കൊച്ചി: മലയാളം മാധ്യമമായി പഠിപ്പിക്കുന്ന വിദ്യാലയത്തിലെ ഒന്നാം ക്ലാസിലും രണ്ടാം ക്ലാസിലും ഒരു മലയാളി വിദ്യാര്‍ഥി പോലും ഇല്ലാത്ത അപൂര്‍വമായൊരു കാഴ്ചയ്ക്കാണ് കളമശ്ശേരി നഗരസഭയിലെ പള്ളിലാങ്കര ഗവ. എല്‍പി സ്‌കൂള്‍ സാക്ഷ്യം വഹിക്കുന്നത്. ഇത്തവണ ഇവിടെ പുതുതായി പ്രവേശനം നേടിയ മുഴുവന്‍ കുട്ടികളും ഇതര സംസ്ഥാനങ്ങളില്‍ നിന്നുള്ള അതിഥി തൊഴിലാളികളുടെ മക്കളാണ്.

ആകെ 27 വിദ്യാര്‍ഥികള്‍ പഠിക്കുന്ന ഈ സ്‌കൂളില്‍ നിലവില്‍ രണ്ട് മലയാളി കുട്ടികള്‍ മാത്രമാണുള്ളത്. ഒന്നാം ക്ലാസിലെ ഏഴ് വിദ്യാര്‍ഥികളില്‍ നാല് പേര്‍ അസം സ്വദേശികളും രണ്ട് പേര്‍ ഉത്തര്‍പ്രദേശില്‍ നിന്നുള്ളവരും ഒരാള്‍ ഉത്തരാഖണ്ഡ് സ്വദേശിയുമാണ്. രണ്ടാം ക്ലാസിലുള്ള ആറ് കുട്ടികളില്‍ നാല് പേര്‍ പശ്ചിമ ബംഗാളില്‍ നിന്നും ഓരോരുത്തര്‍ വീതം ഉത്തര്‍പ്രദേശ്, അസം എന്നിവിടങ്ങളില്‍ നിന്നുള്ളവരുമാണ്. മൂന്നിലും നാലിലും മാത്രമാണ് ഓരോ മലയാളി വിദ്യാര്‍ഥികള്‍ വീതമുള്ളത്.

അധ്യാപകരെല്ലാം മലയാളികളായ ഈ സ്‌കൂളില്‍ 2022ല്‍ നേപ്പാളില്‍ നിന്നുള്ള ഒരു കുട്ടിയും പഠിച്ചിരുന്നതായി പ്രധാന അധ്യാപകന്‍ ബെന്നി ജോസഫ് ഓര്‍ക്കുന്നു. നാട്ടില്‍ പോയ ചില കുട്ടികള്‍ കൂടി മടങ്ങിയെത്താനുണ്ടെന്നും അദ്ദേഹം വ്യക്തമാക്കി. കളമശ്ശേരി നഗരസഭാ ചെയര്‍മാന്‍ ജമാല്‍ മണക്കാടനാണ് സ്‌കൂളിലെ ഈ വര്‍ഷത്തെ പ്രവേശനോത്സവം ഉദ്ഘാടനം ചെയ്തത്.

In a unique scenario, all students enrolled in the first and second standards of Pallilankara Govt. LP School in Kalamassery are children of migrant workers, with only two local Malayalam students in the entire school.