വയനാട്: മുണ്ടക്കൈ-ചൂരല്‍മല ദുരന്തബാധിതര്‍ക്കായുള്ള സര്‍ക്കാര്‍ ടൗണ്‍ഷിപ്പില്‍ വിള്ളല്‍ കണ്ടെത്തിയ വീട് സന്ദര്‍ശിച്ച് റവന്യൂമന്ത്രി കെ. രാജന്‍. സി.പി.എം നേതാക്കള്‍ക്കൊപ്പമാണ് മന്ത്രി വീട് സന്ദര്‍ശിച്ചത്. കഴിഞ്ഞ ദിവസമാണ് വീടിന് വിള്ളല്‍ ഉണ്ടെന്ന് വാര്‍ത്ത പുറത്തുവന്നത്. പിന്നാലെ മന്ത്രി നേരിട്ടെത്തി സ്ഥിതിഗതികള്‍ വിലയിരുത്തുകയായിരുന്നു. വിള്ളല്‍ കണ്ടെത്തിയ ഭാഗങ്ങളില്‍ മന്ത്രി തന്നെ നേരിട്ട് ഉരച്ചുനോക്കി പരിശോധന നടത്തി. 

താമസം തുടങ്ങിയശേഷമാണ് പ്രശ്‌നങ്ങള്‍ വന്നതെങ്കില്‍ ഊരാളുങ്കല്‍ സമാധാനം പറയേണ്ടിവരുമെന്നും അത് സര്‍ക്കാരിന്റെ ഗ്യാരണ്ടിയാണെന്നും കെ രാജന്‍ പറഞ്ഞു.

വീട് കൈമാറിയതിന് ശേഷവും വിള്ളലില്‍ കൂടി വെള്ളം ഇറങ്ങുന്ന സ്ഥിതിയുണ്ടായാല്‍ ഈരാളുങ്കല്‍ നടപടിയെടുക്കണമെന്നും അല്ലെങ്കില്‍ കരാര്‍ പ്രകാരമുള്ള പണം സര്‍ക്കാര്‍ നല്‍കില്ലെന്നും അദ്ദേഹം കൂട്ടിച്ചേര്‍ത്തു. 

ചൂരല്‍മല സ്വദേശി നൗഫലിന് ലഭിച്ച ഫെയ്‌സ് വണ്ണിലെ എട്ടാംനമ്പര്‍ വീടിനും തൊട്ടടുത്തുള്ള ഒന്‍പതാം നമ്പര്‍ വീടിനുമാണ് വിള്ളല്‍ വീണിരിക്കുന്നത്. ഭൂകമ്പത്തെ വരെ പ്രതിരോധിക്കാന്‍ ഉതകുന്ന വീടാണ് നിര്‍മ്മിക്കുന്നതെന്ന സര്‍ക്കാരിന്റെ അവകാശവാദം നിലനില്‍ക്കുമ്പോഴാണ് നിര്‍മ്മാണത്തിന് തൊട്ടുപിന്നാലെ വീടിന് വിള്ളല്‍ വീണിരിക്കുന്നത്. ഇത് ആക്ഷേപത്തിന് ഇടയാക്കിയിട്ടുണ്ട്. തെരഞ്ഞെടുപ്പ് ആസന്നമായ ഘട്ടത്തില്‍ ടൗണ്‍ഷിപ്പിന്റെ ഉദ്ഘാടനം സര്‍ക്കാര്‍ നടത്തുകയും 178 വീടുകളുടെ രേഖകള്‍ കൈമാറുകയും ചെയ്തിരുന്നു.

A house in a township developed cracks, prompting Minister K. Rajan to visit the site and personally inspect the issue. During the visit, he examined the damage and stated that if problems arise after residents move in, Uralungal Labour Contract Cooperative Society should address and resolve them.