കൊല്ലം:  വ്യാജ അക്കൗണ്ടുകള്‍ വഴി സമൂഹമാധ്യമങ്ങളിലൂടെ പെണ്‍കുട്ടിയുടെ നഗ്നചിത്രം പ്രചരിപ്പിച്ച് സ്വര്‍ണവും പണവും തട്ടാന്‍ ശ്രമിച്ച കേസില്‍ പൊലിസുകാരന്‍ അറസ്റ്റില്‍. കെ.എ.പി അടൂര്‍ ബറ്റാലിയനിലെ സിവില്‍ പൊലിസ് ഓഫിസര്‍ ശൂരനാട് വടക്ക് ആനയടി സ്വദേശിയായ അവിനാഷ് സുരേന്ദ്രന്‍ (29) ആണ് അറസ്റ്റിലായത്.

പെണ്‍കുട്ടിയുടെ കുടുംബവുമായി നേരത്തെ ബന്ധമുണ്ടായിരുന്ന അവനാഷ് പെണ്‍കുട്ടിയുടെ അമ്മയുടെ ഫോണില്‍ നിന്ന് ഷെയര്‍ ചെയ്തപെണ്‍കുട്ടിയുടെ ചിത്രങ്ങള്‍ മോര്‍ഫ് ചെയ്ത് സമൂഹമാധ്യമങ്ങള്‍ വഴി പ്രചരിപ്പിക്കുമെന്ന് ഭീഷണിപ്പെടുത്തി സ്വര്‍ണാഭരണങ്ങള്‍ തട്ടിയെടുക്കുകയായിരുന്നു ഇയാളുടെ പദ്ധതി. സമൂഹമാധ്യമങ്ങളില്‍ വ്യാജ അക്കൗണ്ട് തയാറാക്കി, ഇവ പ്രചരിപ്പിച്ച ശേഷം ഈ ചിത്രങ്ങള്‍ അമ്മയുടെ ഫോണിലേക്കും വാട്‌സാപ്പിലൂടെ അയച്ചു. 

ചിത്രങ്ങള്‍ ഏതോ അജ്ഞാതന്‍ പ്രചരിപ്പിക്കുന്നതായി കണ്ടെത്തിയെന്നും താന്‍ ഇവരോട് സംസാരിച്ചപ്പോള്‍ 15 പവന്‍ സ്വര്‍ണാഭരണങ്ങള്‍ നല്‍കണമെന്ന് ആവശ്യപ്പെട്ടതായും അവിനാഷ് കുടുംബത്തെ ധരിപ്പിച്ചു. സ്വര്‍ണം നല്‍കിയില്ലെങ്കില്‍ പെണ്‍കുട്ടിയുടെ നഗ്‌നചിത്രങ്ങള്‍ അടക്കം പുറത്തു വരുമെന്നും അവിനാഷ് പെണ്‍കുട്ടിയുടെ കുടുംബത്തോടു പറഞ്ഞു. 

എന്നാല്‍ അവിനാഷിന്റെ രീതികളിലും സംസാരത്തിലും സംശയം തോന്നിയ കുടുംബം പൊലിസില്‍ പരാതി നല്‍കുകയായിരുന്നു. ശാസ്താംകോട്ട ഡി.വൈ.എസ്.പി പ്രസാദിന്റെ നേതൃത്വത്തിലുള്ള പ്രത്യേക അന്വേഷണ സംഘം നടത്തിയ അന്വേഷണത്തിലാണ് പ്രതി പിടിയിലായത്. 

സ്ഥിരമായി ജോലിക്കെത്താതിരുന്നതിനും കൃത്യവിലോപത്തിനും ഇയാളെ സര്‍വീസില്‍നിന്നു പിരിച്ചുവിടാനുള്ള നടപടികള്‍ പുരോഗമിക്കവെയാണ് പുതിയ കേസും പുറത്തുവന്നത്. 

A police officer has been arrested for allegedly attempting to extort money from a young woman by circulating her morphed nude photographs. The accused reportedly used the manipulated images to threaten the victim and demand a ransom.