപ്പാക്കാൻ വരുംദിവസങ്ങളിൽ ഗൾഫ് രാജ്യങ്ങളുടെ ഭാഗത്തുനിന്ന് ഏകീകൃതവും നിർണ്ണായകവുമായ നിലപാട് ഉണ്ടാകണമെന്നും യുഎഇ വിദേശകാര്യ മന്ത്രാലയം പുറപ്പെടുവിച്ച വെടിനിർത്തൽ പ്രസ്താവനയ്ക്ക് വലിയ രീതിയിലുള്ള പൊതുജന പിന്തുണ ലഭിച്ചിട്ടുണ്ടെന്നും ഇത് കൃത്യമായ നിലപാടുകൾക്കുള്ള ജനകീയ അംഗീകാരമായി അദ്ദേഹം ചൂണ്ടിക്കാട്ടി.

ALSO READ: വെടിനിര്‍ത്തല്‍ പ്രഖ്യാപനത്തിന് പിന്നാലെ ബഹ്‌റൈന്‍ വ്യോമപാത വീണ്ടും തുറന്നു

ഗൾഫ് രാജ്യങ്ങൾക്ക് നേരെ ഇറാൻ നടത്തുന്ന നീക്കങ്ങൾ ശക്തിയുടെ അടയാളമല്ല, മറിച്ച് അത് ധാർഷ്ട്യമാണ് കാണിക്കുന്നതെന്ന് അദ്ദേഹം നേരത്തെയും വിമർശിച്ചിരുന്നു.

"മേഖലയുടെ സുരക്ഷാ കാര്യങ്ങളിൽ ഇനി ഒളിച്ചുകളി സാധ്യമല്ല. അഭിനന്ദനങ്ങളുടെ കാലം കഴിഞ്ഞു; ഇപ്പോൾ സത്യസന്ധതയാണ് നമുക്ക് ആവശ്യം. നമ്മുടെ നിലപാടുകൾ സംശയാതീതമായി വ്യക്തമായിരിക്കണം. ഡോ. അൻവർ ഗർഗാഷ് കൂട്ടിച്ചേർത്തു. 

മേഖലയിൽ സംഘർഷാവസ്ഥ നിലനിൽക്കുന്ന സാഹചര്യത്തിൽ, യുഎഇയുടെ വിദേശനയം കൂടുതൽ വ്യക്തവും ദൃഢവുമാണെന്ന് വ്യക്തമാക്കുന്നതാണ് ഗർഗാഷിന്റെ പ്രസ്താവന. വെടിനിർത്തലിനായുള്ള ആഹ്വാനങ്ങൾക്കൊപ്പം തന്നെ, രാജ്യത്തിന്റെ സുരക്ഷയിൽ വിട്ടുവീഴ്ചയില്ലാത്ത സമീപനമായിരിക്കും യുഎഇ സ്വീകരിക്കുക എന്ന സൂചനയും ഇത് നൽകുന്നു.

Stability and security are the keys to a better future in the Middle East. Read the latest insights from the UAE Presidential Advisor on regional peace and honest diplomacy.