ദുബൈ: മേഖലയിലെ യാത്രാ തടസ്സങ്ങൾക്ക് വിരാമമിട്ടുകൊണ്ട് യുഎഇയിലേക്കുള്ള വിമാന സർവീസുകൾ പുനരാരംഭിച്ച് ഖത്തർ എയർവേയ്‌സ്. ഏപ്രിൽ 23 മുതൽ ദുബൈ, ഷാർജ എന്നിവിടങ്ങളിലേക്ക് ദോഹയിൽ നിന്നുള്ള ദൈനംദിന സർവീസുകൾ ആരംഭിച്ചതായി എയർലൈൻ അധികൃതർ വ്യക്തമാക്കി. സിറിയൻ തലസ്ഥാനമായ ഡമാസ്കസിലേക്കുള്ള സർവീസുകൾ മെയ് 1 മുതൽ പുനരാരംഭിക്കുമെന്നും അധികൃതർ അറിയിച്ചു.

മിഡിൽ ഈസ്റ്റ് ശൃംഖല പുനർനിർമ്മിക്കുന്നതിന്റെ ഭാഗമായാണ് നീക്കം. ദുബൈ ഇന്റർനാഷണൽ എയർപോർട്ടിലേക്കും (DXB) ഷാർജ ഇന്റർനാഷണൽ എയർപോർട്ടിലേക്കും (SHJ) സർവീസുകൾ എത്തുന്നതോടെ യുഎഇ നിവാസികൾക്ക് ദോഹ വഴി ലോകത്തിന്റെ വിവിധ ഭാഗങ്ങളിലേക്ക് യാത്ര ചെയ്യാൻ സാധിക്കും. ജൂൺ പകുതിയോടെ ആഗോളതലത്തിൽ 150-ലധികം ലക്ഷ്യസ്ഥാനങ്ങളിലേക്ക് സർവീസ് വ്യാപിപ്പിക്കാനാണ് കമ്പനി ലക്ഷ്യമിടുന്നത്.

ALSO READ: ഡിജിറ്റൽ പേയ്‌മെന്റിൽ സാലിക്കിന്റെ വമ്പൻ ചുവടുവെപ്പ്; ജൂൺ 1 മുതൽ വാലെറ്റ് പാർക്കിംഗിലും സാലിക് വിപ്ലവം https://www.suprabhaatham.com/details/458455?link=dubai-introduces-salik-based-valet-parking-payments-in-partnership-with-valtrans

യാത്രക്കാർ ശ്രദ്ധിക്കേണ്ട കാര്യങ്ങൾ

സൗജന്യ തീയതി മാറ്റം: ഫെബ്രുവരി 28-നും സെപ്റ്റംബർ 15-നും ഇടയിൽ ടിക്കറ്റ് ബുക്ക് ചെയ്യുന്നവർക്ക് ഒക്ടോബർ 31 വരെയുള്ള യാത്രകളിൽ സൗജന്യമായി തീയതി മാറ്റം വരുത്താം.

റീഫണ്ട്: ഉപയോഗിക്കാത്ത ടിക്കറ്റുകൾക്ക് റീഫണ്ട് അനുവദിക്കും. എന്നാൽ ഇതിന് 28 പ്രവൃത്തി ദിവസങ്ങൾ വരെ എടുത്തേക്കാം.

ജാഗ്രത: പ്രാദേശിക സാഹചര്യങ്ങൾക്കനുസരിച്ച് ഫ്ലൈറ്റ് ഷെഡ്യൂളുകളിൽ മാറ്റം വരാൻ സാധ്യതയുള്ളതിനാൽ യാത്രക്കാർ ഔദ്യോഗിക വിവരങ്ങൾ കൃത്യമായി പരിശോധിക്കണം.

മേഖലയിലെ സംഘർഷങ്ങൾ കാരണം മാർച്ചിൽ വിമാന സർവീസുകൾക്ക് നിയന്ത്രണങ്ങൾ ഏർപ്പെടുത്തിയിരുന്നു. ഖത്തർ സിവിൽ ഏവിയേഷൻ അതോറിറ്റിയുടെ (QCAA) പുതിയ നിർദ്ദേശപ്രകാരമാണ് ഇപ്പോൾ സർവീസുകൾ പൂർണ്ണതോതിൽ പുനഃസ്ഥാപിച്ചിരിക്കുന്നത്.

qatar airways has resumed flights to the uae, restarting services to dubai and sharjah. the move restores key regional connectivity, offering more travel options for passengers and strengthening aviation links between qatar and the united arab emirates.