മനാമ: ബഹ്‌റൈനിലെ ആകാശ നിരീക്ഷകര്‍ക്ക് ഞായറാഴ്ച അപൂര്‍വ ദൃശ്യാനുഭവമൊരുങ്ങുന്നു. 'ബ്ലൂ മൈക്രോ മൂണ്‍' എന്നറിയപ്പെടുന്ന പ്രത്യേക ചന്ദ്ര പ്രതിഭാസമാണ് നാളെ ആകാശത്ത് തെളിയുക. സാധാരണ പൗര്‍ണമിയെക്കാള്‍ അല്പം ചെറുതായി തോന്നുന്ന പൂര്‍ണചന്ദ്രനാകും ഇത്.

ഭൂമിയെ ചുറ്റുന്ന ചന്ദ്രന്റെ ഭ്രമണപഥം പൂര്‍ണമായും വൃത്താകൃതിയിലുള്ളതല്ല. ചില സമയങ്ങളില്‍ ചന്ദ്രന്‍ ഭൂമിയോട് അടുത്തായിരിക്കും, ചിലപ്പോള്‍ ഏറെ അകലെയായിരിക്കും. ഇത്തവണ പൂര്‍ണചന്ദ്രന്‍ ഭൂമിയില്‍നിന്ന് ഏറ്റവും അകലെയുള്ള ഭാഗത്തായതിനാലാണ് അത് ചെറിയ വലിപ്പത്തില്‍ കാണപ്പെടുന്നത്. ഇതാണ് 'മൈക്രോ മൂണ്‍' എന്നറിയപ്പെടാന്‍ കാരണം.

അതേസമയം ഒരു മാസത്തിനുള്ളിലെ രണ്ടാമത്തെ പൂര്‍ണചന്ദ്രനെന്ന പ്രത്യേകതയും ഇതിന് ഉണ്ട്. അത്തരത്തിലുള്ള പൗര്‍ണമികളെയാണ് സാധാരണ 'ബ്ലൂ മൂണ്‍' എന്ന് വിളിക്കുന്നത്. എന്നാല്‍ പേര് കേട്ട് പലരും കരുതുന്നതുപോലെ ചന്ദ്രന്‍ നീല നിറത്തില്‍ കാണപ്പെടില്ല. സാധാരണ പൂര്‍ണചന്ദ്രനെപ്പോലെ തന്നെയായിരിക്കും ഇതിന്റെ നിറവും പ്രകാശവും.

ALSO READ: ബഹ്‌റൈനില്‍ അതിശക്തമായ ചൂട്; ഈ ആഴ്ച്ചയില്‍ രേഖപ്പെടുത്തിയത് 45 ഡിഗ്രി 

ജ്യോതിശാസ്ത്ര വിദഗ്ധരുടെ വിശദീകരണപ്രകാരം പ്രാദേശിക സമയം ഉച്ചയോടെയാണ് ചന്ദ്രന്‍ പൂര്‍ണ പ്രഭയിലെത്തുക. പക്ഷേ ആ സമയത്ത് ചന്ദ്രന്‍ ചക്രവാളത്തിന് താഴെയായതിനാല്‍ ബഹ്‌റൈനില്‍നിന്ന് അത് കാണാനാകില്ല. സൂര്യാസ്തമയത്തിന് ശേഷം വൈകുന്നേരം ചന്ദ്രോദയത്തോടെ ഈ അപൂര്‍വ പ്രതിഭാസം വ്യക്തമായി കാണാന്‍ സാധിക്കും.

കാലാവസ്ഥ അനുകൂലമായാല്‍ ബഹ്‌റൈനിന്റെ വിവിധ ഭാഗങ്ങളില്‍നിന്നും ചന്ദ്രനെ വ്യക്തമായി കാണാനാകുമെന്നാണ് നിരീക്ഷകരുടെ വിലയിരുത്തല്‍. നഗരപ്രകാശം കുറവുള്ള തുറസ്സായ ഇടങ്ങളില്‍നിന്ന് നോക്കിയാല്‍ കൂടുതല്‍ മനോഹരമായി ഈ ദൃശ്യം ആസ്വദിക്കാനാകുമെന്നും അവര്‍ പറയുന്നു.

അപൂര്‍വമായ ആകാശ പ്രതിഭാസങ്ങളോടുള്ള കൗതുകം വര്‍ധിച്ചുവരുന്ന സാഹചര്യത്തില്‍ നിരവധി പേരാണ് ഇതിനകം തന്നെ 'ബ്ലൂ മൈക്രോ മൂണ്‍' കാണാനുള്ള തയ്യാറെടുപ്പുകളില്‍ ഏര്‍പ്പെട്ടിരിക്കുന്നത്.

Skywatchers in Bahrain will witness the rare Blue Micro Moon on Sunday. The celestial event will feature a full moon appearing slightly smaller than usual due to its distant orbit from Earth.