ദുബൈ: പരമ്പരാഗത ഇന്ത്യന്‍ ക്ലാസിക്കല്‍ ഉപകരണങ്ങള്‍ ഉപയോഗിച്ച് യു.എ.ഇ ദേശീയ ഗാനം ആലപിച്ച് ശ്രദ്ധപിടിച്ചുപറ്റിയ ഇന്ത്യന്‍ വിദ്യാര്‍ഥികള്‍ക്ക് നന്ദി പറഞ്ഞ് ദുബൈ കിരീടാവകാശിയും യു.എ.ഇ ഉപപ്രധാനമന്ത്രിയും പ്രതിരോധ മന്ത്രിയും ദുബൈ എക്‌സിക്യൂട്ടീവ് കൗണ്‍സില്‍ ചെയര്‍മാനുമായ ശൈഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം. സമൂഹമാധ്യമങ്ങളില്‍ വൈറലായ വിഡിയോ അദ്ദേഹം തന്റെ ഇന്‍സ്റ്റാഗ്രാം സ്റ്റോറിയായി പങ്കിട്ടു.

യു.എ.ഇയിലെ ഇന്ത്യന്‍ വിദ്യാര്‍ഥികളാണ് ക്ലാസിക്കല്‍ ഉപകരണങ്ങള്‍ മാത്രം ഉപയോഗിച്ച് ദേശീയ ഗാനം അവതരിപ്പിച്ചത്. ഇതിന്റെ വിഡിയോ 'മല്‍ഹാര്‍ യു.എ.ഇ' എന്ന ഇന്‍സ്റ്റഗ്രാം അക്കൗണ്ടില്‍ പോസ്റ്റ് ചെയ്തതോടെ ശ്രദ്ധിക്കപ്പെട്ടു. ശൈഖ് ഹംദാന്‍ ഇന്‍സ്റ്റാഗ്രാം സ്റ്റോറിയില്‍ 'നന്ദി!' എന്ന അടിക്കുറിപ്പോടെ റീല്‍ പങ്കിട്ടു. ഇതോടൊപ്പം ഇന്ത്യന്‍ ദേശീയ പതാകയിലെ ത്രിവര്‍ണത്തെ അനുസ്മരിച്ച് അതേ നിറങ്ങളില്‍ മൂന്ന് ഹാര്‍ട്ട് ഇമോജികളും ശൈഖ് ഹംദാന്‍ നല്‍കി.

 

 

വിദ്യാര്‍ഥികളുടെ സംഗീത പ്രതിഭയ്‌ക്കൊപ്പം യു.എ.ഇയോടുള്ള അവരുടെ ബഹുമാനവും സ്‌നേഹവും വ്യക്തമാക്കുന്നതാണ് വിഡിയോ. അധിവസിക്കുന്ന രാജ്യത്തിനുള്ള സംഗീത ആദരാഞ്ജലിയാണിത്. സാംസ്‌കാരിക സ്വത്വങ്ങളുടെ ഇഴുകിച്ചേരല്‍, ആഴത്തിലുള്ള വൈകാരിക ബന്ധം, സഹവര്‍ത്തിത്വം എന്നിവ കൂടി ഇത് പ്രതിഫലിപ്പിക്കുന്നു.

ഹാര്‍മോണിയം, തബല, തബല തരംഗ്, ധോലക്, പഖവാജ്, സിത്താര്‍, സരോദ്, ഫ്‌ലൂട്ട്, ജുവല്‍തരംഗ് തുടങ്ങിയ പരമ്പരാഗത ഉപകരണങ്ങള്‍ വായിച്ചുകൊണ്ട് 13 ഇന്ത്യന്‍ വിദ്യാര്‍ഥികള്‍ യു.എ.ഇ ദേശീയ ഗാനത്തിന്റെ സവിശേഷമായ ആലാപനം സാധ്യമാക്കുകയായിരുന്നു. യു.എ.ഇ പതാകയുടെ നിറങ്ങളിലുള്ള സ്‌കാര്‍ഫുകളും വെളുത്ത പരമ്പരാഗത ഇന്ത്യന്‍ വസ്ത്രങ്ങളും ധരിച്ചാണ് കുട്ടികളുടെ പ്രകടനം. വെളുത്ത പശ്ചാത്തലത്തില്‍ ഇവ ചിത്രീകരിച്ചതോടെ ഏറെ ഹൃദ്യമായി. സംഗീതത്തിന്റെ ലാളിത്യവും തന്മയത്വവും കുട്ടികളുടെ ഇഴുകിച്ചേരലും കാഴ്ചക്കാരന് അനുഭവവേദ്യമാവുന്നു.

 

 

 

 

 

View this post on Instagram

 

 

 

 

 

 

 

 

 

 

 

A post shared by MalhaarUAE (@malhaaruae)

യു.എ.ഇയെ സ്വന്തം നാടായി കരുതുന്ന എല്ലാവരുടെയും സംഭാവനകള്‍ക്ക് ഇമാറാത്തികള്‍ നല്‍കുന്ന അംഗീകാരമാണ് ശൈഖ് ഹംദാന്റെ നന്ദി പ്രകടനം. കുട്ടികളുടെ പ്രായമോ പശ്ചാത്തലമോ പരിഗണിക്കാതെ അദ്ദേഹം അതിന് കൈയൊപ്പ് ചാര്‍ത്തി. സമ്പന്നമായ വൈവിധ്യത്തിനും ഐക്യത്തിനും പേരുകേട്ട ഒരു രാജ്യത്ത്, രാജ്യങ്ങള്‍ക്കിടയില്‍ ബഹുമാനവും ധാരണയും വളര്‍ത്തിയെടുക്കുന്നതിനുള്ള യു.എ.ഇയുടെ പ്രതിബദ്ധത കൂടി ഇത് അനാവരണം ചെയ്യുന്നു.

ALSO READ: ഇന്നും നാളെയും കാറ്റിനും മഴയ്ക്കും സാധ്യത; രണ്ടുദിവസം യെല്ലോ അലര്‍ട്ട്; മുന്നറിയിപ്പുമായി ദുബൈ, അബൂദബി പൊലിസ് | UAE Weather Alert

Summary: Sheikh Hamdan bin Mohammed bin Rashid Al Maktoum, Crown Prince of Dubai, Deputy Prime Minister and Minister of Defence of the UAE, and Chairman of The Executive Council of Dubai, has expressed his thanks to Indian students who have performed the UAE national anthem using traditional Indian classical instruments.