മനാമ: അമേരിക്ക, ഇസ്‌റാഈല്‍, ഇറാന്‍ എന്നിവര്‍ തമ്മിലുള്ള വെടിനിര്‍ത്തല്‍ പ്രഖ്യാപനത്തിന് പിന്നാലെ ബഹ്‌റൈന്‍ തങ്ങളുടെ വ്യോമപാത വീണ്ടും തുറന്നു. വെടിനിര്‍ത്തല്‍ പ്രഖ്യാപനം വന്ന് മണിക്കൂറുകള്‍ക്ക് ശേഷമാണ് നടപടി. നേരത്തെ സിറിയയും ഇറാഖും സമാനമായ രീതിയില്‍ വ്യോമപാതകള്‍ തുറന്നിരുന്നു.
മേഖലയിലെ സംഘര്‍ഷങ്ങളുടെ പശ്ചാത്തലത്തില്‍ മുന്‍കരുതല്‍ നടപടിയെന്ന നിലയിലാണ് ബഹ്‌റൈന്‍ താത്കാലികമായി വ്യോമപാത അടച്ചിരുന്നത്. സുരക്ഷാ മാനദണ്ഡങ്ങള്‍ കര്‍ശനമായി പാലിച്ച് വ്യോമഗതാഗതം സുഗമമാക്കുന്നതിനും യാത്രക്കാരുടെ സുരക്ഷ ഉറപ്പാക്കുന്നതിനും പ്രതിജ്ഞാബദ്ധമാണെന്ന് ഗതാഗത - വാര്‍ത്താവിനിമയ മന്ത്രാലയത്തിന് കീഴിലുള്ള ബഹ്‌റൈന്‍ സിവില്‍ ഏവിയേഷന്‍ അഫയേഴ്‌സ് വ്യക്തമാക്കി. 
അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് മുന്നറിയിപ്പ് നല്‍കിയിരുന്ന വലിയ ആക്രമണങ്ങള്‍ ഒഴിവാക്കുന്നതിനായി, അമേരിക്കയും ഇറാനും തമ്മില്‍ രണ്ടാഴ്ചത്തെ വെടിനിര്‍ത്തലിനും ഹോര്‍മുസ് കടലിടുക്ക് താത്കാലികമായി തുറക്കുന്നതിനും കഴിഞ്ഞ ദിവസം ധാരണയായിരുന്നു. ഇതിന് പിന്നാലെയാണ് ഗള്‍ഫ് മേഖലയിലെ രാജ്യങ്ങള്‍ വ്യോമഗതാഗതം വേഗത്തില്‍ സാധാരണ നിലയിലാക്കുന്നത്.

English Summary: Bahrain has opened its airspace hours after the announcement of a ceasefire between the US, Israel, and Iran, and following similar steps by Syria and Iraq. Bahrain's Civil Aviation Affairs at the Transport and Telecommunications Ministry announced the reopening of airspace over the Kingdom of Bahrain, after a temporary closure that was implemented as a precautionary measure in light of recent developments in the region.