മനാമ: തുര്‍ക്കിയുടെ തലസ്ഥാനമായ അങ്കാറയില്‍ ജൂലൈയില്‍ നടക്കാനിരിക്കുന്ന നാറ്റോ ഉച്ചകോടിയിലേക്ക് ബഹ്‌റൈന്‍ ഉള്‍പ്പെടെ നാല് ഗള്‍ഫ് രാജ്യങ്ങളെ ക്ഷണിക്കാനൊരുങ്ങുന്നതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. ബഹ്‌റൈനിനൊപ്പം ഖത്തര്‍, കുവൈത്ത്, യു.എ.ഇ എന്നിവര്‍ക്കും ക്ഷണം ലഭിക്കുമെന്നാണ് വിവരം.

ജൂലൈ 7, 8 തീയതികളിലാണ് ഉച്ചകോടി നടക്കുന്നത്. ഗള്‍ഫ് മേഖലയിലെ സുരക്ഷാ സാഹചര്യം, ഹോര്‍മുസ് കടലിടുക്കിലെ കപ്പല്‍ ഗതാഗത സുരക്ഷ, ഇറാനുമായി ബന്ധപ്പെട്ട മേഖലാതല ആശങ്കകള്‍ തുടങ്ങിയ വിഷയങ്ങളാകും ചര്‍ച്ചകളില്‍ പ്രധാനമായും ഉയരുക.

നാറ്റോയുടെ 'ഇസ്താംബുള്‍ കോഓപ്പറേഷന്‍ ഇനിഷ്യേറ്റീവ്' പദ്ധതിയുടെ ഭാഗമായാണ് ഈ നാല് രാജ്യങ്ങളും ഇതിനകം സഹകരണം തുടരുന്നത്. അതിന്റെ തുടര്‍ച്ചയായാണ് ഇത്തവണ ഉച്ചകോടിയിലേക്കുള്ള ക്ഷണമെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.

ALSO READ: മത്സ്യതൊഴിലാളികള്‍ക്ക് ആശ്വാസം; ബഹ്‌റൈനില്‍ ഞണ്ട് വേട്ടക്ക് അനുമതി

മേഖലയില്‍ സംഘര്‍ഷ സാധ്യത ഉയരുന്ന പശ്ചാത്തലത്തില്‍ ഗള്‍ഫ് രാജ്യങ്ങളുമായുള്ള സുരക്ഷാ സഹകരണം ശക്തമാക്കുന്നതിനാണ് നാറ്റോ കൂടുതല്‍ ശ്രദ്ധ നല്‍കുന്നത്. വിദേശകാര്യ മന്ത്രിമാര്‍ തലത്തിലുള്ള പ്രതിനിധികളാകും ഉച്ചകോടിയില്‍ പങ്കെടുക്കാന്‍ സാധ്യതയുള്ളത്.

അതേസമയം, ഹോര്‍മുസ് കടലിടുക്കിലെ സുരക്ഷ ശക്തമാക്കുന്നതിനായി ബ്രിട്ടന്‍ കൂടുതല്‍ സൈനിക സന്നാഹങ്ങള്‍ മേഖലയില്‍ വിന്യസിക്കാനും തീരുമാനിച്ചതായി റിപ്പോര്‍ട്ടുകളുണ്ട്. യുദ്ധവിമാനങ്ങളും നാവിക സേനാ സംവിധാനങ്ങളും ഇതിനായി ഉപയോഗിക്കുമെന്നാണ് വിവരം.

Bahrain, along with Qatar, Kuwait and the UAE, has reportedly been invited to the NATO Summit in Ankara. Gulf security, Hormuz Strait tensions and regional developments are expected to dominate the discussions.