വിഖ്യാത സ്പാനിഷ് ക്ലബ് റയൽ മാഡ്രിഡിനുള്ളിൽ ആഭ്യന്തര കലഹം രൂക്ഷമാകുന്നു. പരിശീലനത്തിനിടെ താരങ്ങൾ തമ്മിലുണ്ടായ കയ്യാങ്കളിയിൽ ഫെഡറിക്കോ വാൽവെർഡെയ്ക്ക് പരിക്കേറ്റതായും താരത്തെ ആശുപത്രിയിൽ പ്രവേശിപ്പിച്ചതായും സ്പാനിഷ് മാധ്യമങ്ങൾ റിപ്പോർട്ട് ചെയ്യുന്നു. സൂപ്പർ താരം ഔറേലിയൻ ചൗമേനിയുമായാണ് വാൽവെർഡെ ഏറ്റുമുട്ടിയത്. സീസണിൽ ഒരു കിരീടം പോലും നേടാനാവാതെ ക്ലബ് പ്രതിസന്ധിയിലായിരിക്കെ പുറത്തുവരുന്ന ഈ വാർത്തകൾ ആരാധകരെ വലിയ നിരാശയിലാഴ്ത്തിയിരിക്കുകയാണ്.

വാൽവെർഡെ ആശുപത്രിയിൽ; മാഡ്രിഡ് ക്യാമ്പിൽ സംഘർഷം

വ്യാഴാഴ്ച രാവിലെ നടന്ന പരിശീലന സെഷനിടെയാണ് നാടകീയ സംഭവങ്ങൾ അരങ്ങേറിയത്. കഴിഞ്ഞ ദിവസം മുതൽ വാൽവെർഡെയും ചൗമേനിയും തമ്മിൽ നിലനിന്നിരുന്ന വാക്കുതർക്കം കയ്യാങ്കളിയിൽ കലാശിക്കുകയായിരുന്നു. പരിക്കേറ്റ വാൽവെർഡെയുടെ ആരോഗ്യനിലയെക്കുറിച്ച് ക്ലബ് ഔദ്യോഗിക വിശദീകരണം നൽകിയിട്ടില്ലെങ്കിലും സംഭവം ഗൗരവകരമാണെന്നാണ് സൂചന. ഇരുവരെയും സസ്‌പെൻഡ് ചെയ്യുന്നതടക്കമുള്ള കടുത്ത നടപടികൾക്ക് ക്ലബ് ഒരുങ്ങുന്നതായാണ് വിവരം.

നേരത്തെ അന്റോണിയോ റൂഡിഗറും ആൽവരോ കരേരസും തമ്മിലും വാക്കുതർക്കമുണ്ടായതായി റിപ്പോർട്ടുകളുണ്ടായിരുന്നു. ടീമിലെ അച്ചടക്കം കൈവിട്ടുപോയതോടെ ക്ലബ് മാനേജ്‌മെന്റ് അടിയന്തര യോഗം വിളിച്ചുചേർത്തു. മുതിർന്ന താരങ്ങൾ ഇടപെട്ട് ഐക്യം പുനഃസ്ഥാപിക്കണമെന്ന് യോഗത്തിൽ നിർദ്ദേശം ഉയർന്നു.

എംബാപ്പെക്കെതിരെ ആരാധകരോഷം; മൗറീഞ്ഞോ മടങ്ങിയെത്തുമോ?

ടീമിനുള്ളിലെ തർക്കങ്ങൾക്കൊപ്പം ഫ്രഞ്ച് സൂപ്പർ താരം കിലിയൻ എംബാപ്പെയ്‌ക്കെതിരെ ആരാധകർ തിരിഞ്ഞതും റയലിനെ വെട്ടിലാക്കി. എംബാപ്പെ ടീം വിടണമെന്നാവശ്യപ്പെട്ട് സോഷ്യൽ മീഡിയയിൽ പ്രതിഷേധം കത്തുകയാണ്. താരത്തിന്റെ വരവ് ടീമിൻ്റെ ഒത്തൊരുമയെ ബാധിച്ചെന്നാണ് ഒരു വിഭാഗം ആരാധകരുടെ ആരോപണം.

പ്രതിസന്ധി മറികടക്കാൻ മുൻ പരിശീലകൻ ഹോസെ മൗറീഞ്ഞോയെ വീണ്ടും മാഡ്രിഡിൽ എത്തിക്കാൻ നീക്കം നടക്കുന്നതായും റിപ്പോർട്ടുകളുണ്ട്. താരങ്ങളെ കർക്കശമായി നിയന്ത്രിക്കാൻ മൗറീഞ്ഞോയുടെ സാന്നിധ്യം അത്യാവശ്യമാണെന്ന് ക്ലബ് കരുതുന്നു.

പരാജയങ്ങളുടെ സീസൺ

സീസണിൽ ദയനീയ പ്രകടനമാണ് റയൽ കാഴ്ചവെക്കുന്നത്. ചാംപ്യൻസ് ലീഗ് ക്വാർട്ടറിൽ ബയേൺ മ്യൂണിക്കിനോട് പരാജയപ്പെട്ട് പുറത്തായ റയലിന് ലാ ലിഗയിലും കിരീടം നഷ്ടമായിക്കഴിഞ്ഞു. ചിരവൈരികളായ ബാഴ്‌സലോണ ബഹുദൂരം മുന്നിലാണ്. ഷാബി അലോൺസോയെ നീക്കി ആൽവരോ ആർബലോവയെ ചുമതലപ്പെടുത്തിയെങ്കിലും ടീമിന് രക്ഷയുണ്ടായില്ല.

സീസണിലെ സുപ്രധാനമായ എൽ ക്ലാസിക്കോ പോരാട്ടം വരാനിരിക്കെ താരങ്ങൾ തമ്മിൽ തെരുവിൽ തല്ലുന്ന അവസ്ഥയിലെത്തിയത് റയൽ മാഡ്രിഡിൻ്റെ പ്രതിച്ഛായയ്ക്ക് വലിയ മങ്ങലേൽപ്പിച്ചിട്ടുണ്ട്.