തിരുവനന്തപുരം: കെ.സി. വേണുഗോപാല്‍ കേരളത്തിലേക്ക് തിരിച്ചു. ഉച്ചകഴിഞ്ഞ് 3.30ന് ഡല്‍ഹിയില്‍ നിന്ന് തിരുവനന്തപുരത്തേക്ക് അദ്ദേഹം പുറപ്പെട്ടു. പുതിയ മന്ത്രിസഭ രൂപീകരണവുമായി ബന്ധപ്പെട്ട നിര്‍ണായക ചര്‍ച്ചകളാണ് സംസ്ഥാനത്ത് പുരോഗമിക്കുന്നത്.

സത്യപ്രതിജ്ഞയ്ക്ക് ശേഷമാണോ ഡല്‍ഹിയിലേക്ക് മടങ്ങുക എന്ന കാര്യത്തില്‍ തീരുമാനം പിന്നീട് എടുക്കുമെന്ന് കെ.സി. വേണുഗോപാല്‍ അറിയിച്ചു. മന്ത്രിസഭയില്‍ വ്യക്തമായ പ്രാതിനിധ്യം ഉറപ്പാക്കാനാണ് അദ്ദേഹത്തിന്റെ നീക്കമെന്നാണ് രാഷ്ട്രീയവൃത്തങ്ങള്‍ വിലയിരുത്തുന്നത്. പ്രധാന വകുപ്പുകള്‍ ഉള്‍പ്പെടെ ആറു മന്ത്രിസ്ഥാനങ്ങള്‍ ആവശ്യപ്പെടാനാണ് സാധ്യത.

അതേസമയം വി.ഡി. സതീശന്‍ നയിക്കുന്ന പുതിയ സര്‍ക്കാരില്‍ ആരൊക്കെ മന്ത്രിമാരാകുമെന്ന ആകാംക്ഷയിലാണ് രാഷ്ട്രീയ കേരളം. വൈകിട്ട് നാല് മണിക്ക് കന്റോണ്‍മെന്റ് ഹൗസില്‍ യു.ഡി.എഫ് നേതൃയോഗം ചേരും. തിങ്കളാഴ്ച സത്യപ്രതിജ്ഞ നിശ്ചയിച്ചിരിക്കുന്നതിനാല്‍ മന്ത്രിസഭയുടെ അന്തിമ പട്ടിക യോഗത്തില്‍ തീരുമാനിക്കാനാണ് മുന്നണി ശ്രമം.

വകുപ്പ് വിഭജനം ഉള്‍പ്പെടെയുള്ള കാര്യങ്ങളും യോഗത്തില്‍ ചര്‍ച്ചയാകും. 63 സീറ്റുകളുടെ വ്യക്തമായ ഭൂരിപക്ഷമുള്ളതിനാല്‍ കോണ്‍ഗ്രസ് ഇക്കുറി 11 മന്ത്രിമാരെ തീരുമാനിക്കുമെന്നാണ് സൂചന.

മലബാര്‍ മേഖലയില്‍ ഉള്‍പ്പെടെ മികച്ച പ്രകടനം കാഴ്ചവെച്ച മുസ്ലിം ലീഗ് അഞ്ച് മന്ത്രിസ്ഥാനങ്ങള്‍ ആവശ്യപ്പെടുമെന്നാണ് വിവരം. കൂടാതെ കേരള കോണ്‍ഗ്രസ് ജോസഫ് വിഭാഗവും ആര്‍.എസ്.പി യും മന്ത്രിസ്ഥാനത്തിനായി അവകാശവാദം ഉന്നയിക്കാനിടയുണ്ട്.

യു.ഡി.എഫ് പിന്തുണയില്‍ വിജയിച്ച വി. കുഞ്ഞികൃഷ്ണന്‍, ടി.കെ. ഗോവിന്ദന്‍, ജി. സുധാകരന്‍ എന്നിവരില്‍ ആരെയെങ്കിലും മന്ത്രിസഭയില്‍ ഉള്‍പ്പെടുത്തുമോയെന്നതും രാഷ്ട്രീയ ചര്‍ച്ചകളില്‍ പ്രധാന വിഷയമായിട്ടുണ്ട്.