ദുബൈ: ഐഫോണ്‍ പ്രേമികള്‍ ഏറെക്കാലമായി കാത്തിരുന്ന ആപ്പിളിന്റെ മടക്കാവുന്ന ഡിസൈന്‍ (ഐഫോണ്‍ ഫോള്‍ഡ്) ഡമ്മി ചിത്രങ്ങള്‍ പുറത്ത്. 2026 സെപ്റ്റംബറില്‍ ലോഞ്ച് ചെയ്യുമെന്ന് ഫോര്‍ബ്‌സ് റിപ്പോര്‍ട്ട് ചെയ്തു. എക്‌സ്‌ക്ലൂസീവ് ചിത്രങ്ങള്‍ എക്‌സില്‍ പ്രത്യക്ഷപ്പെട്ടു.
ആപ്പിള്‍ ഉല്‍പന്നങ്ങളെ കുറിച്ച് കൃത്യമായ പ്രവചനങ്ങളിലൂടെ പേരുകേട്ട സോണി ഡിക്‌സണ്‍ ആണ് ഡിസൈന്‍ ഡമ്മികളുടെ എക്‌സ്‌ക്ലൂസീവ് ചിത്രങ്ങള്‍ എക്‌സില്‍ പങ്കുവച്ചത്. ഐഫോണ്‍ 18 പ്രോ, ഐഫോണ്‍ 18 പ്രോ മാക്‌സ് എന്നിവയ്‌ക്കൊപ്പം ഐഫോണ്‍ ഫോള്‍ഡിന്റെ ഡിസൈന്‍ ഡമ്മികളും പുറത്തുവിടുകയായിരുന്നു.
ആപ്പിള്‍ കമ്പനി ആദ്യമായാണ് ഫോള്‍ഡബിള്‍ സ്മാര്‍ട്ട്‌ഫോണുകള്‍ പുറത്തിറക്കുന്നത്. ഐഫോണ്‍ അള്‍ട്രാ എന്ന് പേര് നല്‍കാനാണ് സാധ്യത.
ഐഫോണ്‍ 18 പ്രോയേക്കാള്‍ ഐഫോണ്‍ ഫോള്‍ഡ് അതിശയകരമാംവിധം ഒതുക്കമുള്ളതാണെന്ന് ചിത്രങ്ങളില്‍ വ്യക്തം. പരമ്പരാഗത പ്രോ മോഡലുകളുടെ ഏതാണ്ട് പകുതി മാത്രമാണ് മടക്കുമ്പോഴുള്ള വലുപ്പം. ജീന്‍സ് പോക്കറ്റുകളില്‍ പോലും അനായാസം ഒതുങ്ങുന്നതിനാല്‍ കൊണ്ട് നടക്കാന്‍ (പോര്‍ട്ടബിലിറ്റി) ഏറെ സൗകര്യപ്രദമായിരിക്കും. ആപ്പിള്‍ സാധാരണയായി പുതിയ സീരീസ് ഫോണുകള്‍ പുറത്തിറക്കാറുള്ള സെപ്റ്റംബറില്‍ തന്നെയാണ് ഐഫോണ്‍ ഫോള്‍ഡിന്റെ ലോഞ്ചിങ് വരുന്നത്. ഐഫോണ്‍ 18 സീരീസിനൊപ്പം ഫോള്‍ഡും ഇതോടെ വിപണിയിലെത്തും.

English Summary: Dummy images of Apple's highly anticipated first foldable smartphone, tentatively referred to as the 'iPhone Fold' or 'iPhone Ultra,' have surfaced online. Reliable tech tipster Sonny Dickson shared the exclusive design dummies on X (formerly Twitter). The images were revealed alongside design dummies for the upcoming iPhone 18 Pro and iPhone 18 Pro Max.