ദുബൈ: റസിഡൻഷ്യൽ ഏരിയയിൽ അഭ്യാസപ്രകടനം നടത്തിയ വാഹനം പിടിച്ചെടുത്ത് ദുബൈ പൊലിസ്. ഊദ് അൽ മുതീന പ്രദേശത്താണ് താമസക്കാർക്ക് വലിയ രീതിയിൽ ശബ്ദശല്യം ഉണ്ടാക്കിക്കൊണ്ട് യുവാവ് അഭ്യാസ പ്രകടനം നടത്തിയത്. ടയറുകൾ റോഡിൽ ഉരച്ച് മനഃപൂർവ്വം വലിയ ശബ്ദമുണ്ടാക്കിയതിനാണ് പൊലിസ് നടപടി സ്വീകരിച്ചത്.

രഹസ്യ വിവരത്തെ തുടർന്ന് സ്ഥലത്തെത്തിയ ട്രാഫിക് പട്രോളിംഗ് വിഭാഗമാണ് നിയമലംഘനം നടത്തിയ ഡ്രൈവറെ തടഞ്ഞുനിർത്തിയത്. തുടർന്ന് നടത്തിയ ചോദ്യം ചെയ്യലിൽ ഡ്രൈവർ കുറ്റം സമ്മതിച്ചു. ഇതേത്തുടർന്ന് വാഹനം ഉടനടി കണ്ടുകെട്ടുകയും ഡ്രൈവർക്കെതിരെ കർശനമായ നിയമനടപടികൾ ആരംഭിക്കുകയുമായിരുന്നു.

വാഹനങ്ങളിൽ വരുത്തുന്ന അനധികൃത മാറ്റങ്ങളും സ്റ്റണ്ടുകളും വെറുമൊരു ഗതാഗത നിയമലംഘനം മാത്രമല്ലെന്ന് ദുബൈ പൊലിസ് മുന്നറിയിപ്പ് നൽകി. ഇത്തരം പ്രവൃത്തികൾ ജനങ്ങളുടെ സമാധാനപരമായ ജീവിതത്തെയും സുരക്ഷിതത്വത്തെയും ബാധിക്കുന്ന നിഷേധാത്മക പെരുമാറ്റമാണെന്ന് ട്രാഫിക് ജനറൽ ഡിപ്പാർട്ട്‌മെന്റ് ഡെപ്യൂട്ടി ഡയറക്ടർ ബ്രിഗേഡിയർ എസ്സാം ഇബ്രാഹിം അൽ അവാർ വ്യക്തമാക്കി.

അശ്രദ്ധമായ ഡ്രൈവിംഗ് മൂലം പൊതുസ്വത്തിന് കേടുപാടുകൾ സംഭവിച്ചതായും പൊലിസ് കണ്ടെത്തിയിട്ടുണ്ട്. ഇത്തരം പെരുമാറ്റം ഡ്രൈവറുടെയും മറ്റ് റോഡ് ഉപയോക്താക്കളുടെയും ജീവന് വലിയ ഭീഷണിയാണ് ഉയർത്തുന്നത്. പ്രത്യേകിച്ച് കുടുംബങ്ങൾ താമസിക്കുന്ന മേഖലകളിൽ ഇത്തരം പ്രവൃത്തികൾ ജനങ്ങളിൽ ഭയവും ആശങ്കയും ഉണ്ടാക്കുന്നുണ്ട്.

റോഡുകൾ അഭ്യാസപ്രകടനങ്ങൾ നടത്താനോ അപകടകരമായ പരീക്ഷണങ്ങൾക്കോ ഉള്ള സ്ഥലമല്ലെന്ന് അധികൃതർ ഓർമ്മിപ്പിച്ചു. പൊതുസമാധാനത്തിന് ഭംഗം വരുത്തുന്ന ഇത്തരം നിയമലംഘനങ്ങളോട് പൊലിസ് യാതൊരു വിട്ടുവീഴ്ചയും കാണിക്കില്ല. നിയമം ലംഘിക്കുന്നവർ കർശനമായ നിയമനടപടികൾ നേരിടേണ്ടി വരുമെന്നും ബ്രിഗേഡിയർ എസ്സാം ഇബ്രാഹിം അറിയിച്ചു.

ഗുരുതരമായ നിയമലംഘനങ്ങൾ നടത്തുന്നവർക്കെതിരെ 2023 ലെ ലോക്കൽ ഡിക്രി നമ്പർ 30 പ്രകാരമായിരിക്കും നടപടി. പിടിച്ചെടുത്ത വാഹനങ്ങൾ വിട്ടുകിട്ടണമെങ്കിൽ ഡ്രൈവർമാർ 50,000 ദിർഹം വരെ പിഴയായി ഒടുക്കേണ്ടി വരും. ട്രാഫിക് സുരക്ഷ ഉറപ്പാക്കാൻ പൊതുജനങ്ങൾ നിയമങ്ങൾ കർശനമായി പാലിക്കണമെന്ന് ദുബൈ പൊലിസ് അഭ്യർത്ഥിച്ചു.

ALSO READ: ദുബൈയിൽ ജൂൺ മുതൽ സാലിക് ടോളിന് അഞ്ച് ശതമാനം വാറ്റ് ബാധകം

dubai police seized a vehicle after a driver performed dangerous stunts and created noise disturbance in a residential area of oud al muteena. authorities warned that reckless driving and illegal vehicle modifications threaten public safety and may result in strict penalties and heavy fines.