​ചേളാരി: അസോസിയേഷൻ ഓഫ് സമസ്ത മൈനോറിറ്റി ഇൻസ്റ്റിറ്റ്യൂഷൻസിന്റെ (ASMI) 2026-27 അധ്യയന വർഷത്തെ അധ്യാപക ശാക്തീകരണ പദ്ധതിയായ ‘പേസ്’ (PACE - Professional Academic Capacity Enhancement) 15 ദിവസം നീണ്ടുനിൽക്കുന്ന പ്രൊഫഷണൽ പരിശീലന പരിപാടികൾക്ക് തുടക്കമായി. സമസ്ത കേരള ഇസ്‌ലാം മത വിദ്യാഭ്യാസ ബോർഡിന് കീഴിൽ പ്രവർത്തിക്കുന്ന അസ്മി സ്കൂളുകളുടെ അക്കാദമിക് നിലവാരം ഉയർത്തുന്നതിനായുള്ള വിപുലമായ പദ്ധതികളുടെ ഭാഗമായാണ് പരിശീലനം സംഘടിപ്പിക്കുന്നത്.
​

കോട്ടക്കലിൽ നടന്ന പരിശീലന പരിപാടി നഗരസഭ ചെയർമാൻ കെ.കെ. നാസർ ഉദ്ഘാടനം ചെയ്തു. ആധുനിക വിദ്യാഭ്യാസ രീതികളോടൊപ്പം മൂല്യാധിഷ്ഠിത വിദ്യാഭ്യാസവും ഉറപ്പാക്കാൻ അധ്യാപകർ പ്രതിബദ്ധരാകണമെന്ന് അദ്ദേഹം അഭിപ്രായപ്പെട്ടു.കോഴിക്കോട് കിംഗ് ഫോർട്ട് ഹോട്ടലിൽ സംഘടിപ്പിച്ച പരിശീലന സംഗമം അഡ്വ. ഫൈസൽ ബാബു എം.എൽ.എ ഉദ്ഘാടനം ചെയ്തു. പുതിയ കാലഘട്ടത്തിലെ സാങ്കേതിക വെല്ലുവിളികൾ നേരിടാൻ അധ്യാപകർ സ്വയം നവീകരിക്കണമെന്ന് അദ്ദേഹം ഓർമ്മിപ്പിച്ചു.
​

രണ്ട് കേന്ദ്രങ്ങളിലായി നടന്ന 18 സെഷനുകളിൽ പ്രീ-സ്കൂൾ, എൽ.പി. വിഭാഗങ്ങളിലെ അഞ്ഞൂറിലധികം അധ്യാപകർ പങ്കെടുത്തു. അസ്മി കൺവീനർ ജനറൽ പി.കെ മുഹമ്മദ് ഹാജി , ചീഫ് എക്സിക്യൂട്ടീവ്  കൺവീനർ റഹീം ചുഴലി, കൺവീനർമാരായ അഡ്വ. നാസർ കാളമ്പാറ, റഷീദ് കമ്പളക്കാട്, മജീദ് പറവണ്ണ, ട്രെയിനിംഗ് കോർഡിനേറ്റർ നൗഷാദ് വിളയിൽ,  മുഹമ്മദ് അലി പാലത്തിങ്ങൽ എന്നിവർ പരിപാടികൾക്ക് നേതൃത്വം നൽകി.
വിവിധ സെഷനുകൾക്ക്   കമറുദ്ധീൻ പരപ്പിൽ , ഷാഹുൽ ഹമീദ് ഹുദവി , മുനീറ , അനീഷ , ഫാരിഷ , ഷംല , സലീൽ എന്നിവർ നേതൃത്വം നൽകി.
​അടുത്ത പരിശീലന പരിപാടി മെയ് 17-ന് കൊണ്ടോട്ടി അഫ്രാദ് ഹോട്ടലിൽ വെച്ച് നടക്കും. വരും ദിവസങ്ങളിൽ കണ്ണൂർ , പെരിന്തൽമണ്ണ , തലപ്പാറ , എറണാകുളം സെൻ്ററുകളിലായി ആയിരത്തി നാനൂറോളം അധ്യാപകർക്ക് പരിശീലനം നൽകുന്നതാണ്.