ന്യൂഡല്‍ഹി: ആം ആദ്മി പാര്‍ട്ടി പാര്‍ട്ടി എംപിമാരുടെ കൂറുമാറ്റത്തില്‍ പ്രതികരിച്ച് അണ്ണാ ഹസാരെ. പാര്‍ട്ടി ശരിയായ പാതയില്‍ തുടര്‍ന്നിരുന്നെങ്കില്‍ നേതാക്കള്‍ പാര്‍ട്ടി വിടുമായിരുന്നില്ലെന്ന് ഹസാരെ പറഞ്ഞു. ജനാധിപത്യത്തില്‍ എല്ലാവര്‍ക്കും അഭിപ്രായം പറയാന്‍ അവകാശമുണ്ടെന്നും അദ്ദേഹം പറഞ്ഞു. മഹാരാഷ്ട്രയിലെ അഹല്യനഗര്‍ ജില്ലയില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു ഹസാരെ. 

ഛദ്ദയടക്കമുള്ളവര്‍ക്ക് എന്തെങ്കിലും പ്രശ്‌നങ്ങള്‍ നേരിടേണ്ടി വന്നിട്ടുണ്ടാകണം. അതുകൊണ്ടായിരിക്കും അവര്‍ പാര്‍ട്ടി വിട്ടത്. 2011-12 ല്‍ ഡല്‍ഹിയില്‍ കോണ്‍ഗ്രസ് സര്‍ക്കാരും, കേന്ദ്രത്തില്‍ യുപിഎ സര്‍ക്കാരും അധികാരത്തിലിരിക്കെ ഹസാരെ നടത്തിയ അഴിമതി വിരുദ്ധ പ്രസ്ഥാനമാണ് ആം ആദ്മി പാര്‍ട്ടിക്ക് രൂപം നല്‍കിയത്. അരവിന്ദ് കെജ് രിവാള്‍, രാഘവ് ഛദ്ധ തുടങ്ങി പ്രമുഖ നേതാക്കള്‍ രാഷ്ട്രീയത്തില്‍ എത്തുന്നതും ഈ കാലയളവിലാണ്. ഹസാരെയുടെ സമരങ്ങള്‍ കോണ്‍ഗ്രസ് സര്‍ക്കാരിനെ ശിഥിലമാക്കി ബിജെപിയെ അധികാരത്തിലെത്തിക്കാനുള്ള തന്ത്രമായിരുന്നെന്ന് തുടക്കത്തിലേ വിമര്‍ശനമുയര്‍ന്നിരുന്നു. 

ALSO READ: സംസ്ഥാനത്ത് അപ്രഖ്യാപിത ലോഡ്ഷെഡ്ഡിംഗില്ല; നിലവിലുള്ളത് സാങ്കേതിക തടസ്സമെന്ന് വൈദ്യുതി മന്ത്രി 

അഴിമതി വിരുദ്ധ മുദ്രാവാക്യം മുഴക്കിയ ഹസാരെ ബിജെപി സര്‍ക്കാരിനെതിരെ ഇതുവരെ പ്രസ്താവന നടത്തിയിട്ടില്ല. മാത്രമല്ല കേന്ദ്ര സര്‍ക്കാര്‍ കൊണ്ടുവന്ന ജനദ്രോഹ ബില്ലുകള്‍ക്കെതിരെയും പ്രതികരിക്കാറില്ലെന്നും വിമര്‍ശനമുണ്ട്. കാലങ്ങള്‍ക്കിപ്പുറം ആംആദ്മി പിളര്‍പ്പിലേക്ക് പോയിക്കൊണ്ടിരിക്കുന്ന സമയത്താണ് ഹസാരെയുടെ പ്രതികരണം.