ന്യൂഡല്‍ഹി: രാജ്യത്തെ പതിനാറ് സംസ്ഥാനങ്ങളില്‍ കൂടി തീവ്ര വോട്ടര്‍ പരിഷ്‌കരണം (എസ്.ഐ.ആര്‍) നടപ്പിലാക്കാനൊരുങ്ങി തെരഞ്ഞെടുപ്പ് കമ്മീഷന്‍. 16 സംസ്ഥാനങ്ങള്‍ക്ക് പുറമെ മൂന്ന് കേന്ദ്ര ഭരണ പ്രദേശങ്ങളിലും എസ്.ഐ.ആര്‍ നടപടികള്‍ക്കായുള്ള ഷെഡ്യൂള്‍ പ്രഖ്യാപിച്ചു. 

ആന്ധ്രാപ്രദേശ്, അരുണാചല്‍ പ്രദേശ്, ഹരിയാന, ജാര്‍ഖണ്ഡ്, കര്‍ണാടക, മഹാരാഷ്ട്ര, മണിപ്പൂര്‍, മേഘാലയ, മിസോറാം, നാഗാലാന്‍ഡ്, ഒഡീഷ, പഞ്ചാബ്, സിക്കിം, ത്രിപുര, തെലങ്കാന, ഉത്തരാഖണ്ഡ്, ഡല്‍ഹി, ഛണ്ഡീഗഡ്, ദാദ്രാ നാഗര്‍ ഹവേലി-ദാമന്‍ ദിയു എന്നിവിടങ്ങളിലാണ് മൂന്നാംഘട്ട എസ്.ഐ.ആര്‍ നടക്കുക. ഹിമാചല്‍ പ്രദേശ്, ജമ്മു കശ്മീര്‍, ലഡാക് എന്നിവിടങ്ങളില്‍ അടുത്ത ഘട്ടത്തില്‍ ഉള്‍പ്പെടുത്തും. 

മെയ് 20 മുതല്‍ വിവിധ സംസ്ഥാനങ്ങളില്‍ പരിശീലനവും, തയ്യാറെടുപ്പുകളും ആരംഭിക്കും. വീടുതോറുമുള്ള പരിശോധന മെയ് 30ന് തുടങ്ങും. 

ALSO READ: ബലിപെരുന്നാളിന് ദിവസങ്ങൾ മാത്രം ബാക്കിനിൽക്കെ ബംഗാളിൽ കന്നുകാലി കശാപ്പിന് കടുത്ത നിയന്ത്രണം;കശാപ്പിന് സർട്ടിഫിക്കറ്റ് നിർബന്ധം, പൊതുസ്ഥലങ്ങളിൽ നിരോധനം

കരട് വോട്ടര്‍ പട്ടിക ജൂലൈ മുതല്‍ ഒക്ടോബര്‍ വരെ പ്രസിദ്ധീകരിക്കും. പരാതികളും തിരുത്തലുകളും സ്വീകരിക്കുകയും ചെയ്യും. അന്തിമ പട്ടിക സെപ്റ്റംബര്‍, ഒക്ടോബര്‍, ഡിസംബര്‍ മാസങ്ങളിലായി പ്രസിദ്ധീകരിക്കാനാണ് തീരുമാനം.  

36.73 കോടി വോട്ടര്‍മാരുടെ വിവരങ്ങളാണ് പരിശോധനയ്ക്ക് വിധേയമാക്കുക. വിവിധ സംസ്ഥാനങ്ങളിലെ പ്രാദേശിക സാഹചര്യങ്ങള്‍ കണക്കിലെടുത്ത് 7 ഗ്രൂപ്പുകളായി തിരിച്ചാണ് സമയക്രമം നിശ്ചയിച്ചിട്ടുള്ളത്. 3.94 ലക്ഷം ബൂത്ത് ലെവല്‍ ഓഫീസര്‍മാരെയാണ് നടപടികള്‍ക്കായി നിശ്ചയിച്ചിട്ടുള്ളത്. 

ബംഗാളിലും, കേരളത്തിലും, തമിഴ്‌നാട്ടിലും എസ്.ഐ.ആര്‍ നടപടികളില്‍ ക്രമക്കേട് ആരോപണങ്ങള്‍ ഉയര്‍ന്നിരുന്നു. തെരഞ്ഞെടുപ്പുകളില്‍ അട്ടിമറി നടത്താന്‍ ബിജെപിയും, തെരഞ്ഞെടുപ്പ് കമ്മീഷനും തമ്മില്‍ നടത്തുന്ന ഒത്തുകളിയുടെ ഭാഗമാണ് എസ്.ഐ.ആര്‍ നടപടികളെന്നും ആരോപണമുയരുന്ന സാഹചര്യത്തിലാണ് മൂന്നാം ഘട്ടവും പ്രഖ്യാപിച്ചിട്ടുള്ളത്.