പാലക്കാട്: പാലക്കാട് വിമാനത്താവളം യാഥാർഥ്യമാക്കുന്നതിനായി കേന്ദ്രം സാധ്യതാ പഠനത്തിന് ഉത്തരവിട്ടതായി വി.കെ ശ്രീകണ്ഠൻ എം.പി അറിയിച്ചു. കാർഷിക മേഖലയാൽ സമൃദ്ധമായ പാലക്കാട് വിമാനത്താവളം വരുന്നതോടെ കയറ്റുമതിയിലുൾപ്പെടെ വൻ വികസനം ഉണ്ടാകുമെന്നും ഇക്കാര്യത്തിൽ മുഖ്യമന്ത്രിയുമായി ചർച്ച നടത്തുമെന്നും എം.പി പറഞ്ഞു.

പാലക്കാട് അന്താരാഷ്ട്ര വിമാനത്താവളത്തിന്റെ സാധ്യതയെ കുറിച്ച് കഴിഞ്ഞ വർഷം ലോക്‌സഭയിൽ താൻ വിഷയം ഉന്നയിച്ചിരുന്നുവെന്നും അദ്ദേഹം പറഞ്ഞു. പദ്ധതിയിൽ സംസ്ഥാനവും ഇടപ്പെടണമെന്നാണ് ആഗ്രഹിക്കുന്നതെന്നും എം.പി വ്യക്തമാക്കി.

പാലക്കാട് പുതുശ്ശേരിയിൽ പതിനായിരം കോടി രൂപയുടെ നിക്ഷേപത്തോടെ ദേശീയ വ്യവസായ ഇടനാഴി വരുമെന്നും അമ്പതിനായിരത്തോളം യുവാക്കൾക്ക് തൊഴിൽ അവസരം ലഭിക്കുമെന്നും എം.പി പറഞ്ഞു. വിമാനത്താവളം കൊണ്ടുവരുമെന്ന് പറഞ്ഞപ്പോൾ ചിലർ പരിഹസിച്ചിരുന്നുവെന്നും ഇപ്പോൾ സാധ്യതാ പഠനത്തിലേക്ക് കാര്യങ്ങൾ എത്തിയെന്നും അദ്ദേഹം കൂട്ടിച്ചേർത്തു.

VK Sreekandan MP has stated that the Central Government has directed a feasibility study for a proposed new airport in Palakkad.