ആലപ്പുഴ: സംസ്ഥാന തലത്തിൽ സി.പി.എമ്മിന് അഭിമാനപ്പോരാട്ടം നടക്കുന്ന അമ്പലപ്പുഴയിൽ വിജയ സാധ്യതയിൽ സി.പി.എമ്മിന് ആശങ്ക. ജയിച്ചാൽ തന്നെ കുറഞ്ഞ വോട്ടിനെന്നും വിലയിരുത്തൽ. ജി.സുധാകരന്റെ സ്ഥാനാർഥിത്വം കൊണ്ടുണ്ടായ പ്രതികൂല ഘടകങ്ങൾ കാരണം എൽ.ഡി.എഫ് പിന്നിൽ പോകാൻ സാധ്യതയുണ്ടെന്നാണ് സി.പി.എം പ്രാഥമിക വിലയിരുത്തൽ. അമ്പലപ്പുഴയിൽ പതിവായി എൽ.ഡി.എഫിന് കിട്ടിയിരുന്ന വോട്ടുകൾ ലഭിച്ചില്ല. ഭരണവിരുദ്ധ വികാരം, ജി.സുധാകരൻ എതിർ സ്ഥാനാർഥി ആയത്, പാർട്ടി അനുഭാവികൾ, നിഷ്പക്ഷമതികൾ എന്നിവരുടെ വോട്ടുകളിലെ ചോർച്ച തുടങ്ങിയ പ്രതികൂല ഘടകങ്ങളായി. സിറ്റിങ് സീറ്റ് നഷ്ടമാകാനുള്ള സാധ്യത വിലയിരുത്തലിലുണ്ട്.
എന്നാൽ അനുകൂല ഘടകങ്ങൾ വോട്ടായി മാറിയാൽ എച്ച്. സലാമിന് 5000ൽപരം വോട്ടിന്റെ ഭൂരിപക്ഷം ലഭിക്കും. പരമ്പരാഗത സി.പി.എം വോട്ടുകളും ഉറച്ച പാർട്ടി വോട്ടുകളും ചോർന്നിട്ടില്ല. ജി.സുധാകരന്റെ വ്യക്തപ്രഭാവം കൊണ്ട് സലാമിന് ലഭിക്കുമായിരുന്ന വോട്ടുകൾ നഷ്ടമായി. ബി.ജെ.പി വോട്ടുകൾ ജി.സുധാകരന് ലഭിച്ചിട്ടുണ്ടെന്നും പാർട്ടി നേതൃത്വം വിലയിരുത്തുന്നു.

ജി.സുധാകനെ വച്ച് സി.പി.എമ്മിന്റെ ഉരുക്കു കോട്ടയിൽ വിള്ളൽ വീഴ്ത്താനായെന്നാണ് യു.ഡി.എഫ് നേതൃത്വത്തിന്റെ വിലയിരുത്തൽ.
എം.എൽ.എയും മന്ത്രിയുമായി ജി. സുധാകരൻ നടത്തിയ പ്രവർത്തനങ്ങൾ അനുകൂലമായി മാറി. ബി.ജെ.പി സ്ഥാനാർഥി ശക്തനല്ലാത്തതും ഗുണകരമായെന്നാണ് ഇവരുടെ പ്രതീക്ഷ. അതേസമയം അമ്പലപ്പുഴയിൽ ഇത്തവണ 80 ശതമാനത്തിന് മുകളിൽ പോളിങ് ഉയർന്നിട്ടും വോട്ടർമാരുടെ എണ്ണം കൂടിയിരുന്നില്ല. 80.75 ശതമാനമാണ് ഇക്കുറി പോളിങ്. 2021ൽ 76.82 ശതമാനമായിരുന്നു. ആകെയുള്ള 1,71,203 വോട്ടർമാരിൽ 1,38,251 പേരാണ് വോട്ട് ചെയ്തത്. കഴിഞ്ഞ തവണ 1,37,626 പേരാണ് വോട്ട് ചെയ്തത്. 3.93 ശതമാനം പോളിങ് കൂടിയിട്ടും 625 വോട്ട് മാത്രമാണ് വർധിച്ചത്.

50,000 വോട്ട് ഭൂരിപക്ഷം നേടുമെന്ന് ജി. സുധാകരൻ
ആലപ്പുഴ: ഏറെ വിജയപ്രതീക്ഷയുണ്ടെന്ന് അമ്പലപ്പുഴയിൽ യു.ഡി.എഫ് പിന്തുണയോടെ സ്വതന്ത്ര സ്ഥാനാർഥിയായി മത്സരിക്കുന്ന ജി.സുധാകരൻ. തനിക്ക് ആദ്യം മുതൽ വലിയ പ്രതീക്ഷകളാണുള്ളതെന്നും അതിൽ മാറ്റമില്ലെന്നും ജി.സുധാകരൻ പറഞ്ഞു. എൽ.ഡി.എഫ് ജനങ്ങളെ ഭിന്നിപ്പിക്കാൻ ശ്രമിച്ചു. യു.ഡി.എഫ് പ്രവർത്തകർ ആവേശകരമായ പ്രവർത്തനമാണ് നടത്തിയത്. അമ്പതിനായിരം വോട്ടിന്റെ ഭൂരിപക്ഷത്തിൽ താൻ ജയിക്കുമെന്നും ജി.സുധാകരൻ പറഞ്ഞു.

വിജയത്തിൽ ആശയക്കുഴപ്പമില്ലെന്ന് എച്ച് സലാം

ആലപ്പുഴ: മണ്ഡലത്തിൽ എൽ.ഡി.എഫ് വിജയത്തിൽ ആശയക്കുഴപ്പം ഇല്ലെന്ന് എച്ച്.സലാം. ഏറെ വാശിയേറിയ പോരാട്ടത്തിൽ അഭിമാനകരമായ വിജയം നേടും. താൻ 62,000 ലധികം വോട്ട് നേടും. ഡീലിന്റെ ഭാഗമായി ജി.സുധാകരൻ നേടുന്ന ബി.ജെ.പി.യുടെ വോട്ടിന്റെ അളവിനനുസരിച്ച് ഭൂരിപക്ഷത്തിൽ വ്യത്യാസം വരും. ബി.ജെ.പി 20000 ന് മുകളിൽ നേടിയാൽ തന്റെ ഭൂരിപക്ഷം 10000 കടക്കുമെന്നും എച്ച്. സലാം പറഞ്ഞു.