ദുബൈ: എമിറേറ്റ്‌സിലെ റിയല്‍ എസ്റ്റേറ്റ് വിസയുമായി ബന്ധപ്പെട്ട നടപടിക്രമങ്ങള്‍ കൂടുതല്‍ എളുപ്പമാക്കുന്നതിനായി ദുബൈ ജനറല്‍ ഡയറക്ടറേറ്റ് ഓഫ് ഐഡന്റിറ്റി ആന്‍ഡ് ഫോറിനേഴ്‌സ് അഫയേഴ്‌സും (ജി.ഡി.ആര്‍.എഫ്.എ) ദുബൈ ലാന്‍ഡ് ഡിപ്പാര്‍ട്ട്‌മെന്റും (ഡി.എല്‍.ഡി) ധാരണാപത്രത്തില്‍ ഒപ്പുവെച്ചു. സര്‍ക്കാര്‍ സേവനങ്ങള്‍ കൂടുതല്‍ കാര്യക്ഷമമാക്കുക, നിക്ഷേപകര്‍ക്ക് കൂടുതല്‍ ആത്മവിശ്വാസം നല്‍കുക എന്നിവ ലക്ഷ്യമിട്ടാണ് ഇരു വകുപ്പുകളും കൈകോര്‍ക്കുന്നത്.
ദുബൈയില്‍ സ്വന്തമായി വസ്തുവകകള്‍ ഉള്ളവര്‍ക്കും നിക്ഷേപകര്‍ക്കും വേഗത്തില്‍ വിസ ലഭിക്കാന്‍ ഇത് സഹായിക്കും. ഡി.എല്‍.ഡി നല്‍കിയിരുന്ന സുപ്രധാനമായ മൂന്ന് റിയല്‍ എസ്റ്റേറ്റ് റെസിഡന്‍സി സേവനങ്ങള്‍ ഇനിമുതല്‍ നേരിട്ട് ജി.ഡി.ആര്‍.എഫ്.എയുടെ സിസ്റ്റത്തിലേക്ക് മാറ്റും. ഗോള്‍ഡന്‍ റെസിഡന്‍സി, റിട്ടയറീ റെസിഡന്‍സി, പ്രോപ്പര്‍ട്ടി റെസിഡന്‍സി എന്നീ സേവനങ്ങളാണ് മാറ്റുക.
ഈ സേവനങ്ങള്‍ എല്ലാം ഒറ്റ വഴിയിലൂടെ ലഭ്യമാവുന്നതോടെ വ്യത്യസ്ത ഓഫിസുകളിലും സര്‍ക്കാര്‍ വെബ്‌സൈറ്റുകളിലും കയറിയിറങ്ങേണ്ടതില്ല. വകുപ്പുകള്‍ തമ്മിലുള്ള ഡാറ്റാ കൈമാറ്റം എളുപ്പമാകുന്നതോടെ വിസ നടപടിക്രമങ്ങള്‍ കൂടുതല്‍ വേഗത്തിലാകുകയും സുതാര്യമാകുകയും ചെയ്യും.
ജി.ഡി.ആര്‍.എഫ്.എ ദുബൈ മേധാവി ലഫ്റ്റനന്റ് ജനറല്‍ മുഹമ്മദ് അഹ്മദ് അല്‍ മര്‍റിയും ദുബൈ ലാന്‍ഡ് ഡിപ്പാര്‍ട്ട്‌മെന്റ് ഡയറക്ടര്‍ ജനറല്‍ ഉമര്‍ ഹമദ് ബു ഷെഹാബുമാണ് കരാറില്‍ ഒപ്പുവെച്ചത്.
ദുബൈയിലേക്ക് കൂടുതല്‍ നിക്ഷേപങ്ങള്‍ ആകര്‍ഷിക്കാനും ബിസിനസ്സ് അന്തരീക്ഷം കൂടുതല്‍ മെച്ചപ്പെടുത്താനും പുതിയ നടപടിയിലൂടെ സാധിക്കും. 'ദുബൈ ഇക്കണോമിക് അജണ്ട ഡി33' ന്റെ ഭാഗമായാണ് പരിഷ്‌കാരങ്ങള്‍.

ALSO READ: യു.എ.ഇ ദേശീയ ഗാനം ആലപിച്ച് വൈറലായ ഇന്ത്യന്‍ വിദ്യാര്‍ഥികള്‍ക്ക് നന്ദി പറഞ്ഞ് ശൈഖ് ഹംദാന്‍; വൈറല്‍ വിഡിയോ പങ്കിട്ടു

Summary: The General Directorate of Residency and Foreigners Affairs (GDRFA) and the Dubai Land Department (DLD) have signed a Memorandum of Understanding (MoU) to simplify and expedite real estate visa procedures.