പട്‌ന: ബിഹാറിലെ സാസാരാം റെയില്‍വേ സ്റ്റേഷനില്‍ നിര്‍ത്തിയിട്ടിരുന്ന പാസഞ്ചര്‍ ട്രെയിനിലെ ജനറല്‍ കോച്ചില്‍ അഗ്‌നിബാധ. ഭഭുവസാസാരാം പട്‌ന ഇന്റര്‍സിറ്റി ഫാസ്റ്റ് പാസഞ്ചര്‍ ട്രെയിനിലാണ് തിങ്കളാഴ്ച പുലര്‍ച്ചെയോടെ അപകടമുണ്ടായത്. പ്ലാറ്റ്‌ഫോം നമ്പര്‍ ആറില്‍ നിര്‍ത്തിയിരുന്ന ട്രെയിന്‍ രാവിലെ 6.45ന് പട്‌നയിലേക്ക് പുറപ്പെടാനിരിക്കുമ്പോഴായിരുന്നു സംഭവം.

കോച്ചിന്റെ ശുചിമുറി ഭാഗത്ത് നിന്ന് പുക ഉയരുന്നത് ആദ്യം ശ്രദ്ധയില്‍പ്പെട്ടതോടെ റെയില്‍വേ ജീവനക്കാരും സമീപത്തുണ്ടായിരുന്നവരും യാത്രക്കാരെ ഉടന്‍ പുറത്തിറക്കാന്‍ ശ്രമിച്ചു. ഏതാനും നിമിഷങ്ങള്‍ക്കകം തീ കോച്ചിലാകെ പടര്‍ന്ന് വലിയ നാശനഷ്ടമാണുണ്ടാക്കിയിരിക്കുന്നത്. അപകടസമയത്ത് നിരവധി യാത്രക്കാര്‍ കോച്ചിനുള്ളിലുണ്ടായിരുന്നുവെങ്കിലും എല്ലാവരെയും സുരക്ഷിതമായി ഒഴിപ്പിക്കാനായതായി അധികൃതര്‍ അറിയിച്ചു.

ട്രെയിനിലെ ഇലക്ട്രിക്കല്‍ വയറിങിലുണ്ടായ ഷോര്‍ട്ട് സര്‍ക്യൂട്ടാകാം തീ പിടിത്തത്തിന് കാരണമെന്നാണ് പ്രാഥമിക നിഗമനം. അതേസമയം യാത്രക്കാര്‍ കൊണ്ടുവന്ന ഏതെങ്കിലും തീ പിടിക്കാവുന്ന വസ്തുക്കളും സംഭവത്തിന് പിന്നിലുണ്ടോയെന്ന് അന്വേഷിക്കുന്നുണ്ട്. തീ പിടിത്തത്തിന് പിന്നാലെ കേടായ കോച്ച് ട്രെയിനില്‍നിന്ന് മാറ്റി റെയില്‍വേ സുരക്ഷാ വിഭാഗം പരിശോധന ആരംഭിച്ചു.

ഇതിനിടെ, കഴിഞ്ഞ ദിവസം മധ്യപ്രദേശിലെ രത്‌ലാമില്‍ ഡല്‍ഹിയിലേക്ക് പോവുകയായിരുന്ന രാജധാനി എക്‌സ്പ്രസിന്റെ എസി കോച്ചിലും സമാനമായ രീതിയില്‍ തീപിടിത്തം റിപോര്‍ട്ട് ചെയ്തിരുന്നു

A major fire broke out in a general coach of a passenger train stationed at Sasaram railway station in Bihar, with officials suspecting an electrical short circuit as the cause.