കൊച്ചി: എറണാകുളത്ത് വിവിധയിടങ്ങളില്‍ ചിക്കുന്‍ ഗുനിയ പടരുന്നു. ജില്ലയുടെ വിവിധ ഭാഗങ്ങളിലാണ് ചിക്കുന്‍ഗുനിയ കേസുകള്‍ റിപോര്‍ട്ട് ചെയ്തിരിക്കുന്നത്. ഈ സാഹചര്യത്തില്‍ ആരോഗ്യവകുപ്പ് അതീവ ജാഗ്രതാ നിര്‍ദേശം പുറപ്പെടുവിച്ചിട്ടുണ്ട്.

കുന്നുകര, ചെങ്ങമനാട് പഞ്ചായത്തുകളിലായി നിലവില്‍ ഒമ്പത് കേസുകളാണ് സ്ഥിരീകരിച്ചിരിക്കുന്നത്. കുന്നുകരയില്‍ രോഗലക്ഷണങ്ങളോടെ ചികിത്സ തേടിയ 24 പേരില്‍ ആറ് പേര്‍ക്കും ചെങ്ങമനാട്ടില്‍ മൂന്ന് പേര്‍ക്കുമാണ് രോഗം സ്ഥിരീകരിച്ചത്. പത്തൊമ്പതോളം പേര്‍ നിരീക്ഷണത്തിലുമാണ്.

ലക്ഷണങ്ങള്‍

പെട്ടെന്നുണ്ടാകുന്ന ശക്തമായ പനി.
സന്ധികളില്‍ കടുത്ത നീര്‍വീക്കവും അസഹനീയമായ വേദനയും (പ്രത്യേകിച്ച് കൈകള്‍, കാല്‍മുട്ടുകള്‍, കണങ്കാല്‍ എന്നിവിടങ്ങളില്‍).
പേശിവേദന, തലവേദന, കടുത്ത ക്ഷീണം.
ചിലരില്‍ ചര്‍മ്മത്തില്‍ ചൊറിച്ചിലോ തടിപ്പുകളോ അനുഭവപ്പെടാം.

രോഗം പടര്‍ത്തുന്ന ഈഡിസ് കൊതുകുകളുടെ ഉറവിടം നശിപ്പിക്കുന്നതിനായി ബാധിത പ്രദേശങ്ങളില്‍ ബോധവല്‍ക്കരണവും ശുചീകരണവും ഊര്‍ജിതമാക്കിയിട്ടുണ്ട്.

കൊതുകുകള്‍ വളരാന്‍ സാഹചര്യമൊരുക്കുന്നവര്‍ക്കെതിരെ 2023-ലെ പൊതുജനാരോഗ്യ നിയമം അനുസരിച്ച് കര്‍ശന നടപടി സ്വീകരിക്കും. 

വീടുകളിലോ സ്ഥാപനങ്ങളിലോ കൊതുകുപ്രജനന കേന്ദ്രങ്ങള്‍ കണ്ടെത്തിയാല്‍ 10,000 രൂപ വരെ പിഴ ഈടാക്കുമെന്ന് അധികൃതര്‍ മുന്നറിയിപ്പ് നല്‍കി.

സ്വയം ചികിത്സ ഒഴിവാക്കി ഉടന്‍ വൈദ്യസഹായം തേടണമെന്നും കൊതുകുകടി ഏല്‍ക്കാതിരിക്കാന്‍ ശ്രദ്ധിക്കണമെന്നും ആരോഗ്യ പ്രവര്‍ത്തകര്‍ നിര്‍ദേശിച്ചു.

Health authorities in Ernakulam have sounded an alert following confirmed Chikungunya cases in Kunnukara and Chengamanad, warning of a fine up to ₹10,000 for premises found with mosquito breeding sites under the Public Health Act 2023.